Maŋtsɛyeli Jajelɔi Bɔ Amaniɛ

Oketeke he Nitsulɔ Obalanyo ko Kase Anɔkwale Lɛ

KƐJI mɔ ko tsui tsirɛɔ lɛ kɛyaa jalɛ nifeemɔ he lɛ, no lɛ, Yehowa Nyɔŋmɔ kɛ Kristo Yesu kɛ ŋwɛibɔfoi lɛ baatsu nii koni yɛ naagbee lɛ, anyɛ akɛ Maŋtsɛyeli lɛ he sanekpakpa lɛ ashɛ nɛkɛ gbɔmɔ ni tamɔ gwantɛŋ nɛɛ ŋɔɔ. Yɛ be ni sa mli lɛ, nakai mɔ lɛ baaba Yesu ninejurɔ nɔ, ni ji eduromɔ-namɔ mli. (Mateo 25:​31-33) Enɛ bafee anɔkwale yɛ mɔ ko ni ji oketeke he nitsulɔ ekaalɔ ko gbɛfaŋ, yɛ Austria, beni ebale anɔkwale lɛ kɛtsɔ gbɛ sɔrɔto ko kwraa nɔ lɛ.

Nɛkɛ obalanyo nɛɛ hiɛtserɛjiemɔ mli fa ko ni yɔɔ miishɛɛ fe fɛɛ ji oketeke yitso lɛ mli tamɔ kɛyaa kɛbaa, yɛ oketeke nitsumɔ nɔkwɛlɔi lɛ agbɛŋmɛɛ naa. Ekɛ video mfoniri-shamɔ tsɔne shaa egbɛfaa lɛ eko fɛɛ eko, kɛkɛ lɛ kɛ eba shia lɛ esaa ekwɛ ekoŋŋ. Yɛ egbɛfaa lɛ eko mli kɛjɛ Vienna kɛtee Salzburg lɛ, no mli lɛ oketeke kudɔlɔ lɛ, Yehowa Odasefonyo ni. Ekɛ hegbɛ lɛ tsu nii ni ekɛ oketeke he nitsulɔ nɛɛ wie Maŋtsɛyeli sane lɛ he. Klɛŋklɛŋ kwraa lɛ obalanyo lɛ hiɛ fee lɛ yaa beni enu ni oketeke kudɔlɔ lɛ miiwie Nyɔŋmɔ kɛ Biblia lɛ he lɛ, shi yɛ gbɛfaa lɛ mli fɛɛ lɛ, eha ejwɛŋmɔ hi nibii ni ekwɛɔ lɛ nɔ titri fe nɔ ni oketeke kudɔlɔ lɛ kɛɔ lɛ lɛ.

Ni ebashɛ shia ekoŋŋ lɛɛ nɛkɛ obalanyo ni yɔɔ ekaa waa nɛɛ kwɛ video mfoniri ni esha lɛ, jeee shikome, shi shii nyɔŋma, ejaakɛ ena nɛkɛ egbɛfaa nɛɛ he miishɛɛ waa. Akɛni emɔmɔ gbɛɛmɔi lɛ hu hewɔ lɛ, enu wiemɔ ni Odasefonyo lɛ kɛ lɛ wie lɛ shii abɔ. Babaoo ni ekwɛɔ video lɛ, babaoo ni ebaleɔ nɔ ni nuu lɛ kɛ lɛ wie lɛ ji no. No hewɔ lɛ ebabɔi he susumɔ agbɛnɛ, kɛkɛ ni yɛ naagbee lɛ ebana saji ni yɔɔ miishɛɛ ni ajɛ Biblia lɛ mli akɛ lɛ gba lɛ he miishɛɛ. Eesumɔ ni ele nibii babaoo efata he.

Ekaiɔ oketeke kudɔlɔ lɛ gbɛi, ni ele hu akɛ eyɛ Vienna maŋ lɛ he ko. No hewɔ lɛ etee post ɔfis ni ebɔi tɛlifon nɔmbai sɔrɔtoi lɛ eko fɛɛ eko tswaa, yɛ gbɛi ni yɔɔ tɛlifon nɔmbai awolo lɛ mli lɛ naa. Sane ni ebiɔ mɛi ni hereɔ tɛlifon lɛ nɔ lɛ ji akɛ: “Ani oketeke kudɔlɔ ji bo?” Kɛ aha hetoo dabi lɛ, no lɛ esaa etswaa nɔmba kroko hu. Yɛ naagbee lɛ, enine shɛ oketeke kudɔlɔ lɛ nɔ. Egba lɛ esane lɛ, ni ekɛɛ lɛ akɛ eyɛ Biblia mli sane ni enu yɛ video lɛ nɔ lɛ he miishɛɛ waa.

Odasefonyo lɛ to gbɛjianɔ kɛtsɔ nitsumɔ he nine lɛ nɔ koni mɔ ko ni bɛŋkɛ nɛkɛ obalanyo nɛɛ aya eŋɔɔ ni eyasara lɛ. Ebalɛ akɛ Odasefonyo ko yɛ asafo ni yɔɔ nakai maŋ lɛ mli lɛ mli ni lɛ hu oketeke kudɔlɔ ji lɛ. Nɛkɛ oketeke kudɔlɔ ni ji enyɔ nɛɛ tee obalanyo ni yɔɔ oketeke he miishɛɛ nɛɛ ŋɔɔ, ni amɛje Biblia mli nikasemɔ shishi. Abaptisi obalanyo nɛɛ yɛ 1991 latsaa be mli.

Yehowa, mɔ ni taoɔ tsuii fɛɛ amli lɛ, nyɛ ena akɛ nɛkɛ gbɔmɔ nɛɛ yɛ anɔkwa suɔmɔ kɛha jalɛ nifeemɔ. No hewɔ lɛ, eha ebana ele Biblia mli anɔkwale lɛ​—ekɔɔɔ he eko akɛ kɛtsɔ gbɛ ni yɔɔ sɔrɔto kwraa nɔ.​—1 Kronika 28:9; Yohane 10:⁠27.

[He ni Mfoniri ni yɔɔ baafa 9 lɛ Jɛ]

Courtesy of the Austrian Railways