Maŋtsɛyeli Jajelɔi Bɔ Amaniɛ
Amɛkɛ Amɛhiɛ Fɔ Yehowa Nɔ
YEHOWA kɛ famɔ eha Yehowa Odasefoi fɛɛ ni amɛshiɛ Maŋtsɛyeli lɛ he sanekpakpa lɛ yɛ je lɛŋ fɛɛ bɔni afee ni gbɔmɛi ni jɛ jeŋmaji fɛɛ mli ana hegbɛ ni amɛle Nyɔŋmɔ jeŋ hee lɛ he sane. Yɛ maji komɛi anɔ lɛ, efɔɔ kaa akɛ Kristendom osɔfoi lɛ yawoɔ yiŋ, ni atsiɔ wɔnitsumɔ lɛ naa. Nɛkɛ ji bɔ ni ebalɛ yɛ maŋ ko nɔ yɛ Afrika. Shi Yehowa Odasefoi ni yɔɔ jɛmɛ lɛ feɔ amɛnii tamɔ Maŋtsɛ David fee lɛ. Ekɛɛ: “Nyɔŋmɔ nɔ mihiɛ ka, misheee gbeyei.” (Lala 56:12) Niiashikpamɔi ni wɔnyɛmimɛi ni yɔɔ nakai maŋ lɛ mli lɛ ena lɛ tsɔɔ akɛ amɛkɛ amɛhiɛ fɔɔ Yehowa nɔ ni amɛyaa nɔ kɛ enitsumɔ ni he hiaa lɛ.
Odasefonyo ko ni miitsu nii akɛ tsɔɔlɔ nukpa yɛ skul ko lɛ ma nɔ mi akɛ ebaabo “Nyɔŋmɔ moŋ toi akɛ nɔyelɔ fe gbɔmɛi,” ni ejaje bɔ ni ekɛ ehe woŋ maŋ saji amli lɛ etsɔɔ faŋŋ. (Bɔfoi lɛ Asaji 5:29, NW) Ayi lɛ waa diɛŋtsɛ ni aakpa gbɛ akɛ abaakojo lɛ akɛ maŋjwalɔ. Mɔ fɛɛ mɔ susu akɛ abaagbe lɛ. Shi kɛlɛ, Odasefonyo Iɛ kɛ ehiɛ fɔ Yehowa nɔ. Etee nɔ eye anɔkwa ni etsɔɔ yiŋtoi kpakpai ahewɔ ni ekɔ shidaamɔ ni tamɔ nakai lɛ mli. Mɛni jɛ mli ba? Aŋmɛɛ ehe akɛ eyeee fɔ ni akɛ lɛ ku sɛɛ kɛtee emaŋ, ni ebalɛ akɛ Maŋ lɛ najiaŋdamɔlɔi ni yi Iɛ ayakpa lɛ fai yɛ jɛmɛ. Asaa ahe nɛkɛ Odasefonyo anɔkwafo nɛɛ awo nitsɔɔmɔ nitsumɔ lɛ mli ekoŋŋ ni awo enɔ ni aha lɛ hegbɛ akɛ skul sɔrɔtoi lɛ anɔkwɛlɔ!
Skul nɔkwɛlɔ ko ha ashwie Odasefonyo tsɔɔlɔ ko kɛjɛ skul. Nyɔŋ kome sɛɛ lɛ, nɛkɛ nɔkwɛlɔ nɛɛ he Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ eko kɛjɛ gbɛgbalɔ krɛdɛɛ ko dɛŋ ni ekpɛlɛ Biblia mli nikasemɔ nɔ. Beni amɛgbe yitso 6 naa lɛ, ekpa nitsumɔ akɛ skul nɔkwɛlɔ, ni lɛ kɛ eŋa bɔi Yehowa Odasefoi akpeei fɛɛ yaa. Hɔgbaa leebi ko lɛ, nakai tsɔɔlɔ ni eshwie lɛ lɛ naa kpɛ ehe kɛ miishɛɛ babaoo akɛ ekɛ nuu ni shwie lɛ Iɛ aaakpe ni ena ele akɛ lɛ hu enyiɛ gbɛ kɛmiiba ebatsɔ mumɔŋ nyɛminuu.
Niiashikpamɔ kroko ni jɛ nakai maŋ lɛ nɔŋŋ mli feɔ bɔ ni Yehowa Odasefoi jieɔ bulɛ kpo amɛtsɔɔ Yehowa gbɛjianɔtoo ni amɛtsuɔ nii waa ni amɛkɛha asafo lɛ he atse lɛ he mfoniri. Gbɛgbalɔ krɛdɛɛ ko ni miitsu nii yɛ he ko banee ko lɛ kɛ shitee-kɛ-woo babaoo kpe. Akɛni ejɛ maŋ kroko nɔ yɛ kpokpaa kroko mli hewɔ lɛ, anɔkwale lɛ henyɛlɔi miitao amɛshwie lɛ kɛjɛ akrowa lɛ. Shi kɛlɛ, akrowa lɛ maŋtsɛ lɛ wie ejeŋba kpakpa kɛ nibii kpakpai ni jɛɔ esɔɔmɔ nitsumɔ lɛ mli baa lɛ he waa ni no hewɔ lɛ eŋmɛɛɛ gbɛ ni ashwie lɛ. Maŋtsɛ lɛ ekadi akɛ kɛjɛ be mli ni gbɛgbalɔ krɛdɛɛ nɛɛ bashɛ nakai akrowa lɛ nɛɛ, gbɔmɛi kɛ woo haa hegbɛi ni yeɔ nɔ Iɛ waa kɛtsɔ amɛtoo ni amɛwoɔ kɛ agbɛnɛ kɛtsɔ kwamaŋ nitsumɔ ni ji gbɛ saamɔ ni amɛfeɔ shikome yɛ otsi mli lɛ nɔ.—Romabii 13:1, 7.
Kɛkɛ ni, gbi ko nyɔɔŋ mli lɛ amɔ Odasefonyo ko ni ekɛ yoo kroko ni jeee Odasefonyo miifite gbala. Ebafee hiɛgbejiasane, ni abatsɛ gbɛgbalɔ krɛdɛɛ lɛ kɛtee maŋtsɛ lɛ hiɛ, ni asha ehiɛ waa ni akɛɛ: “Naa onyɛminuu lɛ ni amɔ lɛ yɛ gbalafitemɔ mli. Sɔrɔto ko kwraa bɛ nyɛ Yehowa Odasefoi lɛ kɛ jamɔi krokomɛi ni eshwɛ lɛ ateŋ.” Shi kɛlɛ, gbɛgbalɔ krɛdɛɛ Iɛ tsɔɔ mli akɛ: “Eyɛ mli akɛ wɔyeee emuu moŋ, shi esoro wɔ kwraa yɛ jamɔi krokomɛi lɛ ahe ejaakɛ wɔkuuu wɔhiɛ wɔshwieee mɛi ni feɔ eshai ni hiɛdɔɔ yɔɔ he lɛ anifeemɔi anɔ.”
Ayawo nɛkɛ Odasefonyo gbalafitelɔ nɛɛ tsuŋ ni agbe lɛ shika gbele hu. Yɛ no sɛɛ lɛ, ashwie lɛ kɛjɛ asafo lɛ mli akɛ efɔŋfeelɔ ni tsakeee etsui. Nɛkɛ nifeemɔ nɛɛ sa maŋtsɛ Iɛ hiɛ aahu akɛ eha mɛi ni yeɔ Yehowa Odasefoi ahe fɛo lɛ kpa nakai wiemɔi lɛ. Maŋtsɛ lɛ wie akɛ: “Nyɛkagbea Yehowa Odasefoi lɛ ahe guɔ. Amɛ amɛhiɛ anɔkwale lɛ. Jamɔi krokomɛi lɛ efeee nɔ ko ni tamɔ nɛkɛ.”
Odasefoi anɔkwafoi ni yɔɔ nakai maŋ lɛ mli Iɛ nyiɛɔ ŋaawoo ni yɔɔ Lala 37:3 Iɛ sɛɛ: “Ŋɔɔ ohiɛ ofɔ Yehowa nɔ, ni ofee akpakpa; hii shikpɔŋ lɛ nɔ, ni oye anɔkwa.” Ani wɔkɛ wɔhiɛ baafɔ Yehowa nɔ tamɔ bɔ ni nɛkɛ Kristofoi nɛɛ feɔ lɛ?