Efe Akulashiŋi ni Anaa He Miishɛɛ Kɛkɛ

Gbɔi nyaa akulashiŋi ni yɔɔ Mediteranea Ŋshɔ lɛ mli yɛ Kaisarea, blema lɛji adaamɔ he ni yɔɔ Israel ŋshɔnaa lɛ he. Herode Kpeteŋkpele lɛ ji mɔ ni ma lɛji adaamɔ he nɛɛ ni ekɛ Kaisare Augusto gbɛi wo maŋtiase lɛ akɛ woo ni ekɛhaa lɛ.

Shitsalɔi ni taoɔ blema nibii ena maŋ lɛ fa titri, ni maŋ lɛ shwɛmɔ he wulu lɛ hu fata he. Amɛmu mele kɛtee ŋshɔ lɛ shishi koni amɛyakwɛ bɔ ni ama lɛji adaamɔ he lɛ yɛ ŋshɔ kɛ enaa shia babaoo lɛ nɔ aha.

The New York Times (January 8, 1991) bɔ amaniɛ akɛ ana akulashiŋi yɛ maŋtsɛwe ko ni ekumɔ ni tsutsu lɛ ekpoo enaa shi ewo ŋshɔ lɛ mli lɛ mli. Akulashiŋi krɛdɛɛi komɛi nɛ ejaakɛ aŋmala Roma amralofoi komɛi ni tsutsu lɛ aleee amɛ lɛ agbɛi yɛ nɔ. Atsi lɛji “anɔkwɛlɔ” hu ta, ni “eji klɛŋklɛŋ niŋmaa kwraa ni ana ni kɔɔ lɛji adaamɔ he lɛ he.”

Biblia kaselɔi le akɛ bɔfo Paulo ta lɛlɛ mli kɛba nɛkɛ lɛjiadaamɔ he nɛɛ yɛ be mli ni egbe emaŋsɛɛ sanekpakpa shiɛmɔ gbɛfaa enyɔ naa. Ekɛ sanekpakpa shiɛlɔ Filipo hi shi yɛ biɛ, ni eniiashikpamɔi lɛ wo kaselɔi lɛ hewalɛ babaoo. (Bɔfoi lɛ Asaji 18:​21, 22; 21:​7, 8, 16) Wɔbaanyɛ wɔkane niiashikpamɔi ni yɔɔ miishɛɛ nɛɛ babaoo yɛ Bɔfoi lɛ Asaji awolo lɛ mli.

No hewɔ lɛ, nɛkɛ akulashiŋi ni yɔɔ ŋshɔ lɛ naa nɛɛ jeee blema nibii ni eshwɛ ni sɛɛnamɔ ko bɛ he. Ehaa Kristofoi kaiɔ amɛ mra be mli nyɛmimɛi ni kɛ ekaa shiɛ sanekpakpa lɛ yɛ lɛji adaamɔ hei “kɛyashi shikpɔŋ lɛ naagbee hei lɛ.”​—Bɔfoi lɛ Asaji 1:8

[He ni Mfoniri ni yɔɔ baafa 32 lɛ Jɛ]

Garo Nalbandian