Jamɔ ni ‘Hemɔkɛyeli Yɔɔ Tswãa’

“Nyɛmɔ ni Mormon jamɔ lɛ nyɛɔ eheɔ shi waa yɛ demokrase maji ni haa heyeli kɛ yiwalɛ nɔyelii amaji fɛɛ amli lɛ yɛ naakpɛɛ.” Nɛkɛ The Wall Street Journal lɛ wie beni Hungary nɔyeli lɛ ha Church of Jesus Christ of Latter-day Saints lɛ gbɛŋmɛɛ wolo ni tsɔɔ akɛ maŋ lɛ kpɛlɛɔ amɛnɔ kwraa lɛ. Mɛɛ gbɛ nɔ sɔlemɔ lɛ tsɔɔ ni enyɛɔ etsuɔ enɛ? Taakɛ Journal lɛ tsɔɔ mli lɛ, “jeee bɔ ni Mormonbii lɛ fɔɔ babaoo aloo bɔ ni amɛkɛ tutuamɔ gbɛɔ amɛ sanekpakpa lɛ amɛshwaa lɛ ji nɔ titri ni kɛbaa. Shi moŋ, tswãa-feemɔ ko ni akɛwo amɛ hemɔkɛyeli lɛ mli lɛ.” Yɛ mɛɛ gbɛ nɔ?

Beni ewieɔ be ni ho dani maŋkwramɔŋ tsakemɔi ni ba Europa Bokagbɛ nyɛsɛɛ nɛɛ lɛ ba lɛ he lɛ, Journal lɛ wie akɛ: “Akɛni amɛkɛ lala kɛ asafo-joo kui ni jɛ Brigham Young University lɛ tsuɔ nii hewɔ lɛ, Mormonbii lɛ enyɛ amɛtswa nɔnyɛɛ kɛ ekomefeemɔ ni afɔɔɔ namɔ, ni maŋsɛɛ sanekpakpa shiɛlɔi kɛkpeɔ yɛ Komunist maji pii amli lɛ amɛshwie amɛsɛɛ.” Amɛ shwɛmɔ kui etee Romania, Czechoslovakia, Hungary, Poland, Russia, kɛ China, kɛ agbɛnɛ Saudi Arabia, Libya, Egypt, Jordan, Somalia, kɛ Israel. Kɛfata he lɛ, “akɛ ninamɔ babaoo ni Mormon Sɔlemɔ lɛ yɔɔ lɛ etsu nii akɛ dɛŋdade ni anyɛ akɛbote Marxist maji kɛ Maji ni Miiya Amɛhiɛ lɛ amli.” Nibii ni akɛ Mormon shika yelikɛbuamɔi fiɔ sɛɛ lɛ ekomɛi ji kpokui ni atswaa akɛtsiɔ nu naa akɛtsuɔ nii kɛ nu bui atsaa.

Ebɛ naakpɛɛ yɛ ŋmɛnɛŋmɛnɛ jeŋ ni sumɔɔ shwɛmɔ kɛ ŋɔɔmɔ kɛ shika babaoo nɛɛ mli akɛ, lala-kɛ-joo kɛ shika-kee ŋaa gbɛi nɛɛ kɛ nitsumɔ mɔɔ mɛi ajwɛŋmɔ jogbaŋŋ diɛŋtsɛ. (2 Timoteo 3:​2, 4) Shi lɛlɛŋ, Tookwɛlɔ Kpakpa, Yesu Kristo gbee gbalaa mɛi ni tamɔ gwantɛŋi lɛ kɛbɛŋkɛɔ lɛ. (Yohane 10:27) No hewɔ ni, beni efa esɛɛnyiɛlɔi lɛ akɛ “nyɛyafea jeŋmaji fɛɛ mikaselɔi” lɛ, ekɛɛɛ amɛ akɛ amɛyafee nakai kɛtsɔ gbɛ ko kwraa nɔ aloo kɛ nyɔmɔbɔɔ ko shi moŋ ni ‘atsɔɔ amɛ ni amɛye nii fiaa ni ekɛɛ amɛ lɛ nɔ.’ (Mateo 28:​19, 20) Gbɛ ko kwraa bɛ ni aaatsɔ nɔ aŋmɛɛ Biblia mli shishitoo mlai ahe ni akɛsaa, yɛ nɛkɛ famɔ nɛɛ he nitsumɔ mli.