Britania Kristofoi Ni Yɔɔ Ekaa Lɛ

Taakɛ wolo. The Economist lɛ tsɔɔ lɛ, gbɔmɛi akpekpei 56 ni yɔɔ Britania lɛ ateŋ yifalɛ ko ni shɛɛɛ oha fɛɛ mli 10 ji Kristofoi ni yɔɔ ekaa bianɛ. Yɛ Hɔgbaa nɛkɛ lɛ, mɛi ni shɛɛɛ akpekpei ejwɛ yaa sɔlemɔ. Mɛnɛɛmɛi ateŋ oha fɛɛ mli 1.1 ji Anglikan sɔlemɔ lɛ mli bii. Shi yɛ susumɔ ni ahiɛ akɛ kɛ Nyɔŋmɔ yɛ jio ebɛ jio aleee ni egbɛ eshwa nɛɛ fɛɛ sɛɛ Iɛ, Church of England sɔlemɔ lɛ yaa nɔ ehiɛɔ egbɛhe ni ato ama shi akɛ Maŋ jamɔ lɛ mli. Wolo tɛtrɛɛ ni atsɔ hiɛ atsi ta lɛ kɛɔ akɛ, “Britania efeko Kristofoi amaŋ afii pii nɛ, shi esumɔɔɔ ni ekpɛlɛɔ nɔ akɛ etsɔ maŋ ni Nyɔŋmɔ he sane jeee amɛhe sane ko, titri lɛ yɛ blema anunyam ni ekɛ ehe kpɛtɛɔ he lɛ hewɔ.” Belɛ ebɛ naakpɛɛ akɛ ŋmɛnɛŋmɛnɛ beaŋ maŋkwralɔi kɛ adafitswaa woji biɔ ni atse Sɔlemɔ lɛ ama afa akɛ ejeee gbɛjianɔ ni ato ama shi, ni atse lɛ kɛjɛ Maŋ lɛ he kwraa lɛ.

Afii ohai 19 lɛ mli The Economist lɛ mli niŋmalɔ, Walter Bagehot ye awerɛho akɛ, “je lɛ diɛŋtsɛ ni kɛɔ akɛ eji Kristofonyo lɛ ji nɔ ni ehiii fe fɛɛ yɛ jeŋ sɔrɔtoi lɛ amli.” Shi Yesu Kristo wie yɛ Ŋ.B. klɛŋklɛŋ afii oha lɛ mli akɛ ekaselɔi lɛ jɛɛɛ je lɛ mli,taakɛ bɔ ni lɛ hu ejɛɛɛ je lɛ mli lɛ.’ (Yohane 17:16) Yɛ anɔkwale mli lɛ etsu amɛ kɛtee je lɛ mli koni amɛyashiɛ Nyɔŋmɔ Maŋtsɛyeli lɛ. Nakai nɔŋŋ hu ŋmɛnɛ, ale Yehowa Odasefoi jogbaŋŋ yɛ jeŋ fɛɛ yɛ ekaa ni amɛkɛshiɛɔ “yɛ faŋŋ kɛ shia kɛ shia” lɛ hewɔ.​—Bɔfoi lɛ Asaji 20:⁠20.

Kɛ akɛ amɛ to Anglikanbii ahe Iɛ, Odasefoi 126,173 ni yɔɔ Britania lɛ ayi faaa kwraa. Ni kɛlɛ amɛteŋ mɔ fɛɛ mɔ kɛ ŋmɛlɛtswaa 20 yaa Kristofoi akpeei daa nyɔŋ nɔ. Kɛfata he lɛ, yɛ afi 1992 mli lɛ, kɛ aja mli lɛ, Odasefoi lɛ ateŋ mɔ fɛɛ mɔ kɛ ŋmɛlɛtswaa 16 kroko shiɛ Nyɔŋmɔ Maŋtsɛyeli lɛ, ni ji Nɔyeli ni etsɛŋ ekɛ jalɛ jeŋ hee baaba lɛ he sanekpakpa lɛ amɛtsɔɔ mɛi krokomɛi daa nyɔŋ nɔ. (Mateo 24:​14; 2 Petro 3:13) Kɛ Yehowa Odasefoi ba oshia yɛ be kroko mli lɛ, ani obaabo amɛshɛɛ sane ni esoro no kwraa lɛ toi koni oyoo nɔ ni kanyaa amɛ ekãa-feemɔ lɛ?