Ewuu Kɛha e-Hemɔkɛyeli

AFII etɛ ni eho nɛ, ni opireshɛn ko ni he hiaa waa he bahia Caridad Bazán Listán, Yehowa Odasefoi lɛ ateŋ mɔ kome yɛ Cádiz, yɛ Spain. Nɔ ko ni waa tamɔ tɛ yɛ shamɔ-tɔ lɛ mli eha atridii miimɔ lɛ ni eefite ela hu. Beni akɛ lɛ yafɔ maŋ lɛ mli helatsamɔ he lɛ, etsɔɔ nɔ hewɔ ni ekpooɔ la ni aaagbala awo emli ni damɔ Biblia lɛ nɔ lɛ mli etsɔɔ amɛ. Datrɛfoi lɛ kpɛlɛ nɔ akɛ amɛbaafee opireshɛn lɛ ni la bɛ mli. Shi beni eshwɛ fioo ni akɛ lɛ aaaya tsu ni afeɔ opireshɛn lɛ yɛ mli lɛ, datrɛfoi lɛ kɛɛ lɛ akɛ ekɛ ewaonaa gbɛi awo wolo ko shishi. Wolo lɛ tsɔɔ akɛ amɛmiisumɔ ni amɛkɛ bulɛ aha eyiŋkpɛɛ ni kɔɔ la he lɛ, shi kɛ hiamɔ ko te shi lɛ, amɛbaasumɔ ni eŋmɛ amɛ gbɛ ni amɛkɛ helatsamɔ ni he baahia lɛ aha lɛ.

Asafoŋ onukpa ko kɛ nyɛmiyoo nɛɛ binuu, ni lɛ hu eji Odasefonyo ni yɔɔ helatsamɔ he lɛ yɛ nakai be lɛ mli lɛ wo Caridad ŋaa akɛ oshara yɛ wolo ni tamɔ nɛkɛ ni ekɛ ewaonaa gbɛi aaawo shishi lɛ mli. Ewaonaa gbɛi lɛ baaŋmɛ datrɛfoi lɛ agbɛ ni amɛkɛ la aha lɛ kɛ oshara ba ewala he. Beni tsofa-feemɔ he nitsulɔi lɛ ba koni akɛ lɛ aya tsu ni afeɔ opireshɛn lɛ yɛ mli lɛ, etsɔɔ mli akɛ ekɛ ewaonaa gbɛi woŋ wolo lɛ shishi. Aku sɛɛ akɛ lɛ tee etsu lɛ mli oya ni akɛ nɔnyɛɛ ni naa wa ba enɔ koni etsake ejwɛŋmɔ.

Beni amɛkɛ lɛ egba sane shii abɔ lɛ, amɛkpɛ amɛyiŋ akɛ amɛbaatsɛ kojolɔ ni yɔɔ tsofa-feemɔ he nilee lɛ koni enyɛ etsɔ eyiŋ, shi nɔ ko jɛɛɛ mli baaa. Caridad tsɔɔ mli akɛ enuɔ he akɛ ebaaye fɔ yɛ Nyɔŋmɔ hiɛ kɛ eŋmɛ amɛ gbɛ ni amɛkɛ la ha lɛ. Etsɔɔ mli akɛ, yɛ Mose Mla lɛ shishi lɛ, kɛ amɔ yoo ni akɛ lɛ wɔ ekaa naa lɛ, abuŋ lɛ fɔ kɛji akɛ ete shi ewo ni ebolɔ waa koni aye abua lɛ. (5 Mose 22:​23-27) Ekɛɛ: “Datrɛfoi lɛ miiku amɛhiɛ kɛmiishwie misuɔmɔnaa nii anɔ, ni amɛmiika koni amɛfite mihenilee, no hewɔ lɛ esa akɛ mate shi mashi tamɔ akɛ amɛmiimɔ mi ekaa naa koni amɛkɛ mi awɔ.”

Ŋmɛlɛtswai babaoo ho, kɛkɛ ni yɛ naagbee lɛ datrɛfoi lɛ kpɛlɛ nɔ akɛ amɛbaafee lɛ opireshɛn ni la bɛ mli. Caridad bi gbɛ koni esɔle eha Yehowa yɛ opireshɛn tsu lɛ mli. Efee nakai, ni opireshɛn lɛ ye omanye.

Kɛlɛ, Caridad hela lɛ mli bawo wu kwraa yɛ no sɛɛ, ni datrɛfoi lɛ kpɛ amɛyiŋ akɛ amɛbaaku amɛhiɛ amɛshwie esuɔmɔnaa nii lɛ nɔ ni amɛnyɛ enɔ amɛha lɛ la. Kɛkɛ ni datrɛfonyo ko kɛ helatsɛmɛi akwɛlɔ ko saa amɛhe koni amɛha lɛ la. Yɛ bɔ ni egbɔjɔ eha lɛ fɛɛ sɛɛ lɛ, Caridad kɛ ehewalɛ fɛɛ te shi wo enɛ. Enyɛ ekɛ enyanyɔji kɔ̃ ododobɛŋ ni la lɛ baatsɔ mli lɛ. Yɛ naagbee lɛ datrɛfonyo lɛ hiɛ gbo yɛ nɔ ni amɛfeɔ lɛ he aahu hewɔ lɛ ekpa kwraa. Ekɛɛ: “Minyɛŋ maya nɔ yɛ shihilɛ ni tamɔ nɛkɛ mli. Miŋmɛɛ he!”

Caridad je nakai haomɔ lɛ mli, ni ehe wa lɛ ni nɔ ko gbaaa enaa dɔŋŋ. Datrɛfoi lɛ kɛ helatsɛmɛi akwɛlɔi lɛ fɛɛ anaa kpɛ amɛhe waa yɛ ehemɔkɛyeli kɛ ekãa ni eyɔɔ lɛ hewɔ. Enɛɛmɛi fɛɛ ba beni Caridad eye afii 94.