Hɔmɔ Ni Agba Afɔ Shi

YƐ NYƐSƐƐ afii nɛɛ amli lɛ, hɔmɔ he haomɔ lɛ ebafee nɔ ni akɛ dɔlɛ babaoo naa daa nɛɛ yɛ je lɛŋ adafitswaa woji amli. Akɛ amanehului ni hiɛ kpaŋ nɔ kɔkɔɔkɔ lɛ ahe mfonirii jɛɔ Ethiopia kɛ hei krokomɛi kɛbaa. Yɛ 1992 mli lɛ, agbala je lɛ jwɛŋmɔ kɛtee Somaliabii ni hɔmɔ gbeɔ amɛ, yɛ nugbɔ ni enɛɛɛ kɛ ta hewɔ lɛ anɔ. International Herald Tribune lɛ bɔ amaniɛ yɛ September 1992 nɔ lɛ mli akɛ: “Mɔ ko mɔ ko leee Somaliabii ayibɔ ni egboi, shi Red Cross kuu lɛ tsɔɔ akɛ amɛyifalɛ baashɛ 100,000. Kɛ jeee akpei abɔ lɛ, ohai abɔ gboiɔ daa gbi.”

Yibɔi ní atsɛɔ lɛ etsɔɔɔ amanehulu kɛ piŋmɔ diɛŋtsɛ ni gbɔmɛi nɛɛ naa lɛ mli. Yvette Pierpaoli, ni ji Europa najiaŋdamɔlɔ kɛha Refugees International kuu lɛ, ŋma yɛ Jeŋmaji Ekomefeemɔ lɛ wolo tɛtrɛɛ ni atsɛɔ lɛ Refugees lɛ mli akɛ: “Yɛ New York loo Geneva nɛkɛ lɛ, etamɔ nɔ ni abobalɔi ahe sane nɛɛ mli ka shi faŋŋ diɛŋtsɛ; aŋmaa yibɔi lɛ, ni ziroi bɔ ni akɛfataa he lɛ fa kwraa fe bɔ ni abaanyɛ anu shishi. Shi kɛ ofa gbɛ shitoi akpei abɔ, kɛyashɛ maji ni basabasa feemɔ heɔ aba jɛmɛ lɛ amli lɛ, henumɔi ni mli wa baaha awerɛho amɔ bo ni bɔ ni mɛi naa amanehulu lɛ baaha obo kɛ yaafo po.”

Yɛ be mli ni Red Cross kuu lɛ kɛɔ akɛ mɔdɛŋ ni ebɔɔ ni eye ebua Somalia lɛ ji yelikɛbuamɔ nitsumɔ wulu fe fɛɛ ni amɛtsu lɛ, kɛlɛ mɛi ni kwɛɔ nɔ ni yaa nɔ lɛ wieɔ he akɛ eji yelikɛbuamɔ bibioo pɛ, ni akɛyaaa mra kwraa hu. Pierpaoli ye ŋkɔmɔ akɛ: “Maji ni ebake niyenii lɛ sumɔɔɔ ni amɛya nɔ amɛye amɛbua dɔŋŋ, eje amɛtsine akɛ amɛaafi Afrika ni mli miigbala lɛ sɛɛ. . . . Amɛshwaa Afrikabii lɛ yɛ amɛgbɛjianɔtoi ni ehiii, kɛ amɛhiɛnyiɛlɔi lɛ ahiɛjoomɔ, kɛ béi ni sɛɛ efooo lɛ ahewɔ.”

Biblia lɛ gba efɔ shi akɛ be ko baaba ni hɔmɔ baaba “hei sɔrɔtoi fɛɛ.” Nɛkɛ hɔmɔ nɛɛ, kɛ nibii krokomɛi ni baafata he kɛba, tamɔ tai, shikpɔŋ hosomɔi, kɛ tsɛŋemɔ helai lɛ tsɔɔ akɛ Nyɔŋmɔ Maŋtsɛyeli lɛ eshɛ shi eta. (Luka 21:11, 31) Biblia lɛ yaa nɔ etsɔɔ hu akɛ yɛ nɛkɛ Nyɔŋmɔ mlihilɛ Maŋtsɛyeli nɛɛ shishi lɛ, niyenii babaoo baahi shi aha gbɔmɛi adesai fɛɛ. Lalatsɛ lɛ ŋma akɛ: “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”​—Lala 72:⁠16.