Akɛ “Wala Akekre” Wo Lɛ Nyɔmɔ

AKƐƐ bɔfo Yohane ni eŋma eyaha Smirna asafo lɛ bɔfo lɛ akɛ: “Feemɔ anɔkwafo kɛyashi gbele mli, ni mahao wala akekre lɛ.” (Kpojiemɔ 2:​8, 10) No hewɔ lɛ, awerɛho kɛ miishɛɛ sane fɛɛ ji adafi ni atswaa nɛɛ akɛ, Frederick William Franz, Watch Tower Bible and Tract Society of Pennsylvania, Watchtower Bible and Tract Society of New York, lnc., kɛ agbɛnɛ teokrase gbɛjianɔtoi krokomɛi asɛinɔtalɔ lɛ, gbe eshikpɔŋ nɔ nitsumɔ naa yɛ December 22, 1992 leebi mli.

Eji adafitswaa ni woɔ mɔ awerɛho ejaakɛ egbaa wɔ Yehowa tsulɔ anɔkwafo ni ekaaa ni asumɔɔ lɛ waa lɛ shikpɔŋ nɔ nitsumɔ naagbee. Ni kɛlɛ, eji miishɛɛ adafitswaa hu, ejaakɛ wiemɔi ni yɔɔ Kpojiemɔ 14: 13 lɛ kɔɔ wɔ Nyɛminuu Franz ni wɔsumɔɔ lɛ waa lɛ he akɛ: “Ajɔɔ gbohii lɛ ni gboiɔ yɛ Nuŋtsɔ lɛ mli lɛ, kɛjɛ ŋmɛnɛ nɔ kɛyaa nɛɛ. Hɛɛ, mumɔ lɛ kɛɛ, koni amɛjɔɔ amɛhe kɛjɛ amɛhaomɔi lɛ amli; shi amɛnitsumɔi lɛ nyiɛɔ amɛsɛɛ.” Nyɛminuu Franz hiɛ ka shi, eji heshibalɔ, nitsulɔ ni tsuɔ nii waa kɛ sɔɔlɔ ni woɔ yibii ni Yehowa Nyɔŋmɔ kɛ lɛ tsu nii babaoo akɛ “tsulɔ anɔkwafo kɛ nilelɔ” kuu lɛ mli nyo, koni eye ebua ni akɛ mumɔŋ niyenii aha “tsuji” lɛ kɛ amɛhefatalɔi lɛ.​—Mateo 24:​45-47.

Afɔ Nyɛminuu Franz yɛ September 12, 1893, yɛ Covington, Kentucky. Ebale anɔkwale lɛ kɛtsɔ enyɛmi nukpa nɔ. No mli lɛ eeya Skul Wulu loo University yɛ Cincinnati, ni eesaa ehe koni etsɔ Presbyterian osɔfo. Ni eeefee nakai moŋ lɛ, etsi ehe kɛjɛ Presbyterian Sɔlemɔ lɛ he ni ekɛ ehe yabɔ Biblia Kasalɔi, taakɛ atsɛɔ Yehowa Odasefoi yɛ nakai be lɛ mli lɛ ahe. Abaptisi lɛ yɛ November 30, 1913, kɛkɛ ni eshi univɛsiti lɛ yɛ afi ni nyiɛ sɛɛ lɛ mli ni ekɛ ehe wo gbɛgbamɔ sɔɔmɔ lɛ mli. Ebatsɔ Brooklyn Betel weku lɛ mlinyo yɛ June 1, 1920. Etsɛɛɛ ni akɛ gbɛgbalɔi lɛ anɔkwɛmɔ nitsumɔ wo edɛŋ, ni ajie lɛ kɛtee woji aŋmalamɔ nitsumɔ he lɛ yɛ 1926, ni esɔmɔ yɛ jɛmɛ akɛ mɔ ni atsɔ enɔ aŋmala woji sɔrɔtoi babaoo. Ebatsɔ Buu Mɔɔ Asafo lɛ kɛ nitsumɔ gbɛjianɔtoi krokomɛi asɛinɔtalɔ sɛɛyelɔ yɛ 1945. Beni Nathan H . Knorr, ni ji sɛinɔtalɔ yɛ nakai beaŋ lɛ gbo yɛ 1977 mli lɛ, ebatsɔ Buu Mɔɔ Asafo lɛ sɛinɔtalɔ. Etee nɔ esɔmɔ yɛ gbɛhe he nɛɛ mli aahu kɛbashi egbele be mli. Nyɛminuu Franz na bɔ ni Yehowa Odasefoi ayifalɛ tee hiɛ kɛjɛ akpei fioo kɛbashɛ aaafee akpekpei ejwɛ kɛ fa lɛ yɛ ewala be mli. Ena sɔɔmɔ hegbɛi babaoo mli gbɛfaŋnɔ, ni nɔ ni fata enɛɛmɛi ahe ji wiemɔi ni eha yɛ majimaji ateŋ kpeei ashishi kɛ nitsumɔ he niji kɛ maŋsɛɛ sanekpakpa shiɛlɔi ashihilɛ hei ni eyasara yɛ je lɛŋ hei sɔrɔtoi babaoo. Ewala shihilɛ he sane yɛ The Watchtower ni je kpo yɛ May 1, 1987, lɛ mli.

Aha efuu kɛ eyara-feemɔ he wiemɔ yɛ Brooklyn Betel Maŋtsɛyeli Asa lɛ nɔ, yɛ December 28, 1992. Nyɛminuu Albert D. Schroeder, ni ji Nɔyeli Kuu lɛ mlinyo lɛ ha miishɛɛ wiemɔ ko ni tswaa mɔ maa shi yɛ mumɔŋ. Atsɔ telifon kpaa nɔ aha Betel wekui ni yɔɔ Watchtower Farms, Patterson, Mountain Farm, kɛ Kingdom Farm, kɛ agbɛnɛ Betel weku ni yɔɔ canada nitsumɔ he nine lɛ nu eyara-feemɔ wiemɔ lɛ.

Nyɛmimɛi fɛɛ baashwe Nyɛminuu Franz waa, shi titri lɛ, mɛi ni kɛ lɛ tsu nii yɛ he kome lɛ. Enuɔ mɔ shishi, ewoɔ mɔ hewalɛ, ni etoɔ etsui shi ehaa mɔ fɛɛ mɔ ni ekɛ lɛ sɔmɔ ni ekɛ lɛ fa gbɛ lɛ. Yɛ anɔkwale mli lɛ, nanemɛi heyelilɔi lɛ hereɔ lɛ nɔ yɛ mumɔ ni yɔɔ Hebribii 13:7 lɛ naa: “Nyɛkaia nyɛtsɔɔlɔi, mɛi ni wie Nyɔŋmɔ wiemɔ lɛ tsɔɔ nyɛ lɛ; nyɛkwɛa amɛjeŋba lɛ naagbee, ni nyɛkasea amɛhemɔkɛyeli lɛ.”

Ahala Nyɛminuu Milton G. Henschel, yɛ December 30, 1992, akɛ Asafo lɛ sɛinɔtalɔ ni gbeɔ yi feɔ enumɔ, ni baaye Nyɛminuu Franz sɛɛ.

[Mfonirii ni yɔɔ baafa 30,31]

Frederick W. Franz yɛ 1913

At the Society’s Myrtle Avenue factory in 1920

Ekɛ Nufhon H. Knorr yɛ ) Yonkee Srodium yɛ 1953