Tamɔ Tso

“KWASHIAI ni tamɔ mi nɔŋŋ ji mɛi ni feɔ lalafoo wiemɔi, shi Nyɔŋmɔ pɛ baanyɛ abɔ tso.” Beni ejieɔ sɛɛnamɔi babaoo ni anaa yɛ tsei ahe lɛ yi lɛ, lalafolɔ Joyce Kilmer kɛ yijiemɔ loo shidaa ha Nyɔŋmɔ yɛ enɛɛmɛi ni ebɔ lɛ hewɔ.

Yehowa Nyɔŋmɔ fee tsei sɔrɔtoi babaoo ni he yɔɔ fɛo, ni sɛɛnamɔ yɔɔ amɛhe. Tsei bibii kɛ tsei wuji fɛɛ baanyɛ afee fɛo aahu akɛ anyɛŋ ana wiemɔi ni akɛaatsɔɔ mli. Kɛfata he lɛ, tsei haa niyenii, lai loo ŋai, kɛ wɔɔ he. Ni ŋaa nitsulɔi yaa nɔ amɛtaoɔ gbɛi heei ni atsɔɔ nɔ akɛ tsei feɔ nibii.

Bei komɛi lɛ akɛ tsei damɔɔ shi ahaa maŋtsɛyelii, nɔyelɔi, kɛ aŋkroaŋkroi yɛ Biblia lɛ mli. (Ezekiel 31:1-18; Daniel 4:​10-26) Awieɔ tsei ahe akɛtoɔ shihilɛi ni mlifilimɔ, toiŋjɔlɛ, kɛ yibiiwoo ni jɛɔ Yehowa maŋtsɛyeli lɛ mli baa lɛ kɛ ewebii ni atswaa amɛ amaa shi ekoŋŋ lɛ he. (1 Kronika 16:​33; Yesaia 55:​12; Ezekiel 34:​27; 36:30) Ŋmalɛi lɛ hu woɔ shi akɛ Nyɔŋmɔ webii lɛ agbii baatamɔ tso gbii. (Yesaia 65:22) Shishinumɔ kpele yɛ enɛ mli kɛ wɔyoo akɛ tsei komɛi hiɔ shi afii ohai abɔ lɛ.

Biblia mli lalatsɛ ko kɛɛ akɛ mɔ ni mii shɛɔ Nyɔŋmɔ mla lɛ he lɛ baatsɔ “tamɔ tso ni atɛo yɛ faai atoi, ni woɔ eyibii yɛ ebe lɛ mli, ni eyibaai kpɔɔŋ; ni nɔ fɛɛ nɔ ni efeɔ lɛ shwereɔ.” Tso ni yɔɔ frɔ̃frɔ̃ ni atɛo yɛ he ni nu babaoo hoɔ yɛ lɛ kai lalatsɛ lɛ yɛ mumɔŋ shweremɔ ni mɔ ni “Yehowa mla lɛ he emii shɛɔ yɛ” lɛ naa mli ŋɔɔmɔ lɛ he. (Lala 1:​1-3) Kɛ omii shɛ Nyɔŋmɔ mla lɛ kɛ e-Wiemɔ Krɔŋkrɔŋ lɛ he yɛ anɔkwa gbɛ nɔ lɛ, no lɛ ogbii baanyɛ atsɔ tamɔ tso gbii. Yɛ anɔkwale mli lɛ kɛ ofee onii ni yɛ Yehowa Nyɔŋmɔ kɛ Yesu Kristo he anɔkwa nilee lɛ kɛ gbeekpamɔ naa lɛ, obaanyɛ ona naanɔ wala he hiɛnɔkamɔ.​—Yohane 17:3