Maŋtsɛyeli Jajelɔi Bɔ Amaniɛ
Yehowa Wo Obalaŋta Anɔkwafo ko Nyɔmɔ
OBALAŊTAI anɔkwafoi ahe yɛ sɛɛnamɔ waa yɛ Yehowa hiɛ. Esa akɛ obalanyo ko niiashikpamɔ ni nyiɛ sɛɛ nɛɛ awo obalaŋtai krokomɛi lɛ hewalɛ ni amɛhiɛ amɛ emuuyeli mli beni amɛsɔmɔɔ Yehowa lɛ.
Yɛ Argentina lɛ, gbekɛ nuu ko ni eye afii 11 kɛ enyɛminuu fioo kɛ amɛnaa kase Anɔkwale ni kɛ Mɔ Yaa Naanɔ Wala MIi wolo lɛ. Amrɔ nɔŋŋ pɛ kɛkɛ ni gbekɛbii hii nɛɛ afɔlɔi bɔi shitee-kɛ-woo, ni amɛtsi gbekɛbii hii nɛɛ anaa akɛ amɛkaya kpeei yɛ Maŋtsɛyeli Asa lɛ nɔ. Bɔni afee ni amɛnyɛ amɛya kpeei lɛ, yɛ be kplaŋ ko mli lɛ, gbekɛbii lɛ tsɔɔ hejuuhe samfɛlɛ mli, ni amɛtũɔ amɛyiɔ ablanaa lɛ nɔ, kɛkɛ lɛ amɛjɛ jɛmɛ amɛkwɔ gbogbo lɛ kɛyi shia ni tsa amɛnɔ lɛ ablanaa nɔ, kɛkɛ lɛ amɛtee Maŋtsɛyeli Asa lɛ nɔ. Kɛkɛ ni mɔ ko yakɛɛ amɛnyɛ akɛ amɛyaa kpeei ni Yehowa Odasefoi feɔ lɛ. Amɛnyɛ wo amɛhe gbeyei akɛ ebaayi amɛ, ni enɛ wo gbekɛ nuu fioo lɛ he gbeyei, ni no ha ekpa nikasemɔ lɛ. Shi mɔ ni hiɛ efa fioo lɛ tee nɔ. Ebɔ mɔdɛŋ etee kpeei aahu afii enumɔ sɔŋŋ ni efɔlɔi leee akɛ eyaa.
Beni eye afii 16 lɛ, eesumɔ ni etsa enikasemɔ lɛ nɔ yɛ skul wulu ko, shi atsɔɔɔ nɔ ni etaoɔ ekase lɛ yɛ skul ni yɔɔ he ni amɛyɔɔ lɛ. Kɛji eshi shia lɛ, no baaha ena heyeli babaoo ni enyɛ ekɛdi anɔkwale lɛ sɛɛ. Efɔlɔi kpɛlɛ nɔ akɛ amɛbaaha eya, ni nɔ fɛɛ nɔ tee nɔ pɛpɛɛpɛ nyɔji etɛ. Kɛkɛ ni skul nɔkwɛlɔ lɛ bɔ efɔlɔi amaniɛ akɛ amɛbinuu lɛ ŋaaa aflaŋaa ni elaaa jakumaŋ lala lɛ hu. No hewɔ lɛ atsɛ lɛ kɛba onukpai babaoo ni ji skul nɔkwɛlɔ lɛ, efɔlɔi, woloŋmalɔ, mlalelɔ, kɛ tsɔɔlɔi onukpai nyɔŋma hiɛ, shi obalanyo lɛ nyɛ eye odase jogbaŋŋ kɛmɔ shi yɛ nɔ hewɔ ni enyɛŋ ekɛ ehe awo nifeemɔi nɛɛ amli kɛ henilee kpakpa lɛ he. (2 Mose 20:4, 5) Efɔlɔi amli fu lɛ waa. Kɛkɛ ni enyɛ yahe tu kɛ jwɛŋmɔ akɛ ebaatswa gbekɛ lɛ naa, ejaakɛ esusuɔ akɛ lɛ eha enɛɛmɛi fɛɛ ba. Shi be fɛɛ be ni ebaana lɛ lɛ, mɔ ko fata ehe.
Yɛ sɛɛ mli, yɛ weku lɛ naanyo ko ŋaawoo naa kɛ skul nɔkwɛlɔ lɛ hu nɔkpɛlɛmɔ naa lɛ, fɔlɔi lɛ kpɛ amɛyiŋ akɛ amɛkɛ obalanyo lɛ baaya helatsamɔ hé ni akwɛɔ jwɛŋmɔŋ hela yɛ lɛ ni akwɛ lɛ, kɛ jwɛŋmɔ akɛ jwɛŋmɔŋ helatsamɔ lɛ baaha eŋmɛɛ ehemɔkɛyeli lɛ he. Helatsamɔ hé nitsulɔi lɛ wóɔ gbekɛ nuu lɛ yɛ kar mli kɛfaa gbɛ kilomitai 100 ni amɛkɛ insulin kɛ tsofai krokomɛi babaoo gbuɔ lɛ aahu kɛyashiɔ be mli ni nɔ nyɔɔ enɔ. Kɛji ehiɛ tserɛ lɛ lɛ, ejwɛŋmɔ fɛɛ futuɔ yɛ eyitsoŋ, ni eleee mɔ ko mɔ ko, ni enɛ ha ena jwɛŋmɔŋ hela ni haa mɔ hiɛ kpaa nii anɔ lɛ yɛ be ko mli. Beni datrɛfoi lɛ kwɛ lɛ jogbaŋŋ aahu sɛɛ lɛ, amɛna akɛ amɛnaaa jwɛŋmɔ naagba ko yɛ ehe. Shi helatsamɔ hé lɛ tee nɔ kɛ tsofai ni amɛkɛgbuɔ lɛ lɛ. Kɛji ehiɛ tserɛ lɛ lɛ, gbekɛ nuu lɛ yaa nɔ esɔleɔ ehaa Yehowa ni ekakwa lɛ, ni ekpaa lɛ fai ni eha lɛ hewalɛ ni ekɛŋmɛ etsui shi. Yehowa bu ehe hu, ni yɛ naagbee lɛ ajie lɛ kwraa kɛjɛ helatsamɔ he lɛ.
Gbi ko lɛ skul nɔkwɛlɔ lɛ bi obalanyo lɛ kɛji efee klalo ni ebaashwa ehe ni etsake gbɛ ni ekɔ lɛ. Beni eha hetoo dabi lɛ, skul nɔkwɛlɔ lɛ kɛɛ efɔlɔi ni amɛbajie lɛ kɛya helatsamɔ hé lɛ ejaakɛ eye sɛkɛ kwraa po fe tsutsu lɛ. Kɛkɛ ni efɔlɔi bajie lɛ kɛtee skul ni nikaselɔi lɛ wɔɔ jɛmɛ lɛ eko ni amɛkɛɛ awura ni kwɛɔ skulbii lɛ anɔ lɛ ni ekwɛ ni gbekɛ nuu lɛ akaya Yehowa Odasefoi akpeei. Beni fɔlɔi lɛ shi lɛ amɛtee lɛ, kwɛ bɔ ni gbekɛ nuu lɛ naa kpɛ ehe ha! Skul lɛ nɔtsɛmɛi lɛ, Yehowa Odasefoi ji amɛ! Yɛ naagbee lɛ, efɔlɔi ha akpa jwɛŋmɔŋ helatsamɔ lɛ kɛ lɛ hamɔ, beni amɛkpɛlɛ nɔ akɛ lɛlɛŋ datrɛfoi lɛ elaka amɛ lɛ sɛɛ. Yɛ nɛkɛ be nɛɛ mli lɛ, Saneyeli He Wulu Fe Fɛɛ ni yɔɔ Argentina lɛ kpɛ yiŋ yɛ mla naa akɛ anyɛŋ ashwie Yehowa Odasefoi abii kɛjɛ skul yɛ aflaŋaa ni amɛŋaaa lɛ hewɔ.
Ani nɛkɛ kaai nɛɛ ahe ba sɛɛnamɔ kɛha obalaŋta anɔkwafo nɛɛ? Hɛɛ. Ewie akɛ: “Minyɛ miye odase jogbaŋŋ mitsɔɔ datrɛfoi, tsɔɔlɔi onukpai, minanemɛi skulbii, fɔlɔi, kɛ wekumɛi, yɛ anɔkwale mli lɛ, miye maŋ muu lɛ fɛɛ odase. Mifɔlɔi ahe ejɔ fioo ni amɛle Odasefoi lɛ ahe saji saŋŋ bɔ ni sa. Amrɔ nɛɛ, kɛ miku misɛɛ mikwɛ migbekɛbiiashi lɛ, minaa bɔ ni wɔ-Nyɔŋmɔ lɛ he yɔɔ naakpɛɛ ha ni eyɔɔ suɔmɔ hu yɛ mɛi ni yeɔ lɛ anɔkwa lɛ akwɛmɔ mli. Etamɔ bɔ ni lalatsɛ lɛ kɛɛ yɛ Lala 27:10 lɛ pɛpɛɛpɛ: ‘Shi mitsɛ kɛ minyɛ eshi mi moŋ, shi Yehowa hereɔ mi atuu.’”
Obalanyo nɛɛ eye afii 23 bianɛ, ni ebote gbalashihilɛ mli, ni eyɛ ekaa waa yɛ Yehowa sɔɔmɔ mli. Lɛlɛŋ, Yehowa hewalɛ ni wajeɔ mɔ lɛ bɛ naagbee.—Lala 55:23.