Nyɔŋmɔ Gbɛi

“Kɛ jeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme.” Nɛkɛ ji bɔ ni Latin niŋmaa nɛɛ kaneɔ. Wiemɔi lɛ damɔ Lala 127:1 nɔ yɛ Biblia lɛ mli, ni anɔkwale ko ni mli kwɔ waa yɛ mli: Nɔ fɛɛ nɔ ni afeɔ ni Yehowa jɔɔmɔ bɛ nɔ lɛ baafee yaka deŋmegbomɔ yɛ naagbee.

Anaa niŋmaa nɛɛ, ni yɛ kɛjɛ afi 1780 tɔ̃ɔ lɛ yɛ tsu ko he yɛ Colombo, yɛ Sri Lanka, ni esa kadimɔ waa ejaakɛ Nyɔŋmɔ gbɛi, Yehowa yɛ mli. (Kwɛmɔ mfoniri lɛ.) Akɛ nakai gbɛi lɛ tsu nii waa yɛ afii ohai abɔ ni eho lɛ amli. Bei pii lɛ afɔɔ ŋmaa yɛ nɔyeli tsũi, sɔlemɔ tsũi, kɛ shikai po nɔ. Maŋsɛɛ sanekpakpa shiɛlɔi kɛ Nyɔŋmɔ gbɛi tsu nii beni amɛkɛ Biblia lɛ tee maji asɛɛ shɔŋŋ lɛ, ni ŋwanejee ko bɛ he akɛ no kɛ nɛkɛ niŋmaa ni yɔɔ Sri Lanka nɛɛ ba.

Kwɛ bɔ ni nibii yɔɔ sɔrɔto kwraa ŋmɛnɛ! Mɛi ni tsɛɔ amɛhe Kristofoi lɛ ateŋ mɛi fioo pɛ susuɔ Nyɔŋmɔ gbɛi he. Woloŋlelɔi komɛi po wieɔ shiɔ Yehowa Odasefoi yɛ enɔ mi ni amɛmaa lɛ hewɔ. Mɛni hewɔ? Taakɛ mɛi komɛi tsɔɔ lɛ, akɛni aleee bɔ ni atsɛɔ lɛ jogbaŋŋ yɛ Hebri mli lɛ hewɔ. Shi mɛi enyiɛ le bɔ ni atsɛɔ Yesu gbɛi yɛ shishijee Hebri wiemɔi mli? Ni kɛlɛ, akɛ egbɛi tsuɔ nii yɛ he fɛɛ he, ni abuɔ hu.

Nyɔŋmɔ gbɛi he hiaa waa kɛha Yesu. Etsɔɔ wɔ ni wɔsɔle akɛ: “Ha ogbɛi lɛ he atse.” (Mateo 6:9, New World Translation) Ni beni eshwɛ fioo ni ebaagbo lɛ, ekɛɛ Nyɔŋmɔ akɛ: “Mijie ogbɛi lɛ ashi mitsɔɔ gbɔmɛi ni oŋɔ amɛ kɛjɛ je lɛŋ oha mi lɛ.” (Yohane 17:⁠6) Anɔkwa Kristofoi ji Yesu nanemaahei asɛɛnyiɛlɔi. Ani esaaa akɛ amɛ hu ‘amɛjieɔ Nyɔŋmɔ gbɛi lɛ ashi amɛtsɔɔ?’ Yehowa Odasefoi feɔ nakai, ni Yehowa jɔɔ ‘amɛtsũ’ lɛ nɔ babaoo. Lala nɛɛ feɔ anɔkwale yɛ amɛhe akɛ: “Ajɔɔ maŋ ni Yehowa ji e-Nyɔŋmɔ lɛ!”​—Lala 144:⁠15.