Mimlifu loo Migbɔmɔtsoŋ Hewalɛnamɔ?

Namɔ mli fuuu? Ebaa wɔ fɛɛ wɔ nɔ. Ekolɛ yɛ bei komɛi amli lɛ wɔsane ja yɛ wɔmli ni fuɔ lɛ hewɔ. Shi kɛ wɔɔkpɛlɛ nɔ lɛ, ani ejeee anɔkwale akɛ yɛ bei babaoo mli lɛ wɔmli ni fuɔ lɛ (loo bɔ ni enaa wa lɛ) ejaaa?

Biblia lɛ kɛɔ akɛ: “Ha omlifu sɛɛ afo ni oshɛ mlila ofɔ; kaawo otsui la hu, efɔŋ feemɔ mli kɛkɛ ekɛ mɔ yaa.”(Lala 37:⁠8) Mɛɛ nilee yɔɔ ŋaawoo nɛɛ mli? Ani eenyɛ esa ogbɔmɔtso hewalɛnamɔ he daa?

The New York Times lɛ kadi yɛ efa ko ni ji “Health” lɛ mli akɛ:

‘Mɛi ni kɛ gidigidifeemɔ jieɔ amɛhenumɔi ni mli wa lɛ kpo oyayaayai loo amɛtaraa shi ni amɛmli efu waa yɛ nɔ ko bibioo he kɛkɛ lɛ baanyɛ aye amɛhe awui babaoo diɛŋtsɛ. Ekolɛ amɛmiigbe amɛhe ni amɛleee.

“Nii amlipɛilɔ ebua anɔkwa saji pii anaa nyɛsɛɛ nɛɛ ni amɛkɛmiitsɔɔ bɔ ni mlifu ni anyɛɛɛ nɔ aye lɛ yeɔ gbɔmɔtso lɛ awui ehaa ni tamɔ bɔ ni zigaret-shɛremɔ, shwilɛ-tɔtɔrɔɔ kɛ niyenii ni fɔ fa yɛ mli tsɔ lɛ gbeɔ mɔ oya.

‘“Dr. Redford Williams, ni ji nii amlipɛilɔ yɛ tsofafeemɔ mli ni kɔɔ bɔ ni mɛi fɛɔ amɛnii amɛhaa he lɛ ni yɔɔ Duke University Medical Center lɛ kɛɛ, ‘Wɔ nii amlipɛimɔ he nikasemɔi tsɔɔ akɛ nɔ ko bibioo he mlifu ni naa wa ni anaa lɛ tamɔ nɔ fɛɛ nɔ ni wɔle ni yeɔ gbɔmɔtso hewalɛnamɔ awui lɛ pɛpɛɛpɛ.’”

Nii amlipɛimɔ tsɔɔ akɛ mɛi ni haa daa gbi shihilɛ mli naagbai naa amɛnɔ hewalɛ babaoo tsɔ lɛ kɛ nɔnyɛɛ baa hewalɛi ni kanyaa wala yibii ni yɔɔ gbɔmɔtso lɛ mli lɛ nɔ babaoo. Amɛmli ni fɔɔ fumɔ lɛ baanyɛ aha tɔtɔmɔ aba fɔ ni hi ha gbɔmɔtso lɛ kɛ emli nɔ ni yeɔ gbɔmɔtso lɛ awui lɛ fɛɛ teŋ, ni enɛ haa amɛbajeɔ oshara ko ni baanyɛ aha amɛye tsui fãji kɛ la fãji mli hela lɛ ashishi.

Ekolɛ mɛi komɛi aaakɛɛ akɛ, ‘Shi nakai nɔŋŋ ji bɔ ni miyɔɔ’ aloo, ‘Nakai ji bɔ ni mikɛda.’ Shi kɛlɛ, nakai etsɔɔɔ akɛ onyɛŋ otsake kɛji obɔ mɔdɛŋ ni okɛ Nyɔŋmɔ ŋaawoo lɛ atsu nii yɛ anɔkwayeli mli lɛ. Kwɛmɔ eŋaawoo ni kɔɔ mlifu kɛ mlila he lɛ ni aŋma yɛ Abɛi 14:​29, 30; 22:​24, 25; Efesobii 4:​26; Yakobo 1:​19, 20 lɛ yɛ bo diɛŋtsɛ o-Biblia lɛ mli.

Kɛ okɛ nakai ŋwɛi ŋaawoo lɛ tsu nii lɛ, ebaaha ona gbɔmɔtsoŋ hewalɛ kpakpa ni owala sɛɛ akɛ. Times lɛ kɛɛ: “Nii amlipɛilɔi babaoo kɛɛ akɛ mɛi ni mli etsɛɛɛ fumɔ lɛ baanyɛ aha gbele ni baa mɛi anɔ mra yɛ amɛshihilɛ mli lɛ he oshara lɛ aba shi kɛtsɔ bɔ ni amɛkɛ mlifu feɔ amɛnii oyayaayai ni amɛhaa enaa waa lɛ tsakemɔ nɔ.”