Sanebimɔi Ni Jɛ Kanelɔi Adɛŋ

Akɛni Kristofoi kɛ shika etaaa abasa hewɔ lɛ, ani amɛaanyɛ amɛŋɔ tikitii loo ni amɛkɛ amɛhe awo nɔmbai ni ahalaa trukaa yɛ pii amli lɛ mli bɔni afee ni amɛye juromɔ nii ko?

Enɛ ji sanebimɔ ko ni ete shi be kɛ beaŋ, ni no hewɔ lɛ awie he momo yɛ wɔwoji lɛ amli. Wɔfee wɔwoji lɛ ahe index yɛ wiemɔi komɛi amli, taakɛ Watch Tower Publications Index 1930-1985 lɛ nɛkɛ (kɛ eko ni tamɔ nakai hu ni ato naa kɛjɛ 1986-1990). Kɛ Kristofonyo ko yɛ index ni tamɔ nakai yɛ ewiemɔ mli lɛ, belɛ enɛɛmɛi ahe baaba sɛɛnamɔ waa yɛ hetoi ni sa lɛ taomɔ mli amrɔ nɔŋŋ.

Sane ni abi yɛ yiteŋgbɛ nɛɛ ji ehe nɔkwɛmɔ nɔ ko. Kɛ okwɛ lndex kɛha 1930-1985 lɛ mli yɛ yitso ni ji ”Questions From Readers” lɛ shishi lɛ, obaana yitso fioo ko ni kɛɛ” ‘drawings,’ may christian accept ticket for?’ Agbala nikanelɔ lɛ jwɛŋmɔ kɛtee fa ko ni ji “Questions From Readers” ni yɔɔ February 15, 1973, Watchtower lɛ, baafa 127 lɛ nɔ.a Odasefoi babaoo yɛ The Watchtower kɛha 1973 wolo kpo (loo ekomekomei ni yɔɔ) lɛ eko, aloo akɛ obaana yɛ Maŋtsɛyeli Asai babaoo awoji atoohei lɛ amli.

Saji ni aŋmala yɛ afi 1973 nɔ lɛ mli lɛ tsɔɔ mli akɛ Kristofoi kpooɔ asɔshwɛmɔ fɛɛ asɔshwɛmɔ he nifeemɔ nii loo nɔmbai ni ahalaa trukaa yɛ pii ateŋ ni tsɔɔ nihemɔ he shade (tamɔ raffle tikitii) aloo ni akɛ shika aaahe shade he nɔ ko ni akɛye juromɔ nii ko lɛ yɛ gbɛ ni ja nɔ. Kɛ wɔɔfo lɛ kuku lɛ, wɔkpooɔ asɔshwɛmɔ, ni yɛ anɔkwale mli lɛ eji amimyeli nifeemɔ nii lɛ.​—1 Korintobii 5:​11; 6:​10; Efesobii 4:​19; 5:​3, 5.

Shi ekolɛ shwapo ko loo guɔyeli nitsumɔ he ko kɛ nɔmbai ni ahalaa trukaa yɛ pii ateŋ lɛ baatsu nii akɛ gbɛ ni etsɔɔ nɔ ekɛtswaa nihɔɔmɔ lɛ he adafi. Nɔ ni mɔ aaafee nɔŋŋ kɛkɛ ji ni ekɛ egbɛi ayaha aloo ni ekɛ wolo kuku ko loo tikiti ko ayaha ni jeee nɔ ko etee hemɔ. Nɔmbai ni ahalaa trukaa yɛ pii ateŋ lɛ fata nihɔɔmɔ he adafitswaa he gbɛjianɔtoo lɛ he; eji gbɛ ko ni ato he gbɛjianɔ akɛ shishiumɔ ko bɛ mli, koni atsɔ no nɔ akɛna mɔ ni akɛ juromɔ nɔ loo juromɔ nibii lɛ baaha lɛ. Kristofoi komɛi aaanu he akɛ amɛaanyɛ amɛŋɔ juromɔ nii ni anaa kɛjɛɔ nɔmbai ni ahalaa trukaa yɛ pii ateŋ lɛ ni asɔshwɛmɔ he nifeemɔ nii bɛ mli, taakɛ bɔ ni amɛaanyɛ amɛŋɔ nibii lɛ eko yaka loo nikeenii komɛi ni guɔyeli nitsumɔ he ko loo shwapo ko kɛaatsu nii akɛ enihɔɔmɔ he adafitswaa lɛ he gbɛjianɔtoo lɛ ta lɛ.

Kɛlɛ, Kristofoi komɛi baakwa nɔ ko ni tamɔ enɛ ni amɛsumɔɔɔ akɛ amɛaatɔtɔ mɛi krokomɛi anaji loo ni amɛaafutu amɛyiŋ kɛ agbɛnɛ hu ni amɛtsi amɛhe kwraa kɛjɛ nɔ ko ni baaha amɛkɛ amɛhe afɔ nɔ ni afɔɔ lɛ tsɛmɔ akɛ Shade Gbɔmɔ lɛ nɔ. Taakɛ Yesaia 65:11 tsɔɔ lɛ, Nyɔŋmɔ sɔɔlɔi kɛ “shade wɔŋ” kɛ “shɛɛ mli wɔŋ” lɛ bɛ tsakpaa ko. Bɔ ni amɛaanu he hu ji akɛ amɛsumɔɔɔ ni amɛfeɔ adafi ko ni atswaa atsɔɔ maŋ fɛɛ ni aakpa mɛi ni yeɔ lɛ agbɛ ni amɛkɛ amɛhe awo mli lɛ fa. Eka shi faŋŋ akɛ esaaa akɛ mɛi ni nuɔ he nɛkɛ lɛ wieɔ shiɔ Kristofonyo loo Kristofoi ni amɛhenilee ŋmɛɔ amɛ gbɛ ni amɛkɛ amɛhe awo nɔmbai ni ahalaa trukaa yɛ pii ateŋ lɛ mli lɛ.​—Okɛto Romabii 14:1-4 he.

[Shishigbɛ niŋmai]