Paulo kɛ Plato Naataomɔ yɛ Gbohiiashitee lɛ He

BƆFO Paulo ŋma yɛ gbohiiashitee lɛ he yɛ 1 Korintobii 15:​35-58 kɛ 2 Korintobii 5:​1-10. Ani enyiɛ Plato kɛ Hela jeŋ nilelɔi lɛ asusuma ni gbooo he jwɛŋmɔi lɛ asɛɛ yɛ nakai feemɔ mli, aloo ekɛ Yesu tsɔɔmɔi lɛ kɛ Ŋmalɛi krokomɛi lɛ amli nɔ lɛ kpaa gbee?

Wolo bibioo, Immortality of the Soul or Resurrection of the Individual: St. Paul’s View with Special Reference to Plato, ni aŋma yɛ 1974 ni Greek Orthodox Church of North and South America lɛ osɔfonukpa lɛ kpɛlɛ nɔ lɛ kɛ hetoo ko ni jieɔ nɔ ko kpo haa. Yɛ be mli ni ewie bɔ ni gbohiiashitee lɛ yɔɔ ha yɛ ŋmalɛi ni atsi ta yɛ yiteŋgbɛ nɛɛ anaa lɛ kɛ hewalɛ ni Helabii yɔɔ yɛ nakai bei lɛ, amli lɛ he lɛ, niŋmalɔ lɛ mu sane naa nɛkɛ:

“Plato tsɔɔ akɛ susuma lɛ yaa nɔ ehiɔ shihilɛ ni baaa naagbee mli, yɛ gbɔmɔtso lɛ sɛɛ. Kɛha Plato lɛ, susuma lɛ ji nɔ ko ni gbooo kwraa . . . St. Paul etsɔɔɔ tsɔɔmɔ ko ni tamɔ nɛkɛ ni ekɛɛɛ akɛ nakai eji . . .

“Bɔfo Paulo gbaaa ehe naa yɛ gbo ni psyche loo mumɔ lɛ gbooo akɛ nibii ni esoro amɛ lɛ he, shi moŋ yɛ nii muu lɛ fɛɛ shitee he, ní ji, gbɔmɔ lɛ susuma-mumɔ kɛ gbɔmɔtso lɛ shitee ni jɛ Kristo shitee lɛ hewɔ. Bɔ ni Paulo shishinumɔ ji yɛ su mli ni gbohii lɛ fɛɛ baaba wala mli yɛ lɛ kɛ gbɛ ni atsɔɔ nɔ akɛ gbɔmɛi ni egboi yɛ gbohiiabui amli baa wala mli lɛ bɛ nɔ ko feemɔ.

“Abaanyɛ atsɔɔ eshishinumɔ yɛ gbɔmɔtso lɛ shitee he lɛ mli jogbaŋŋ akɛ tsakemɔ, nibɔɔ hee, kɛ eheefeemɔ, Nyɔŋmɔ hewalɛ nɔ ni atsɔɔ afeɔ gbɔmɔ muu lɛ fɛɛ ekome, nakai gbɔmɔ lɛ nɔŋŋ, su kɛ baŋ lɛ nɔŋŋ, gbɔmɔtso mli sui, gbɔmɔ aŋkro lɛ jwɛŋmɔŋ kɛ gbɔmɔtsoŋ nyɛmɔi diɛŋtsɛ lɛ. Wɔ wɔsɛɛ be gbohiiashitee lɛ baaba mli ni jeee kɛ nibii ni wɔyɔɔ momo yɛ adebɔɔ naa, shi moŋ akɛ nikeenii ni jara wa waa ni jɛ Nyɔŋmɔ ŋɔɔ.”

Hɛɛ ni aaahi shi ni agbooo lɛ jeee nɔ ko ni yɔɔ adesa ko mli ni akɛfɔ lɛ. Shi moŋ, eji duromɔ keenii ni jara wa waa ni jɛ Yehowa ŋɔɔ kɛtsɔ wɔ Nuŋtsɔ Yesu Kristo nɔ ni ekɛhaa mɛi ni feɔ Kristofoi asafo ni afɔ amɛ mu, lɛ.​—1 Korintobii 15:​20, 57; Filipibii 3:⁠14.

[Mfoniri ni yɔɔ baafa 9]

Hela jeŋ nilelɔ Plato

[He ni Sane lɛ Jɛ]

Vatican Museum photograph