Yibii ni Anɔkwa Sanekpakpa Jajelɔ Kpaa
WILLIAM R. BROWN tee Afrika klɛŋklɛŋ kwraa yɛ 1923 mli. Eŋa kɛ ebi fata ehe, ni’etsu sanekpakpa jajelɔ nitsumɔ lɛ’ yɛ Gambia, Ghana, Liberia, Nigeria, kɛ Sierra Leone. (2 Timoteo 4:5) Yibii ni enitsumɔ lɛ wo lɛ sa kadimɔ waa diɛŋtsɛ.
Nɛkɛ West Indies fɔmɔ bi nɛɛ jeee Kristendom sɔlemɔi lɛ eko kwraa mli nyo, ni eka shi faŋŋ hu akɛ ekɛ ehe wooo maŋkwramɔŋ saji amli. Shi moŋ, ekase Yesu kɛ bɔfoi lɛ kɛtsɔ Yehowa gbɛi lɛ kɛ jeŋ muu Fɛɛ maŋtsɛ ni eji lɛ he adafitswaa, kɛ bɔ ni kpɔmɔ nɔ lɛ he hiaa ha lɛ nɔmimaa, kɛ Maŋtsɛyeli lɛ he sanekpakpa lɛ he shiɛmɔ nɔ. (Mateo 9:35; 20:28; Yohane 17:4-6) William R. Brown kɛ Biblia lɛ tsu nii yɛ bei fɛɛ mli, ni ekɛ no tsɔɔ akɛ naagbee hewalɛ jɛɛhe yɛ saji ni kɔɔ tsɔɔmɔ kɛ hemɔkɛyeli he lɛ mli. (2 Timoteo 3:16) Ema enɛ nɔ mi waa diɛŋtsɛ, aahu po akɛ eha abale lɛ akɛ Bible Brown.
Kɛtsɔ Yehowa jɔɔmɔ nɔ lɛ, dumɔwui ni Bible Brown du lɛ kwɛ̃ ni amɛ dara. Ŋmɛnɛ, Afrikabii aaashɛ 200,000 ejɔɔ amɛwala nɔ amɛha amɛ-Bɔlɔ lɛ, yɛ shikpɔji ni etsɔɔ mɛi agbɛ yɛ nɔ lɛ anɔ, ni amɛ hu, amɛshiɛɔ Maŋtsɛyeli lɛ he sanekpakpa lɛ amɛtsɔɔ mɛi krokomɛi. (Mateo 24:14; 1 Korintobii 3:6-9) Ale nɛkɛ Kristofoi ni yɔɔ ekaa nɛɛ waa yɛ amɛnɔkwayeli kɛ bɔ ni anyɛɔ akɛ he fɔɔ amɛnɔ lɛ hewɔ. Amɛyɛ he miishɛɛ waa akɛ amɛji Yehowa Odasefoi kɛ Kristo, ni ji Maŋtsɛ ni yeɔ nɔ lɛ shishibii.
Yibii ni tamɔ nɛkɛ anɔkwa Kristofoi asanekpakpa jajemɔ nitsumɔ lɛ woɔ. Aakpa yibii ni tamɔ nakai nɔŋŋ yɛ je lɛŋ hei sɔrɔtoi fɛɛ, yɛ shikpɔji wuji ni ayɔɔ nɔ lɛ fɛɛ nɔ. ‘Akpa yibii,’ ni ji hii kɛ yei ni yɔɔ heshibaa tsuii fe akpekpei ejwɛ, yɛ shikpɔji ni fa fe 200 nɔ, ni amɛ hu amɛmiiti ŋwɛibɔfo sanekpakpa jajelɔ lɛ wiemɔi lɛ amli amɛmiiha mɛi krokomɛi, akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ.” (Kpojiemɔ 14:7) Yɛ anɔkwale mli lɛ, gbɛ pɛ ni wɔɔtsɔ nɔ wɔna hiɛnɔkamɔ yɛ wɔyinɔ ni ehao nɛɛ mli ji ni wɔku wɔsɛɛ kɛba Nyɔŋmɔ ŋɔɔ ni wɔba wɔhe shi wɔha e-Maŋtsɛyeli nɔyeli lɛ.