Osɔfonukpa lɛ Nyɛŋ Adamɔ Naa!

ATO osɔfonukpai agwabɔɔ ko he gbɛjianɔ yɛ nyɛsɛɛ afi lɛ mli koni akɛsusu saji komɛi ni he hiaa Katolek Sɔlemɔ lɛ waa lɛ he. Taakɛ adafitswaa wolo Il Sabato tsɔɔ lɛ, saji nɛɛ ateŋ ekome ji “ekãa ni jamɔ kui bibii lɛ kɛtsuɔ nii lɛ.” Shi adafitswaa wolo lɛ kɛɛ: “Esaaa akɛ ewaa kɛhaa osɔfonukpai lɛ akɛ amɛaakpa gbee yɛ sane oti nɛɛ he. Mɔ fɛɛ mɔ kpɛlɛɔ nɔ akɛ ehe miihia ni aje gbɛ akase ni ale nɔ ni yɔɔ naakpɛɛ yɛ jamɔ kui heei lɛ ahe lɛ, kɛ agbɛnɛ bɔ ni ehe hiaa ni atsi amɛshweremɔ naa bɔ ni aaanyɛ.”

Shi eka shi faŋŋ akɛ “ekaa ni jamɔ kui bibii lɛ kɛtsuɔ nii lɛ” jeee naagba ni yɔɔ Italia pɛ. Il Sabato bɔ amaniɛ akɛ: “Yɛ be mli ni Osɔfonukpa Kirill ni jɛ [Russia blema maŋtiase] Smolensk yasara Vatikan nyɛsɛɛ nɛɛ lɛ, . . . ebi ni paapa lɛ aha Katolek je lɛ fɛɛ aye abua koni amɛnyɛ amɛdamɔ Yehowa Odasefoi ayifalɛ ni yaa hiɛ fe nine lɛ kɛ kui krokomɛi ni tamɔ nakai ni yɔɔ Soviet Union lɛ naa.”

Jamɔi ni ato ama shi yɛ klɛŋklɛŋ afii oha lɛ mli lɛ amli hiɛnyiɛlɔi ye ŋkɔmɔ nakai nɔŋŋ yɛ be mli ni Kristojamɔ sɛɛnyiɛlɔi lɛ ha eshwere kɛ foi lɛ. Be ko lɛ Yudafoi ni amɛmli ewo la lɛ kɛ sane fɔ maŋ lɛ mli onukpai lɛ ahiɛ akɛ: “Mɛnɛɛmɛi ni etsɔ jeŋ hiɛ ebu shi nɛɛ eba biɛ nɛɛ hu”! (Bɔfoi lɛ Asaji 17:⁠6) Jamɔ mli hiɛnyiɛlɔi lɛ bɔ mɔdɛŋ waa yɛ nakai bei lɛ amli koni amɛtsi Kristojamɔ ni gbɛɔ shwaa lɛ naa, shi amɛnyɛɛɛ. Ni ŋmɛnɛ hu, mɔdɛŋ fɛɛ ni aaabɔ ni akɛtsi anɔkwa Kristojamɔ tsɔɔmɔ lɛ gbɛɛ-kɛ-shwamɔ naa lɛ baafee efolo. Nyɔŋmɔ diɛŋtsɛ kɛ shiwoo nɛɛ haa akɛ: “Tawuu nii ni asɔɔ ashiɔo lɛ eko eko nyɛŋ nɔ ko afee, ni lilɛi fɛɛ lilɛi ni aaate shi ekɛo aaakojo lɛ, ooobu lɛ fɔ. Enɛ ji Yehowa tsuji lɛ agboshinii, kɛ amɛjalɛ ni jɛ midɛŋ.”​—Yesaia 54:⁠17.