‘Ŋwɛi Gbaa . . . Etsɔɔ’
Aaafee shitoi akpekpei 93 kɛjɛ he ni oyɔɔ amrɔ nɛɛ, ji he ni hulu lɛ jɛɔ ekpɛɔ tamɔ la kɛjɛɔ ŋwɛi lɛ. Eyɛ mli akɛ akɛ afii akpei abɔ eja lɛ akɛ nyɔŋmɔ moŋ, shi yɛ no najiaŋ lɛ, wɔ ŋwɛiniiaŋ hefatalɔ ni kpɛɔ nɛɛ yeɔ hewalɛ ni e-Bɔlɔ, ni ji “ŋwɛi kɛ shikpɔŋ Feelɔ lɛ” yɔɔ lɛ he odase. (Lala 115:15) Ekpɛmɔ kɛ edɔlɛ he miihia kɛha wala shihilɛ yɛ shikpɔŋ lɛ nɔ. Ni anɔkwa saji ni jeŋ nilelɔi ekase yɛ he lɛ haa wɔnaa kpɛɔ wɔhe kɛtekeɔ nɔ.
Akɛɔ wɔ akɛ hulu lɛ haa hewalɛ ni fa babaoo diɛŋtsɛ. Shi ani ole akɛ dɔlɛ kɛ la kpɛmɔ ni jɛɔ mli baa lɛ mlijaa akpekpei akpe mli ekome mli ta pɛ shikpɔŋ lɛ tsĩɔ naa? Ni kɛlɛ, nɛkɛ mlijaa bibioo nɛɛ naa shɛɔ hewalɛ kpele ni ji nɔ ni okpɔŋɔi 240,000,000,000,000 kɛbaatsu nii!
Te hulu lɛ feɔ tɛŋŋ efeɔ nɛkɛ hewalɛ nɛɛ fɛɛ lɛ? Kɛtsɔ nuklea flɔnɔɔ agbo ko ni yɔɔ eteŋ tuuŋtu, ni haa nɛkɛ hewalɛ nɛɛ kɛtsɔɔ kɔɔyɔɔ ni atsɛɔ lɛ hydrogen lɛ ni tsiimɔ aaashɛ tɔŋ“akpekpei ejwɛ ni eshaa yɛ hiŋmɛitswaa kome mli lɛ nɔ. Miishɛɛ sane kɛha adesai ji akɛ, ehewalɛ jɛɛhe nɛɛ fa babaoo yɛ hulu lɛ mli bɔ ni eeeha enɛ aya nɔ aahu afii akpekpei toi akpekpei abɔ.
Nibii ni jeŋ nilelɔi ena lɛ ekomɛi teeɔ sanebimɔi krokomɛi ashi lolo. Akɛ nɔkwɛmɔ nɔ lɛ, hulu lɛ miihoso bibiibii be fɛɛ be, tamɔ dade ko ni akɛ hamle etswa nɔ. Mɛni hewɔ? Agbɛnɛ hu, susumɔ enɛ he okwɛ: Hulu lɛ teŋ tuuŋtu ni tsoɔ grigri lɛ ji he ni edɔ fe fɛɛ, ni kɛji ehehaa nii lɛ eko kɛ eteŋ tuuŋtu lɛ mli jɛkɛ lɛ, belɛ jɛmɛ dɔlɛ lɛ naa miiba shi. Shi kɛ wɔba hulu lɛ hehaa nii ni yɔɔ sɛɛ fe fɛɛ, ni atsɛɔ lɛ corona lɛ mli lɛ, enɛ tsakeɔ kwraa. Corona lɛ edɔ kwraa fe ehehaa nii ni bɛŋkɛ eteŋ tuuŋtu ni tsoɔ grigri lɛ. Mɛni hewɔ?
Kɛfata he lɛ, eyɛ mli akɛ hulu lɛ foɔ ehe—tamɔ shikpɔŋ lɛ feɔ lɛ—moŋ, shi efai sɔrɔtoi lɛ foɔ amɛhe kɛ foi sɔrɔtoi. Akɛ nɔkwɛmɔ nɔ lɛ, efa ni yɔɔ ehewɔ gbɛ lɛ foɔ ehe oyayaayai fe eteŋgbɛ fai lɛ. Mɛni hewɔ? Ni mɛɛ gbɛ nɔ enɛ tsɔɔ ebaa? Agbɛnɛ hei bibii komɛi ni woɔ duŋ yɛ hulu lɛ diɛŋtsɛ hiɛ ni ji sunspots lɛ hu yɛ. Nɛkɛ kpai ni ji duŋ bibii ni baa hulu lɛ hiɛ nɛɛ baa yɛ be sɛɛjɛkɛmɔ pɔtɛɛ ni ji afii 11 mli. Mɛni hewɔ amɛtsakeɔ yɛ be sɛɛjɛkɛmɔ pɔtɛɛ mli lɛ?
Eyɛ mli akɛ babaoo yɛ ni wɔbaakase yɛ hulu lɛ he lolo moŋ, shi nɔ ni wɔle momo lɛ haa wɔkɛ gbeyeishemɔ kwɛɔ e-Bɔlɔ lɛ, Yehowa. Be fɛɛ be ni wɔnaa hulu lɛ, ekaiɔ wɔ akɛ “ŋwɛi gbaa Mawu anunyam lɛ, ni atatu tsɔɔ enine naa nitsumɔ lɛ.”—Lala 19:2.