“Yehowa Odasefoi?”

SANEBIMƆ ni yɔɔ yiteŋgbɛ lɛ je kpo akɛ Bulletin of the University of Helsinki ni akalaa yɛ Finland wiemɔ mli lɛ yitso. Nɔ ni aŋma yɛ saneyitso nɛɛ shishi ji wolo ko ni Professor Jorma Palo ŋma, ni efa ko kɛɔ akɛ: “Mije gbɛ mikwɛ wɔ univɛsiti lɛ okadi ni akala yɛ Bulletin lɛ sɛɛ lɛ jogbaŋŋ. Ni mikwɛ eŋwɛi gbɛ afa lɛ teŋ tuuŋtu lɛ, mina Hebri niŋmaa ko, no hewɔ lɛ mibi minaanyo Yudafonyo ko ni eba mi saramɔ lɛ nɔ ni nakai niŋmaa lɛ shishi ji. Taakɛ bɔ ni nɛkɛ woloŋlelɔ, ni le Hebri wiemɔ lɛ tsɔɔ lɛ, wiemɔ lɛ ji ‘Yehowa’ yɛ Finland wiemɔ mli.”

Nyɔŋmɔ gbɛi diɛŋtsɛ ni jeɔ kpo yɛ Finland univɛsiti okadi nɛɛ nɔ lɛ haa mɛi komɛi anaa kpɛɔ amɛhe. Shi, yɛ anɔkwale mli lɛ, univɛsiti lɛ eye afii 350, ni beni ato shishi lɛ, no mli lɛ ale gbɛi Yehowa lɛ jogbaŋŋ ni akɛtsuɔ nii hu yɛ Europa fɛɛ. Gbɛi lɛ jeɔ kpo yɛ maŋ lɛŋ tsũi pii ahe, kɛ dade shikai, kɛ okadii babaoo ni abuɔ bei ni amɛye lɛ kɛyaa nakai be lɛ mli lɛ anɔ.​—Kwɛmɔ The Divine Name That Will Endure Forever wolo bibioo lɛ.

Kristendom kɛ Nyɔŋmɔ gbɛi lɛ tsuuu nii dɔŋŋ, yɛ wɔ afii oha nɛɛ mli, ni hiɛ ekpa nakai shishijee miishɛɛ ni ana yɛ he lɛ nɔ kwraa. Kuu kome pɛ kɛ nakai ŋwɛi gbɛi lɛ tsuɔ nii yɛ jamɔ mli ni amɛshiɛɔ yɛ he fɛɛ he, yɛ klɛŋklɛŋ faikpamɔ ni yɔɔ Nuŋtsɔ lɛ Sɔlemɔ lɛ mli lɛ kɛ gbeekpamɔ naa: “Wɔ-Tsɛ ni yɔɔ ŋwɛi, ha ogbɛi lɛ he atse.” (Mateo 6:​9, New World Translation) No hewɔ ni, beni ana gbɛi lɛ yɛ univɛsiti okadi lɛ nɔ lɛ, egbala gbɔmɛi ajwɛŋmɔ kɛtee Yehowa Odasefoi anɔ amrɔ nɔŋŋ lɛ.

[He ni Mfoniri ni yɔɔ baafa 32 lɛ Jɛ]

Yliopisto