Baptisimɔ ‘Awo Gbɛi Amli’
BLEMA je lɛŋ papyrus woji ni ana yɛ Mizraim shia mli yɛ afii oha nɛɛ shishijee mli lɛ kasemɔ tsɔɔ Kristofoi a-Hela Ŋmalɛi lɛ amli jogbaŋŋ yɛ be kɛ bei amli. Yɛ mɛɛ gbɛ nɔ? Kɛ wɔsusu gbɛ ni atsɔ nɔ akɛ wiemɔi komɛi tsu nii aha lɛ he lɛ, ekudɔɔ wɔ kɛyaa wiemɔi nɛɛ ni yɔɔ Ŋmalɛi lɛ amli lɛ ashishinumɔ ni ja jogbaŋŋ he.
Nɔkwɛmɔ nɔ kome ji bɔ ni Yesu kɛ wiemɔ, yɛ . . . gbɛi amli” tsu nii beni efa ekaselɔi lɛ dani ekwɔ kɛtee ŋwɛi akɛ: “No hewɔ lɛ nyɛyaa ni nyɛfea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli” lɛ. Mɛni Yesu tsɔɔ lɛ?—Mateo 28:19.
Woloŋlelɔi ena akɛ yɛ jeŋ niŋmaai amli lɛ, akɛ wiemɔ, “yɛ . . . gbɛi amli,” loo “awo . . . gbɛi amli” (Kingdom Interlinear) tsuɔ nii akɛtoɔ shika ni “awoɔ akɛwoɔ mɔ fɛɛ mɔ shika mli” lɛ he. Nyɔŋmɔ jamɔ he nilelɔ Dr. G. Adolf Deissmann he ye akɛ yɛ odaseyeli ni jɛ papyri lɛ mli hewɔ lɛ, “jwɛŋmɔ ni yɔɔ . . . wiemɔi abaptisi awo Nuŋtsɔ lɛ gbɛi amli, loo ahe Nyɔŋmɔ Bi lɛ gbɛi aye, lɛ ji akɛ, baptisimɔ loo hemɔkɛyeli feɔ Nyɔŋmɔ loo Nyɔŋmɔ Bi lɛ nii ni atsɔɔ.”—Wiemɔ ni atsɔ lɛ jɛ Deissmann.
Nɔ ni yɔɔ miishɛɛ ji akɛ, Yudafoi ni hi shi yɛ Yesu gbii lɛ amli lɛ kɛ wiemɔi ni tamɔ nakai nɔŋŋ tsu nii, taakɛ atsɔɔ mli yɛ Theological Dictionary of the New Testament lɛ mli lɛ: “Afoɔ mɔ ni atsake lɛ kɛba Yuda mli lɛ ketia . . . ’yɛ mɔ ni atsake lɛ lɛ gbɛi amli,’ koni ahe lɛ awo Yuda jamɔ mli. Nɛkɛ ketiafoo nɛɛ yaa nɔ . . . ’yɛ kpaŋmɔ lɛ gbɛi amli,’ koni aŋɔ lɛ awo kpaŋmɔ lɛ mli.” No hewɔ lɛ atoɔ wekukpaa ko afɔɔ shi, ni mɔ ni jeee Yudanyo lɛ batsɔɔ mɔ ni atsake lɛ yɛ kpaŋmɔ lɛ hewalɛ shishi.
No hewɔ lɛ kɛha Kristofonyo lɛ, baptisimɔ ni nyiɛɔ ehenɔjɔɔmɔ lɛ sɛɛ baa lɛ kɛ ekɛ Yehowa Nyɔŋmɔ, e-Bi Yesu Kristo, kɛ mumɔ krɔŋkrɔŋ lɛ teŋ tsakpaa ko ni bɛŋkɛ kpaakpa baa shihilɛ mli. Mɔ ni atsake lɛ lɛ yɔseɔ amɛ hegbɛi sɔrɔtoi lɛ yɛ eshihilɛ gbɛ hee lɛ mli. Susumɔ bɔ ni enɛ ji anɔkwale ha yɛ etɛ ni atsi ta lɛ he.
Kɛ wɔyɔse hegbɛ ni Nyɔŋmɔ yɔɔ lɛ, ehaa wɔbɛŋkɛɔ lɛ kpaakpa ni wɔkɛ lɛ boteɔ wekukpaa mli. (Hebribii 12:9; Yakobo 4:7, 8) Wɔbatsɔɔ Nyɔŋmɔ nii, akɛ etsuji, ni akɛ Yesu Kristo kpɔmɔ afɔleshaa lɛ jara lɛ he wɔ. (1 Korintobii 3:23; 6:20) Bɔfo Paulo hu kɛɛ klɛŋklɛŋ afii oha lɛ mli Kristofoi lɛ akɛ amɛji Yesu Kristo nii, jeee hii komɛi ni kɛ anɔkwale lɛ baha amɛ lɛ nii. (1 Korintobii 1:12, 13; 7:23; Okɛto Mateo 16:24 he.) Baptisimɔ yɛ Bi lɛ gbɛi amli lɛ tsɔɔ anɔkwa sane nɛɛ yɔsemɔ, ni aaakpɛlɛ Yesu nɔ akɛ “gbɛ lɛ kɛ anɔkwale lɛ kɛ wala lɛ.”—Yohane 14:6.
Mumɔ krɔŋkrɔŋ lɛ hu he miihia yɛ wekukpaa kpakpa ni ka wɔkɛ Yehowa kɛ Yesu Kristo teŋ lɛ mli. Baptisimɔ yɛ mumɔ krɔŋkrɔŋ lɛ gbɛi amli lɛ tsɔɔ akɛ wɔyɔseɔ mumɔ lɛ nitsumɔ yɛ bɔ ni Nyɔŋmɔ kɛ wɔ yeɔ haa lɛ mli. Wɔmiisumɔ ni wɔnyiɛ egbɛtsɔɔmɔ sɛɛ, wɔkuŋ wɔhiɛ wɔshwieŋ nɔ loo ni wɔɔfee nii ni teɔ shi woɔ lɛ, ni wɔtsi nii ni etsuɔ kɛtsɔɔ wɔnɔ lɛ naa. (Efesobii 4:30; 1 Tesalonikabii 5:19) Bɔ ni mumɔ lɛ jeee gbɔmɔ lɛ kɛ naagba ko baaa kɛ aawie he nakai loo yɛ eshishinumɔ mli, tamɔ bɔ ni wiemɔ, “yɛ kpaŋmɔ lɛ gbɛi amli” lɛ hu fee yɛ Yuda jamɔ mli lɛ.
No hewɔ lɛ, yɛ henɔjɔɔmɔ kɛ baptisimɔ be mli lɛ, ehe hiaa ni wɔkɛ sɔlemɔ asusu nɔ ni yɔɔ wɔ wekukpaa hee lɛ mli lɛ he. Ebiɔ heshibaa kɛha Nyɔŋmɔ suɔmɔnaa nifeemɔ, taakɛ afee he mfoniri yɛ Yesu Kristo kpɔmɔ nɔ he gbɛjianɔtoo, ni abaatsu he nii kɛtsɔ mumɔ krɔŋkrɔŋ lɛ nɔ, yɛ be mli ni ekudɔɔ Nyɔŋmɔ tsuji fɛɛ yɛ suɔmɔ kɛ ekomefeemɔ mli yɛ jeŋ fɛɛ lɛ mli lɛ.