Saji ni Jɛ Shiwoo Shikpɔŋ lɛ Nɔ
Yaakwɛ Shikpɔŋ lɛ, Yaakwɛ Tooi Lɛ!
KRISTOFOI akpei abɔ etee amɛyakwɛ Shiwoo Shikpɔŋ lɛ, ejaakɛ amɛsusuɔ akɛ kɛji amɛna hei ni saji lɛ ba yɛ lɛ, ebaaye ebua amɛ waa ni amɛnu Biblia lɛ shishi, ni eshishinumɔ baafee faŋŋ hu. Ni eye ebua amɛ hu. Kɛji ótee oyakwɛ jɛmɛ diɛŋtsɛ da aloo oyakwɛ jɛmɛ yɛ ojwɛŋmɔ mli kɛtsɔ shikpɔŋ lɛ he woji kɛ saji ni aŋmala lɛ kasemɔ nɔ lɛ, no lɛ tooi lɛ akwɛmɔ hu? Shi ekolɛ obaabi akɛ: ‘Mɛni tooi ahe saji kɔɔ yɛ Shiwoo Shikpɔŋ lɛ he?’ Yɛ anɔkwale mli lɛ, afɔɔ tooi ahe nitsumɔ waa yɛ Biblia beaŋ bii ashihilɛ mli akɛ, kɛji oyakwɛ Shiwoo Shikpɔŋ lɛ, ni eyakwɛɛɛ tooi lɛ ofataaa he lɛ, yɛ gbɛ ko nɔ lɛ, onikwɛmɔ lɛ yeko emuu.
Mfonirii ni onaa yɛ biɛ nɛɛ baanyɛ afee onikwɛmɔ lɛ fa, ejaakɛ tooi ni abaanyɛ ana yɛ nakai kpokpai lɛ anɔ ŋmɛnɛ lɛ tamɔ nɔ ni afɔɔ namɔ yɛ Biblia beaŋ lɛ nɔŋŋ.a Amɛleei ni elɛɛ lɛ etsii kɛ fɔ sɔŋŋ. (3 Mose 7:3; 9:19) Bei pii lɛ, amɛhe tsɔi funyaa lɛ fɔɔ eyɛŋ feemɔ. Shi kaimɔ akɛ Yakob tooi babaoo lɛ ateŋ ekomɛi ahe yɛ ‘truntrãi kɛ damdam, kɛ . . . toobii ni dĩɔ” hu.—1 Mose 30:32.
Nɛkɛ sane nɛɛ nɔŋŋ hu haa anaa faŋŋ akɛ abuɔ nuu ni yɔɔ tooi babaoo lɛ akɛ niiatsɛ. (1 Mose 30:43) Wɔkaneɔ yɛ Hiob he akɛ: “Ni ekooloi ni eyɔɔ ji tooi akpei kpawo kɛ yoomai akpei etɛ kɛ tsinai ŋtatai ohai enumɔ kɛ teji yei ohai enumɔ . . . Nɛkɛ nuu nɛɛ ji gbɔmɔ agbo fe Bokagbɛbii lɛ fɛɛ.” (Hiob 1:3; 42:12) Aloo kaimɔ akɛ Nabal ná too gwantɛŋi 3,000 kɛ abotiai hu 1,000. Mɛɛ gbɛhe kɛ hewalɛ osusuɔ akɛ ena yɛ David bei amli? (1 Samuel 25:2) Shi mɛni hewɔ titri ni abuɔ tooi babaoo akɛ ninamɔ kpele lɛ?
Nɔ hewɔ lɛ ji akɛ, tooi haa amɛkwɛlɔ loo nɔtsɛ lɛ naa nibii ni he yɔɔ sɛɛnamɔ babaoo. Too he tsɔi lɛ diɛŋtsɛ ji nɔ ko ni jara wa ni yaa nɔ etsaa be fɛɛ be. Abɛi 31:13, 21, 22 yeɔ ebuaa wɔ ni wɔnaa bɔ ni ŋa ni le nii, ni etsuɔ nii waa lɛ baanyɛ ekɛ enɛ afee mama kɛha eweku lɛ aloo atadei ni abaanyɛ ahɔɔ. (Hiob 31:20) Too he tsɔi ji guɔyeli nii ni he hiaa waa. Wɔnaa enɛ yɛ wiemɔ ni awie akɛ Moab maŋtsɛ lɛ, “tooi atsɛ ni, ni etsuɔ gwantɛŋbii akpei oha kɛ gwantɛŋ hii ni akuko amɛhe tsɔi akpei oha ehaa Israel maŋtsɛ lɛ” mli. (2 Maŋtsɛmɛi 3:4, New World Translation) Hɛɛ, tooi ni “akuko amɛhe tsɔi” ni; amɛhe tsɔi pii lɛ haa amɛjara waa.
Gwantɛŋ hii lɛ ekomɛi jeɔ akoloŋtoi ni yɔɔ fɛo waa, tamɔ nɔ ni onaa yɛ ninejurɔgbɛ mfoniri nɛɛ mli lɛ. Ani enɛ haa okaiɔ akɛ gwantɛŋ nuu akoloŋto akɛtsuɔ nii ni akɛtswaa Heyeli Afi lɛ he adafi lɛ? (3 Mose 25:8-10) Nakai nɔŋŋ akɛ akoloŋtoi ni fɔlɔ yɔɔ mli tsuɔ nii ni akpãa akɛtsɛɔ mɛi aloo akɛtsɔɔ ta mli ŋaa gbɛi.—Kojolɔi 6:34; 7:18, 19; Yoel 2:1.
Eka shi faŋŋ akɛ, kɛji oyɛ tooi babaoo lɛ, belɛ oyɛ niyenii be fɛɛ be ejaakɛ tooi fata kooloi ni he tse ni lsraelbii lɛ baanyɛ amɛye lɛ ahe. (5 Mose 14:4) Abaanyɛ ahoo loo lɛ (ni ji tooloo lɛ) aloo abaanyɛ ashã yɛ la nɔ. Tooloo ni ashã yɛ la nɔ ji daa afi Hehoo lɛ mli hiamɔ nii titri. (2 Mose 12:3-9) Anaa mliki loo fufɔ hu kɛjɛɔ tooi lɛ amli be fɛɛ be, ni anyɛɔ anuɔ ni anyɛɔ akɛfeɔ keesuu hu.—1 Samuel 17:17, 18; Hiob 10:10; Yesaia 7:21, 22.
Tooi lɛ akwɛmɔ lɛ yeŋ emuu kɛji okadiii tsakpaa ni bɛŋkɛ kpaakpa ni ka tooku lɛ kɛ amɛkwɛlɔ lɛ teŋ lɛ. Tookwɛlɔ anɔkwafo kwɛɔ etooi jogbaŋŋ. Taakɛ Yesu tsi ta lɛ, amɛyooɔ amɛkwɛlɔ lɛ gbee ni amɛbaa kɛji ekɛ amɛgbɛi tsɛ amɛ. (Yohane 10:3, 4) Kɛji ekome laaje lɛ, tookwɛlɔ ni hiɛ yɔɔ ehe nɔ lɛ yataoɔ lɛ. Kɛji ena too ni laaje lɛ, ekolɛ ewoɔ lɛ etswaa ekɔŋ, ni ehiɛɔ lɛ kɛbafataa nɔ ni eshwɛ yɛ kuu lɛ mli lɛ ahe.—Luka 15:4, 5.
David kɛ lɛ diɛŋtsɛ eniiashikpamɔ ni ena yɛ tooku ko kwɛmɔ mli lɛ tsu nii beni ekɛ ehe to too ni Yehowa ji e-Kwɛlɔ he lɛ. Abu David he, taakɛ abuɔ tooi ahe kɛjɛɔ kooloi ni batutuaa amɛ lɛ adɛŋ lɛ. Tooi lɛ nyɛɔ amɛnyiɛɔ amɛkwɛlɔ ni buɔ amɛhe lɛ hiɛnyiɛmɔ sɛɛ. Kɛji amɛpila lɛ, etoɔ amɛpilamɔi lɛ anɔ ehaa amɛ, ekolɛ kɛ mu ni jɔɔ hewaa he. Kwɛ bɔ ni eyɔɔ sɔrɔto kwraa kɛji akɛto Israel hiɛnyiɛlɔi hiɛjoolɔi, ni awie amɛhe yɛ Ezekiel 34:3-8 lɛ ahe!
Gbalɛ kɛ mfoniri-feemɔŋ wiemɔi pii ni kɔɔ tooi ahe yɛ Biblia lɛ mli. No hewɔ lɛ kɛji oyakwɛ, ní ole tooi ni yɔɔ Shiwoo Shikpɔŋ lɛ nɔ lɛ jogbaŋŋ lɛ, ebaanyɛ eha shishinumɔ ni oyɔɔ yɛ wiemɔi tamɔ ‘tooku bibioo,’ “Nyɔŋmɔ Toobi lɛ,” kɛ “tooi krokomɛi” ahe lɛ mli akwɔ.—Luka 12:32; Yohane 1:36; 10:16.
[Shishigbɛ niŋmai]
a Obaanyɛ okase mfoniri ni yɔɔ abɛkugbɛ ni ji tooi komɛi ni nyiɛ Yudea ŋa lɛ nɔ lɛ he nii yɛ 1992 calendar of Jehovah’ s Witnesses lɛ mli
[He ni Mfoniri ni yɔɔ baafa 24 lɛ Jɛ]
Pictorial Archive (Near Eastern History) Est.
[He ni Mfoniri ni yɔɔ baafa 25 lɛ Jɛ]
Garo Nalbandian