Jwetri ni Aŋɔtee Taomɔ

Yɛ 1848 mli lɛ ayana shika tsuru yɛ Sutter’s Mill yɛ California U.S.A. Beni shɛɔ 1849 lɛ, no mli lɛ mɛi akpei abɔ miiya nakai kpokpaa lɛ nɔ kɛ hiɛnɔkamɔ akɛ amɛbaana shika babaoo oya nɔŋŋ, ni no baje hiŋmɛitsuu ni akɛdi shika tsuru sɛɛ fe bei fɛɛ yɛ United States yinɔsane mli lɛ shishi. Beni shɛɔ afi pɛ lɛ, no mli lɛ lɛji adaamɔ he ni bɛŋkɛ jɛmɛ fe fɛɛ, ni ji San Francisco, lɛ bada kɛjɛ maŋ bibioo ni ebatsɔ maŋtiase kɛ emlibii aaashɛ mɛi 25,000. Trukaa ninamɔ he gbɛkpamɔ lɛ bafee lakamɔ nɔ ni he wa waa diɛŋtsɛ.

Blema Israel Maŋtsɛ Salomo le bɔ ni gbɔmɛi kɛ tɔlɛ kɛ deŋmegbomɔ tsaa shi kɛtaoɔ jwetri ni aŋɔtee lɛ, ni ewie enɛ he beni eŋma akɛ: “Hɛɛ, kɛ obɔlɔ otsɛ sɛɛyoomɔ, ni owo ogbee nɔ oha sane shishinumɔ, kɛji otao esɛɛ gbɛ tamɔ jwiɛtɛi, ni otao tamɔ jwetrii ni aŋɔtee lɛ: No dani ooonu Yehowa gbeyeishemɔ shishi, ni ooona Nyɔŋmɔ he nilee.”​—Abɛi 2:3-5.

Obaanyɛ okɛ shika kɛ Jwiɛtɛi afee nibii babaoo, shi obaanyɛ okɛ sane shishiumɔ kɛ sɛɛyoomɔ afee babaoo fe nakai. Enɛɛmɛi baaye abua bo ni ofee yiŋkpɛi ni ja, okɛna naagbai anaa, oye omanye yɛ gbalashihilɛ mli, ni ona miishɛɛ (Abɛi 2:​11, 12) Nakai nɔŋŋ hu anɔkwa nilee kɛ sɛɛyoomɔ baaye abua bo ni ole o-Bɔlɔ lɛ, ni-onu eyiŋtoi ashishi, ni obo lɛ toi ni osa ehiɛ. Shika tsuru nyɛŋ eha bo nɛkɛ nibii nɛɛ eko kwraa.

Biblia lɛ wiemɔi lɛ ji anɔkwale akɛ: “Nilee tamɔ teemɔ he tamɔ bɔ ni shika yi teemɔ he lɛ, shi sɛɛnamɔ ni yɔɔ nilee he nɛ: “no ji, nilee hereɔ’ mɔ nɔ̃ ni eji lɛ yiwala.” (Jajelɔ 7:​12, New International Verson) Eyɛ mli akɛ mɛi pii laa trukaa ninamɔ moŋ, shi kwɛ bɔ ni nilee babaoo yɔɔ mli akɛ agbele Biblia lɛ ni atao sɛɛyoomɔ, sane shishinumɔ, ŋaalee, kɛ nilee, ni ji anɔkwa ninamɔ lɛ moŋ.