Ená Jweremɔ Nɔ Lɛ

“NYƐ nyɛsa shidaa,” nɛkɛ, Kiyoe, ni ‘miiya onukpai anɔtsamɔ skul lɛ ŋma Buu Muu Asafo lɛ nitsumɔ he nine ni yɔɔ Japan lɛ. Mɛni edaa amɛ shi yɛ he lɛ? Nyɛsɛɛ nɛɛ Kiyoe ye maŋ niŋmaa akaŋshii, ni Japan Traffic Safety Association lɛ kwɛ nɔ lɛ mli jweremɔ nɔ wulu fe fɛɛ lɛ. Nɔ ni fata nɛkɛ jweremɔ nɔ wulu ni aha nɛɛ he ji gbɛfaa kɛmiiya Sweden.

Kiyoe ŋma wolo ni ekɛtsɔɔ hiɛsɔɔ ni eyɔɔ kɛha woji kpakpai babaoo ni Buu Mɔɔ Biblia kɛ Woji Tɛtrɛbii Asafo lɛ eŋmala, ni enuɔ he akɛ eye ebua lɛ waa ni eye omanye lɛ he. Yɛ akaŋshii nɛɛ sɛɛ lɛ, eyadamɔ eskul lɛ najiaŋ shii abɔ yɛ wiemɔ kɛ niŋmaa akaŋshii krokomɛi amli. Ewie akɛ: “Yɛ akaŋshii nɛɛ pii amli lɛ, ahaa saneyitso ko, ni nikaselɔi lɛ yataoɔ nibii amli yɛ woji atoohei kɛhaa amɛniŋmaai lɛ. Shi, mi lɛ migbaaa mihe naa babaoo tamɔ amɛfeɔ lɛ. Minaa saji kpakpai kɛjɛɔ wɔ woji atoohe lɛ mli woji lɛ amli yɛ shia!” Etee nɔ akɛ: “Bɔ fɛɛ bɔ ni saneyitso lɛ ji, kɛ eji gbɔlɛ mli naagbai jio, nibii ni ebɔle wɔhe kɛkpe, majimaji ateŋ sharamɔ aloo mɔ diɛŋtsɛ hiɛyaa he jio, bei pii lɛ asusu nɛkɛ saji nɛɛ ahe jogbaŋŋ yɛ Buu-Mɔɔ kɛ Awake! woji tɛtrɛbii lɛ amli.

Shi kɛlɛ, jeee woji lɛ kɛkɛ ji nɔ ni eye ebua Kiyoe. Ewie hu akɛ nikasemɔ ni ana kɛtsɔ Yehowa Odasefoi anitsɔɔmɔ gbɛjianɔtoo lɛ anɔ lɛ hu ye ebua lɛ ni eha enikanemɔ kɛ eniŋmaa tee hiɛ waa, ni no ha ebɔ mɔdɛŋ jogbaŋŋ yɛ akaŋshii lɛ amli lɛ. Ekpɛlɛ nɔ akɛ: “Be ko lɛ, kulɛ miitao ni mana univɛsiti tsɔsemɔ. Shi nɛgbɛ manyɛ mana tsɔsemɔ ni tamɔ nɛkɛ yɛ?” Amrɔ nɛɛ ehiɛ ka nɔ akɛ ekɛ ebe fɛɛ baatsu nii ni ekɛye ebua mɛi krokomɛi ni tsɔsemɔ ni enine eshɛ nɔ lɛ he aba sɛɛnamɔ aha amɛ. Eyɛ mli akɛ ena niŋmaa mli jweremɔ nɔ lɛ he miishɛɛ moŋ, shi Kiyoe kɛ etsui efɔ naanɔ wala jweremɔ nɔ ni eeena lɛ nɔ.​—Okɛto Filipibii 3:14 he.