Nɔ ni Sɔlemɔ Tsɔɔ

“Yɛ Hebri wiemɔ mli lɛ, wiemɔ titri kɛha sɔlemɔ lɛ baa kɛjɛɔ shishifa wiemɔ, ‘akojo’ mli, ni bɔ ni ekɔɔ mɔ lɛ diɛŋtsɛ he ehaa lɛ . . . tsɔɔ ‘ni mɔ akojo lɛ diɛŋtsɛ ehe.’” Nɛkɛ ji bɔ ni The Authorised Daily Prayer Book lɛ tsɔɔ. Nɔ ni etsɔɔ kɛfata he ji akɛ, nɔ ni sɔlemɔ tsuɔ lɛ ateŋ ekome ji akɛ esa akɛ eye ebua gbɔmɔ lɛ koni ena akɛ ani eshɛɔ Nyɔŋmɔ jalɛ tɛi ni efolɔ eshwie shi lɛ kɛ etaomɔ nii ahe lo.

Yɛ yiŋtoo nɛɛ hewɔ lɛ, akɛɔ wɔ yɛ Biblia lɛ mli fɛɛ akɛ, kɛ mɔ ko efeee Nyɔŋmɔ suɔmɔnaa nii lɛ, aboŋ esɔlemɔi lɛ atoi. “Yehowa kɛ mɛi fɔji ateŋ jɛkɛ; shi eboɔ jalɔi afaikpamɔi atoi.”​—Abɛi 15:​29; 1 Yohane 5:⁠14.

Eka shi faŋŋ akɛ ni mɔ ko aaaka lɛ diɛŋtsɛ ehe ekwɛ yɛ Yehowa Nyɔŋmɔ hiɛ lɛ baaha mɔ ni sɔleɔ lɛ aba ehe shi ni ena tsui ni he jɔ. Enɛ haa wɔnaa Yesu abɛbua ni kɔɔ Farisifonyo ni pupuɔ ehe lɛ kɛ toohelɔ ni tsui ekumɔ ni ba sɔlemɔ we lɛ koni ebasɔle lɛ ahe lɛ mli jogbaŋŋ.​—Luka 18:​9-14.

No hewɔ lɛ kɛ wɔmiisɔle wɔha Yehowa ni wɔkɛda lɛ shi, wɔkɛjie eyi, loo wɔkpa nɔ ko he fai lɛ, sɔlemɔ bafeɔ be ni esa akɛ wɔkɛka wɔ diɛŋtsɛ wɔhe loo wɔpɛi wɔmli wɔkwɛ yɛ be fɛɛ mli. Yɛ nɛkɛ gbɛ nɔ lɛ, belɛ sɔlemɔ gbalaa wɔ kɛbɛŋkɛɔ Yehowa he ni ewajeɔ wekukpaa ni ka wɔkɛ lɛ teŋ lɛ.