Maŋtsɛyeli Jajelɔi Bɔ Amaniɛ

‘Nikpamɔ’ yɛ Venezuela

Be ko lɛ Yesu kɛ shiɛmɔ nitsumɔ lɛ to daa afi nikpamɔ he. (Mateo 9:​36-38) Nikpamɔ Nuŋtsɔ lɛ ji Yehowa Nyɔŋmɔ, ni lɛlɛŋ nikpamɔ lɛ fa waa diɛŋtsɛ yɛ shikpɔŋ muu lɛ fɛɛ nɔ. Nɔ ni fata enɛ he ji shikpɔŋkuku ni afɔɔɔ mli nitsumɔ yɛ Venezuela lɛ.

Buu-Mɔɔ Asafo lɛ nitsumɔ he nine ni yɔɔ Venezuela lɛ bɔ nɔ ni ba beni Odasefoi akuu ko yatsu nii yɛ Sabana Grande shikpɔŋkuku lɛ mli, yɛ Guárico State lɛ he amaniɛ. Odasefoi lɛ gba akɛ: “Shia ni akɛha wɔ ni wɔhi mli lɛ sa waa kɛha nikasemɔ feemɔ, no hewɔ lɛ wɔje shishi amrɔ nɔŋŋ ni wɔbɔi mɛi anine fɔɔ koni amɛba kpeei yɛ jɛmɛ. Gbɔmɛi lɛ leee Yehowa Odasefoi ahe sane ko kwraa. Eyɛ mli akɛ sanekpakpa shiɛlɔi asɔlemɔi ejwɛ yɛ maŋ lɛ mli moŋ, shi gbɔmɛi lɛ kɛ hiɛdɔɔ babaoo miitao amɛkase nii kɛjɛ Biblia lɛ mli.

“Wɔkɛ ŋmɛlɛtswai etɛ tsu nii yɛ leebi mli kɛ ŋmɛlɛtswai etɛ hu yɛ shwane mli, ni wɔtee shia kɛ shia ni wɔyafɔ mɛi anine kɛha kpee ni wɔbaafee enɔ gbɛkɛ lɛ. Wɔbɛ sɛ̃ii, no hewɔ lɛ wɔkɛɛ amɛ ni amɛkɛ amɛ diɛŋtsɛ amɛsɛ̃ii aba. Beni be bashɛ ni esa akɛ wɔkɛje kpee lɛ shishi pɛ kɛkɛ ni gbɔmɛi lɛ bɔi baa, ni amɛteŋ mɔ fɛɛ mɔ tere sɛi. Beni agbe kpee lɛ naa lɛ, wɔkɛɛ amɛ akɛ wɔbaasumɔ ni wɔŋmala mɛi fɛɛ ni sumɔɔ ni akɛ amɛ afee shia Biblia mli nikasemɔ yaka lɛ agbɛi. Mɛi 29 ni ba kpee lɛ ateŋ mɔ fɛɛ mɔ miisumɔ ni aŋma egbɛi afata he.

“Beni naagbee mɔ lɛ tee ni wɔŋaa shinaa lɛ, wɔna akɛ hii etɛ damɔ tsu lɛ koŋ. Aaafee ŋmɛji nɛɛhu mli lɛ, wɔfee klalo ni wɔbaatara shi ni wɔye nii pɛ kɛkɛ ni amɛtswa wɔshinaa lɛ. Amɛbi wɔ saji tamɔ: ‘Mɛni ji nɛkɛ shiɛmɔ ni nyɛshiɛɔ yɛ maŋ nɛɛ mli lɛ? Mɛɛ yiŋtoo hewɔ nyɛfee kpee yɛ biɛ gbɛkɛ nɛɛ lɛ?’

“Wɔbi amɛ kɛji wɔtɔ̃ mla ko nɔ. Amɛha hetoo akɛ dabi ni amɛkɛɛ akɛ amɛji sanekpakpa shiɛmɔ sɔlemɔi etɛ ni yɔɔ maŋ lɛ mli lɛ amli osɔfoi. Amɛhao waa diɛŋtsɛ ejaakɛ amɛsɔlemɔ tsũi lɛ mli kamɔ shi efolo nakai gbɛkɛ lɛ. Wɔha amɛba mli ni wɔgbala wɔnitsumɔ lɛ mli wɔtsɔɔ amɛ. Wɔha amɛ wɔwoji lɛ eko hu ni wɔkɛɛ amɛ ni amɛku amɛsɛɛ amɛba ekoŋŋ enɔ Soo ni nyiɛ sɛɛ lɛ.

“Enɔ Soo lɛ, osɔfoi lɛ ku amɛsɛɛ amɛba, ni mɛi krokomɛi 22 ni miitao amɛnu nɔ ni wɔyɔɔ kɛɛmɔ fata amɛhe kɛba. Osɔfoi lɛ susu akɛ, akɛni wɔfee yei hewɔ lɛ, wɔshɛko mɛi ni he esa ni wɔbaanyɛ wɔkɛ amɛ asusu saji ahe. Shi yɛ enɛ fɛɛ sɛɛ lɛ, kpee lɛ ye omanye jogbaŋŋ diɛŋtsɛ, yɛ wɔsusumɔ naa. Yɛ naagbee lɛ, wɔgbala mli wɔtsɔɔ amɛ akɛ wɔmiiŋmala mɛi fɛɛ ni miisumɔ ni amɛkase nii babaoo kɛjɛ Biblia lɛ mli lɛ agbɛii. Mɛi ni fata osɔfoi lɛ ahe kɛba lɛ ateŋ mɛi pii miitao ni akɛ amɛgbɛi afata he, ni mɛi komɛi po kɛɛ akɛ amɛmiisumɔ ni amɛfata wɔhe yɛ shiɛmɔ nitsumɔ lɛ mli!

“Wɔgbala mli wɔtsɔɔ amɛ akɛ Biblia mli nilee babaoo kɛ tsɔsemɔ he baahia dani amɛbaanyɛ amɛ-fata wɔhe yɛ shiɛmɔ nitsumɔ lɛ mli. Daa gbi lɛ, gbɔmɛi baa wɔshia lɛ, ni amɛbiɔ wɔ ni wɔgbala Biblia lɛ mli wɔha amɛ. Bei komɛi, kɛji wɔwie aahu kɛyashi jenamɔ yi ewa lɛ, ebiɔ po ni wɔkɛɛ amɛ ni amɛya shia. Beni eba akɛ wɔbaashi shikpɔŋkuku lɛ mli kwraa lɛ, edɔ amɛ waa diɛŋtsɛ ni amɛkɛɛ wɔ akɛ kɛji wɔku wɔsɛɛ wɔba ekoŋŋ lɛ, amɛbaafata wɔhe yɛ shiɛmɔ nitsumɔ lɛ mli. Amɛwo wɔ shi akɛ, no mli lɛ amɛnyɛ amɛtee amɛhiɛ bɔ ni ataoɔ lɛ.”

Beni Odasefoi lɛ shi shikpɔŋkuku lɛ mli lɛ, no mli lɛ mɛi 40 miisumɔ ni amɛkase Biblia lɛ. Akɛ mɛi ni yɔɔ wiemɔ lɛ he miishɛɛ nɛɛ agbɛi ha asafo ni bɛŋkɛ amɛ, ni kɛ amɛ jɛkɛmɔ aaafee kilomitai 50 lɛ. Nɔ ni nyiɛ enɛ sɛɛ ji, Odasefoi ni jɛ maŋtiase kroko mli efa kɛtee nɛkɛ maŋ nɛɛ mli, ni ato sanekpakpa shiɛlɔi akuu ko ni yɔɔ ekaa babaoo shishi.