Wala​—Eji Nikeenii Ni Jɛ Nyɔŋmɔ Ŋɔɔ

WƆTSUI shiɔ la ni he hiaa waa lɛ kɛtsɔɔ wɔgbɔmɔtso lɛ mli fɛɛ, ŋmɛlɛtswai 24 yɛ gbi kome mli. Wɔ yeɔ wɔ ni wɔwɔɔ, ni wɔflufla yaa nɔ egbeleɔ ni eŋaa. Wɔyeɔ nii, ni bɔ fɛɛ bɔ ni fee lɛ, agbɛlɛɔ niyenii lɛ yɛ wɔmusuŋ. Enɛɛmɛi fɛɛ baa mli daa gbi, ni wɔ mɔdɛŋbɔɔ fioo pɛ fata he, loo ejɛɛɛ wɔmɔdɛŋbɔɔ ko kwraa po mli. Nɛkɛ teemɔŋ nifeemɔi ni yɔɔ naakpɛɛ, ni wɔbuuu he akɔntaa tsɔ ko nɛɛ fata nikeenii ni wɔtsɛɔ lɛ wala lɛ he. Yɛ shishinumɔ ko naa lɛ, eji nikeenii ko ni wɔbaanyɛ wɔwie he akɛ eyɛ naakpɛɛ.

Susumɔ nifeemɔ ni ji adesa hɔ ŋɔɔ kɛ efɔmɔ lɛ he okwɛ. Eyɛ mli akɛ gbɔmɔtso lɛ kpooɔ nibii krokomɛi ni jɛɔ sɛɛ boteɔ mli lɛ moŋ, shi fɔmɔ kotoku lɛ kpɛlɛɔ wɔlɔ ni ena nuu wala yibii lɛ nɔ. Nɔ najiaŋ ni eeekpoo la kuli ni daa nɛɛ akɛni ejɛ sɛɛ kɛbabote emli lɛ, elɛɔ lɛ ni ebuɔ ehe moŋ aahu kɛyashiɔ be mli ni eeefee klalo akɛ ebaaje kpo akɛ abifao. Eji fɔmɔ kotoku lɛ nyɛɛɛ ana akɛ nɛkɛ nii ni he hiaa waa nɛɛ fataaa mla ni ji kpoomɔ ni ekpooɔ nibii fɛɛ ni jɛɔ sɛɛ boteɔ mli lɛ he kulɛ, adesa fɔmɔ nyɛŋ aba mli kɔkɔɔkɔ.

Ni kɛji nakai po lɛ, kɛ́ jeee nifeemɔ ko ni yaa nɔ yɛ fɔmɔ kotoku lɛ mli beni hɔ lɛ eye aaafee nyɔji ejwɛ pɛ lɛ kulɛ, abifao ni afɔ lɛ eŋmɔŋ lɛ wala sɛɛ etsɛŋ kwraa. Ebɔiɔ egɔŋti yeli yɛ nakai beaŋ, ni ekɛgbɔleɔ faji ni sɛɛ mli lɛ ebaaye ebua lɛ koni enyɛ eye enyɛ fufɔ lɛ. Ni enɛ ji wala-kɛ-gbele saji babaoo ni anaa naa yɛ be kakadaŋŋ mli dani afɔɔ abifao lɛ ateŋ ekome nɛ.

Beni abifao lɛ yɔɔ musuŋ lɛ, no mli lɛ fɔlɔ ko yɛ etsui he. Shi, yɛ efɔmɔ be mli lɛ, nɛkɛ fɔlɔ nɛɛ diɛŋtsɛ tsiɔ. Kɛfata he lɛ, la fã agbo ko ni tsɔɔɔ eflufla mli beni abifao lɛ yɔɔ musu mli lolo lɛ hu diɛŋtsɛ tsiɔ enaa yɛ efɔmɔ be mli; agbɛnɛ ela baatsɔ eflufla mli, ni akɛ kɔɔyɔɔ kpakpa baawo mli, beni abifao lɛ jeɔ mumɔ shishi lɛ.

Enɛɛmɛi fɛɛ lɛ, eshishijee pɛ kɛkɛ ni. Yɛ ewala shihilɛ mli fɛɛ lɛ, gbɔmɔtso lɛ mli nibii ni aje gbɛ ato amɛ gbɛjianɔ jogbaŋŋ (tamɔ kɔɔyɔɔ ni amuɔ, bɔ ni la nyiɛɔ gbɔmɔtso lɛ mli, fãi, kɛ gbɛjianɔtoi komɛi ni kɛ nui woɔ lɛ lɛ mli) lɛ baatsu nii, ni amɛbaabua amɛnitsumɔi lɛ fɛɛ naa ni fɛɛ baatsu nii pɛpɛɛpɛ bɔ ni adesa ko susumɔ shɛɛɛ he​—fɛɛ lɛ, bɔni afee ni wala anyɛ ahi shi daa. Ebɛ naakpɛɛ akɛ blema niŋmalɔ ko wie wiemɔi nɛɛ kɛkɔ Nyɔŋmɔ he akɛ: “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ. Onitsumɔi lɛ yɛ naakpɛɛ, ni misusuma le enɛ krɛdɛɛ.”​—Lala 139:⁠14.

Eyɛ faŋŋ akɛ, mɔ ni ŋma nɛkɛ wiemɔ ni ŋɔɔ nɛɛ heee eyeee akɛ wala ba kɛtsɔ sutsakemɔ mli heniianaa, loo oshara ko ni anyɛŋ ale nɔ ni baaje mli aba nɔ. Eji nakai sane lɛ ji kulɛ, sɔ̃ loo gbɛnaa nii ko kwraa kaŋ wɔ nɔ yɛ bɔ ni esa akɛ wɔkɛ wɔwala atsu nii wɔha lɛ he. Shi, bɔ ni ato wala mli nibii sɔrɔtoi lɛ ahe gbɛjianɔ aha tsɔɔ faŋŋ akɛ afee, ni feemɔ ni afee nɛɛ biɔ ni ena feelɔ. Biblia lɛ wieɔ shishitoo mla nɛɛ he akɛ: “Ejaakɛ shia fɛɛ shia lɛ, mɔ ko ma, shi mɔ ni saa nii fiaa to ji Nyɔŋmɔ.” (Hebribii 3:⁠4) No hewɔ lɛ ehe miihia waa ni wɔle “akɛ Yehowa lɛ, lɛ ji Nyɔŋmɔ. Lɛ ji mɔ ni fee wɔ, ni jeee wɔ diɛŋtsɛ wɔfee wɔhe.” (Lala 100:​3, New World Translation) Hɛɛ, wala jeee oshara ko ni mli hi mli; eji nikeenii ni jɛ Nyɔŋmɔ diɛŋtsɛ ŋɔɔ.​—Lala 36:⁠10.

Kɛji nakai ji sane lɛ, mɛɛ sɔ̃i jwere wɔnɔ yɛ wala Halɔ lɛ gbɛfaŋ mɔ? Te ekpaa gbɛ akɛ wɔkɛ wɔwala baatsu nii wɔha tɛŋŋ? Abaasusu saji nɛɛ kɛ ekrokomɛi ni tamɔ nakai lɛ ahe yɛ sane ni nyiɛ sɛɛ lɛ mli.