“Ŋwɛi Okadi Ko”

BLEMA lalafoo wiemɔ ko kɛɔ akɛ: “Kɛ ŋwɛi tsu gbɛkɛ lɛ, amlakui amiishɛɛ sane ni, Kɛ ŋwɛi tsu leebi lɛ, amlakui kɛ kɔkɔbɔɔ tsuɔ nii.” Ŋmɛnɛ, atsɔɔ ŋulamii bibii ni gbɔmɛi efee, nɔ ko dɔlɛ loo ejɔle he nikasemɔ ni akɛ kompiuta feɔ, rada loo tsɔne ni kɛ kɔɔyɔŋ hewalɛ tsuɔ nii ni haa akɛ mɔ ko yeɔ sharamɔ, kɛ agbɛnɛ jeŋ nilee nɔ, akɛtsɔɔ bɔ ni kɔɔyɔɔ lɛ mli baatsake aha. Ni ŋmɛnɛŋmɛnɛ beaŋ saji ni atsɔɔ hiɛ agbaa lɛ yaa nɔ ekɛ nɛkɛ lalafoo wiemɔ ni atsi ta amrɔ nɛɛ kpaa gbee.

Be ko lɛ, Yesu Kristo jamɔŋ henyɛlɔi lɛ bi ni eha amɛ “ŋwɛi okadi ko,” ni ji nɔ ko ni ekaaa ni ajieɔ atsɔɔ ni ekɛtsɔɔ akɛ lɛ ji Mesia lɛ. Ekɛɛ akɛ: “Gbɛkɛ mli lɛ nyɛkɛɔ akɛ: ‘Jeŋ baatse, ejaakɛ ŋwɛi etsu.’ Ni leebi lɛ nyɛkɛɔ akɛ: ‘Ŋmɛnɛ nugbɔ baanɛ; ejaakɛ ŋwɛi etsu ni ehiɛ eha.’ Osatofoi, nyɛle ŋwɛi hiɛ nibii amlibuu, shi yinɔi lɛ ahe okadii lɛ nyɛnyɛɛɛ nyɛbu lo? Yinɔbii fɔji kɛ gbalafitelɔi miitao okadi, shi ahaŋ amɛ okadi ko, akɛ ja gbalɔ Yona okadi lɛ.”​—Mateo 16:​1-4.

Yesu henyɛlɔi lɛ baanyɛ atsɔɔ bɔ ni kɔɔyɔɔ lɛ mli baatsake aha moŋ shi amɛnyɛɛɛ amɛnu mumɔŋ saji ashishi. Akɛ nɔkwɛmɔ nɔ lɛ, “gbalɔ Yona okadi lɛ” hu? Be mli ni eye aaafee gbii etɛ yɛ loo agbo ko musu mli lɛ sɛɛ lɛ, Nyɔŋmɔ gbalɔ Yona shiɛ yɛ Ninive, ni no hewɔ lɛ ebatsɔ okadi kɛha nakai Ashur maŋtiase lɛ. Yesu yinɔbii lɛ na “gbalɔ Yona okadi lɛ,” beni Kristo ye gbii etɛ lɛ mli fai komɛi yɛ gbonyobu mli ni atee lɛ shi lɛ. Ekaselɔi lɛ jaje nɔ ni ba nɛɛ he odaseyeli amɛtsɔɔ, ni no hewɔ lɛ Yesu batsɔ okadi kɛha nakai yinɔbii lɛ.​—Mateo 12:​39-41.

Yɛ be kroko mli lɛ Yesu kaselɔi lɛ bi ni eha amɛ ‘beni eba’ e-Maŋtsɛyeli hewalɛ mli yɛ wɔsɛɛ be mli lɛ he “okadi.” Yɛ hetoohamɔ mli lɛ, eha amɛ okadi ni nibii sɔrɔtoi yɔɔ mli, ni nɔ ni fata he ji tawuu ni eko kɛ lɛ yeee egbɔ, shikpɔŋ hosomɔi kpeteŋkpelei, hɔmɔ, kɛ agbɛnɛ Nyɔŋmɔ ŋwɛi Maŋtsɛyeli ni ato ama shi lɛ he shiɛmɔ yɛ jeŋ fɛɛ.​—Mateo 24:​3-14.

Ani oyɔseɔ ba ni Kristo eba akɛ ŋwɛi Maŋtsɛ ni anaaa lɛ lɛ he okadi lɛ? Nakai okadi lɛ fai sɔrɔtoi lɛ miiba mli yɛ nɛkɛ yinɔ nɛɛ nɔ. (Mateo 24:34) Ni wɔsɛɛ be hu? Jeee akɛ Biblia lɛ jieɔ lɛ kpo etsɔɔ akɛ nibii agbɛjianɔtoo nɛɛ naagbee lɛ ebɛŋkɛ kɛkɛ, shi moŋ etsɔɔ hiɛ egbaa Nyɔŋmɔ gbi hee ni ewo shi yɛ he ni eshwɛ fioo ebaafee faŋŋ kɛha adesai lɛ he sane.​—2 Petro 3:⁠13.