Ani Abu La ni Agbalaa Awoɔ Mɛi Amli lɛ Fe Nine?

La ni agbalaa awoɔ mɛi amli lɛ efa babaoo yɛ ŋmɛnɛŋmɛnɛ beaŋ tsofa-feemɔ mli, shi ani amɛhi tamɔ bɔ ni amɛgbɛ́i ehe shi lɛ? Mɛni osusuɔ?

Dr Craig S. Kitchens bi yɛ The American Journal of Medicine (February 1993) nɔ lɛ mli akɛ: “Ani Abu La ni Agabalaa Awoɔ Mɛi Amli lɛ Fe Nine?” Ewie akɛ yɛ bei pii amli lɛ datrɛfoi kwɛɔ kɛji tsofa-feemɔ ko mli sɛɛnamɔ fa fe oshara ni ekɛaaba lɛ lo. Shi la ni agbalaa awoɔ mɛi amli lɛ hu?

Kitchens kwɛ osharai pii ni kɛ la ni agbalaa awoɔ mɛi amli lɛ yɔɔ tsakpaa, ni eba nyɛsɛɛ nɛɛ lɛ ahe odaseyelii tamɔ mlɛbo mli hela, gbɔmɔtso lɛ mli nibii ni wuɔ shiɔ helai lɛ fitemɔ, gbɔmɔtso lɛ henii ni kpaa nitsumɔ, gbɔmɔtso lɛ ni wuɔ shiɔ gbɔmɔtso kroko he nii ni atɛoɔ awoɔ emli lɛ babaoo mli ekoŋŋ. Beni nikasemɔ ko tsɔɔ “helai krokomɛi babaoo ni baa” kɛjɛɔ la ni agbalaa awoɔ mɔ mli lɛ mli lɛ, “emu sane naa akɛ la fɛɛ la ni agbalaa awoɔ mɔ mli lɛ mli oha fɛɛ mli 20 kɛ nɔ ko ni ehiii baa, ekomɛi yɛ bibii ni ekomɛi hu yeɔ awui waa” ni ekɛ gbele po baa.

Fɛɛ sɛɛ lɛ, ani nɛkɛ sɛɛnamɔi nɛɛ sa osharai ni akɛ he woɔ mli nɛɛ?

Dr. Kitchens saa kwɛ nikasemɔi 16 ni abɔ he amaniɛ ni kɔɔ opireshɛn 1,404 ni afee Yehowa Odasefoi ni amɛkpɛlɛɛɛ akɛ agbala la awo amɛmli yɛ Biblia mli famɔ akɛ ‘atsi he kɛjɛ la he’ lɛ asane lɛ mli ekoŋŋ.​—Bɔfoi lɛ Asaji 15:​28, 29.

Mɛni jɛ mli ba? “Etamɔ nɔ ni helatsɛmɛi ni ji Yehowa Odasefoi ni kpɛɔ amɛyiŋ akɛ amɛŋmɛŋ gbɛ ni agbala la awo amɛmli yɛ opireshɛn wuji afeemɔ mli lɛ kɛ oha fɛɛ mli ekome mlijaa fa kɛyashi oha fɛɛ mli ekome kɛ fã he gbele fataa osharai fɛɛ ni jɛɔ mli baa lɛ he. Nɔ ni bɛ faŋŋ jogbaŋŋ ji helai kɛ gbelei abɔ ni nifeemɔ ni atsɔ hiɛ atsi ta nɛɛ haa ajeɔ mli lɛ, shi ekolɛ amɛfa fe oshara ni yɔɔ la ni akɛhaaa mɔ lɛ mli lɛ.” (Wɔ wɔtsɔmɔ wiemɔ lɛ.) Mɛni ji oti ni yɔɔ esane lɛ mli lɛ? Ekolɛ tsofa-feemɔ mli osharai fɛɛ ni baa yɛ la ni aheee hewɔ lɛ mli lɛ faaa tamɔ osharai ni baa yɛ la ni akɛhaa mɛi lɛ amli lɛ.

No hewɔ lɛ, Kitchens sanebimɔ ni jwɛŋmɔ yɔɔ mli lɛ ji akɛ: “Kɛji akɛ nɔ ni jɛɔ la ni akɛhaaa Yehowa Odasefoi lɛ mli baa lɛ kɛ helai kɛ gbelei fioo pɛ baa ni ehaa ajoɔ nyɔmɔbɔɔ kɛ helai krokomɛi babaoo ni ehiii tsamɔ lɛ anaa foi lɛ, ani esa akɛ helatsɛmɛi fioo pɛ akpɛlɛ la ni akɛhaa amɛ lɛ nɔ?”

Mɛi ni damɔɔ odaseyeli ni tamɔ nɛkɛ nɔ amɛkpoɔ la lɛ hu miifee amɛnii yɛ gbɛtsɔɔmɔi ni wɔ-Bɔlɔ lɛ kɛha lɛ kɛ gbeekpamɔ naa.