Mɔ ni Baabo Toi He Miihia Wɔ

AKƐ adesai lɛ, wɔbɔɔ mɔdɛŋ ni wɔna miishɛɛ kɛ tsui ni nyɔɔ mɔ mli yɛ shihilɛ mli. Shi kɛ teemɔŋ shihilɛ mli naagbai te shi lɛ, kwɛ bɔ ni eyeɔ ebuaa ni eshɛjeɔ mɔ mii hu akɛ wɔɔna mɔ ko ni wɔkɛ lɛ agba wɔnaagbai lɛ ahe sane!

Dr. George S. Stevenson kɛɔ akɛ: “Ni wɔɔwie saji ahe yɛ faŋŋ lɛ yeɔ ebuaa ni ehaa ohe jɔɔ bo, eyeɔ ebuaa bo ni onaa onaagbai lɛ faŋŋ bɔ ni sa, ni yɛ bei pii amli lɛ eyeɔ ebuaa bo koni ona nɔ ni obaanyɛ ofee yɛ he.” Dr. Rose Hilferding kɛɛ: “Esa akɛ wɔ fɛɛ wɔja wɔhaomɔi lɛ. Esa akɛ wɔja wɔnaagbai lɛ. Esa akɛ wɔnu he akɛ mɔ ko yɛ je lɛ mli ni miisumɔ ni ebo toi ni baanyɛ anu shishi.”

Shi, adesa ko bɛ ni baanyɛ atsu hiamɔ nɛɛ fɛɛ he nii. Yɛ be ni bɛ kɛ gbɛtsii nii krokomɛi hewɔ lɛ, ekolɛ wɔnine shɛŋ gbɔmɛi ni wɔgbaa amɛ wɔteemɔŋ saji lɛ anɔ yɛ be mli ni amɛhe hiaa wɔ babaoo lɛ, aloo ekolɛ wɔbaashashao shi akɛ wɔkɛ wɔnaanyo ni bɛŋkɛ wɔ kpaakpa lɛ po aaagba saji komɛi.

Shi anɔkwa Kristofoi jeee mɛi ni bɛ mɔ ni boɔ amɛ toi kwraa, ejaakɛ sɔlemɔ gbɛ lɛ naa ka be fɛɛ be. Biblia lɛ woɔ wɔ hewalɛ shii abɔ akɛ wɔsɔle wɔha Nyɔŋmɔ, wɔ Bɔlɔ lɛ, ni egbɛi ji Yehowa lɛ. Atsɔɔ wɔ ni wɔsɔle yɛ anɔkwayeli mli, yɛ Yesu gbɛi amli, kɛ agbɛnɛ yɛ Nyɔŋmɔ suɔmɔnaa nifeemɔ kɛ gbeekpamɔ naa. Teemɔŋ saji po bafeɔ nibii ni wɔbaanyɛ wɔsɔle yɛ he. Akɛɔ wɔ yɛ Filipibii 4:6 akɛ: “Nɔ fɛɛ nɔ mli lɛ nyɛkɛ sɔlemɔ . . . atsia nyɛtutɔmɔi lɛ ata yɛ Nyɔŋmɔ hiɛ.” Mɛɛ nikeenii ni yɔɔ naakpɛɛ nɛ! Jeŋ Muu Fɛɛ Nɔyelɔ ni yeɔ wɔ jeŋ muu fɛɛ nɛɛ nɔ lɛ efee klalo yɛ be fɛɛ mli akɛ eeehere etsuji heshibalɔi lɛ asɔlemɔi anɔ be fɛɛ be ni amɛsumɔɔ akɛ amɛaabɛŋkɛ lɛ.​—Lala 83:​19; Mateo 6:​9-15; Yohane 14:​13, 14; 1 Yohane 5:⁠14.

Shi, ani Nyɔŋmɔ boɔ toi lɛlɛŋ? Mɛi komɛi baasusu kɛji sɔlemɔ ni mɔɔ shi lɛ damɔ gbɔmɔ nyɛmɔ pɛ nɔ: Gbɔmɔ sɔleɔ, etoɔ esusumɔi anaa ni ejieɔ amɛ kpo yɛ wiemɔi amli. Yɛ be mli ni etsɔɔ enaagba lɛ mli nɛkɛ lɛ, etaoɔ tsabaa ni sa, ni ehiɛ hiɔ ehe nɔ yɛ nɔ fɛɛ nɔ ni baaye abua ni ena lɛ he. Kɛ ena naagba lɛ naa lɛ, ekolɛ ekɛ yijiemɔ baaha Nyɔŋmɔ, shi lɛ diɛŋtsɛ ejwɛŋmɔ kɛ emɔdɛŋbɔɔ kɛ nɔ ni ataoɔ nɛɛ ba.

Ŋmɛnɛ mɛi pii susuɔ akɛ mɔ ko jwɛŋmɔ kɛ emɔdɛŋbɔɔ ní ekɛaatsu naagba ko he nii lɛ pɛ ji nɔ fɛɛ nɔ ni kɔɔ sɔlemɔ he. Ani osusuɔ nakai? Ani nɛkɛ sɔlemɔ hewalɛ eyaaa shɔŋŋ kwraa? Wɔkpɛlɛ nɔ po akɛ mɔ ko jwɛŋmɔŋ kɛ gbɔmɔtsoŋ mɔdɛŋbɔɔ ni kɛ esɔlemɔi kpaa gbee lɛ tsuɔ nɔ ko pɔtɛɛ yɛ ehetooi ni enine shɛɔ nɔ lɛ mli. Shi mɛni ji nɔ ni Nyɔŋmɔ diɛŋtsɛ tsuɔ yɛ nɛkɛ sane nɛɛ mli? Kɛ oosɔle ooha Nyɔŋmɔ lɛ ani eboɔ toi? Ani ebuɔ osɔlemɔi lɛ akɛ nɔ ko ni he hiaa, ni esusuɔ emli saji lɛ ahe ni ehaa amɛ hetoo?

Sanebimɔi nɛɛ ahetoo tsɔɔ nɔ ko pɔtɛɛ. Kɛji Nyɔŋmɔ booo wɔsɔlemɔi atoi lɛ, belɛ sɔlemɔ jeee nɔ ko nɔ ko fe jwɛŋmɔŋ susumɔ ko mli sɛɛnamɔ kɛkɛ. Yɛ gbɛ kroko nɔ lɛ, kɛji akɛ Nyɔŋmɔ kɛ miishɛɛ boɔ wɔteŋ mɔ fɛɛ mɔ sɔlemɔi atoi lɛ, belɛ kwɛ bɔ ni esa akɛ wɔda shi babaoo yɛ nɛkɛ gbɛjianɔtoo nɛɛ hewɔ! Esa akɛ enɛ atsirɛ wɔ ni wɔkɛ nakai gbɛjianɔtoo lɛ atsu nii daa gbi.

Belɛ wɔmiifɔ bo nine ni oya nɔ okane, yɛ be mli ní awieɔ nɛkɛ saji nɛɛ ahe yɛ sane ni nyiɛ sɛɛ nɛɛ mli lɛ.