Ekpe Sɛɛ Fe Bɔ Ni Amɛsusu!
AFI lɛ ji 609 D.Ŋ.B. He ni eba yɛ ji Yerusalem. Mɔ ni wie ji gbalɔ Yeremia. Egba Yerusalem, emaŋ krɔŋkrɔŋ ni asumɔɔ lɛ hiɛkpatamɔ he sane efɔ shi, hiɛkpatamɔ ko ni baaba ejaakɛ Yudafoi lɛ etsɔ amɛsɛɛ amɛha Yehowa ni amɛtuu amɛhe fɛɛ amɛha apasa nyɔŋmɔi ajamɔ. Amɛkɛ amɛhe woɔ jamɔ he bɔlɛnamɔ fɔŋ mli yɛ hei grɔŋŋi lɛ, ni amɛkɛ dãai afɔleshaai haa jeŋmaji anyɔŋmɔi, ni amɛjaa hulu kɛ nyɔŋtsere kɛ ŋulamii, ni amɛshãa tsofa-kɛ-ŋma amɛhaa Baal, ni amɛkɛ amɛbii shaa afɔle amɛhaa Molek.—1 Maŋtsɛmɛi 14:23, 24; Yeremia 6:15; 7:31; 8:2; 32:29, 34, 35; Ezekiel 8:7-17.
Yɛ amɛhiŋmɛiaŋ lɛ, Yeremia ji amanehulu he ŋoŋotswalɔ, mɔ ko ni yɔɔ shɛii, mɔ ni naaa nɔ ko nɔ ko kɛ mɔ ko mɔ ko he miishɛɛ. Yeremia kɛ afii 38 bɔ amɛ kɔkɔ; ni Yerusalem maŋ lɛ mlibii lɛ hu kɛ afii 38 ye ehe fɛo. Kɛbashi nɛkɛ be nɛɛ mli lɛ, gbɔmɛi lɛ ebuuu Yehowa kwraa amɛhaaa nɔ ko, ni amɛkɛɔ akɛ ejeee hewalɛ ko ni esa akɛ ahaa jwɛŋmɔ hiɔ enɔ. Amɛkɛɛ: “Yehowa efeŋ ekpakpa, ni esaa efeŋ efɔŋ hu!” kɛ, “Yehowa eshi shikpɔŋ lɛ, ni Yehowa enaaa!”—Zefania 1:12; Ezekiel 9:9.
Gbalɔ Yeremia kɛ gbalɔ Ezekiel eshiɛ Yerusalem hiɛkpatamɔ he sane lɛ be babaoo, shi nɔ ko bako. No hewɔ lɛ Israelbii lɛ tswa ninaai ni tamɔ nakai lɛ amlibaa yɛ amɛgbii lɛ amli lɛ amɛshɛ amɛfɔ, ni amɛkɛɛ: “Gbii lɛ miitsɛ, ni ninaa fɛɛ ninaa miilaje.” Shi hetoo ni Yehowa ha amɛ yɛ enɛ he ji akɛ: “Gbii lɛ ebɛŋkɛ . . . Ejaakɛ mi ji Yehowa lɛ, mibawie, ni wiemɔ ni mibawie lɛ aaaba mli. Atsiŋ kɛyaŋ sɛɛ dɔŋŋ; shi moŋ nyɛyinɔ nɔŋŋ mibawie wiemɔi lɛ, ni mibafee hu, nyɛ weku toigbolɔi!”—Ezekiel 12:22-25.
Yɛ afi 609 D.Ŋ.B. lɛ, be bashɛ agbɛnɛ ni Yehowa baaha ewiemɔ lɛ aba mli. Yɛ be mli ni Yeremia kɛ nɔ ni miihe ashɛ afii nyɔŋmai ejwɛ ebɔ kɔkɔ sɛɛ lɛ, Babilon asraafoi bawo Yerusalem maŋ lɛ fɛɛ he ka. Nyɔji nyɔŋma-kɛ-kpaanyɔ sɛɛ lɛ, akumɔ gbogboi lɛ, ni asha sɔlemɔ tsu lɛ, ni aloo maŋbii lɛ ateŋ mɛi pii kɛtee nomŋɔɔ mli kɛtee Babilon. Taakɛ agba afɔ shi lɛ, akpata maŋ lɛ hiɛ kɛtsɔ klante kɛ hɔmɔ kɛ gbele hela nɔ.—2 Maŋtsɛmɛi 25:7-17; 2 Kronika 36:17-20; Yeremia 32:36; 52:12-20.
Yeremia nɔ lɛ ja. Maŋbii lɛ anɔ ejaaa. Ekpe sɛɛ fe bɔ ni amɛsusu! Ninaa lɛ bɛ kɛha afii ni yɔɔ sɛɛ shɔŋŋ. Eyɛ kɛha amɛgbii lɛ.
Jeee yinɔsane ni eho kɛkɛ nɛ. Nɔ ni ba Yerusalem nɔ lɛ ji gbalɛ mlibaa. Efeɔ nɔ ko ni baaba he mfoniri. Ŋmɛnɛŋmɛnɛ beaŋ Kristendom kɔɔ Kristo gbɛi lɛ ni amɛkɛɔ akɛ amɛkɛ Nyɔŋmɔ yɛ kpaŋmɔ wekukpaa mli; shi kɛlɛ enyiɛɔ blema Yerusalem maŋbii lɛ ananemaahei lɛ asɛɛ. Atsɔɔ wɔŋjalɔi atsɔɔmɔi yɛ Kristendom sɔlemɔi lɛ fɛɛ mli, amɛkɛ bɔlɛnamɔ mli jeŋba shara ewo amɛhe muji, amɛnyiɛɔ hiɛ yɛ maŋkwramɔ gbɛjianɔtoi amli, amɛfiɔ je lɛŋ tai asɛɛ, amɛkpɛlɛɔ sutsakemɔ nɔ ni amɛtsiɔ Nyɔŋmɔ ni ji Bɔlɔ lɛ kɛyaa afa, ni amɛkpɛlɛɔ abifabii akpekpei abɔ ni afɔko amɛ ni akpataa amɛhiɛ bɔ ni asumɔɔ lɛ nɔ, ni amɛkpɛlɛɔ adesai ajeŋ nilee nɔ, ni amɛkɛɔ akɛ Biblia lɛ ji blema saji kɛ adesai.
Taakɛ bɔ ni gbɔmɛi ni hi Yerusalem lɛ ye Yeremia he fɛo lɛ, nakai nɔŋŋ Kristendom hu yeɔ Yehowa Odasefoi ahe fɛo ŋmɛnɛ. Amɛtswaa kɔkɔbɔɔ ni Odasefoi lɛ kɛhaa yɛ hiɛkpatamɔ ni baa yɛ Harmagedon he lɛ amɛfɔɔ akɛ ehe ehiaaa. Kristendom kɛɔ akɛ, ‘Shikpɔŋ nɛɛ he sane kɔɔɔ Nyɔŋmɔ he eko. Ha ni ehiɛ ŋwɛi bɔ ni esumɔɔ lɛ; wɔbaahiɛ shikpɔŋ lɛ bɔ ni wɔsumɔɔ lɛ. Ni kɛ Harmagedon aaaba lɛ, ebaŋ yɛ wɔyinɔ nɛɛ mli. Wɔnu nakai sane lɛ da. Wɔhaŋ nakai wiemɔ lɛ alaka wɔ dɔŋŋ!’
Ani enɛ baafee yinɔsane ni aasaa aati mli ekoŋŋ? Ani ebaafee be kroko ni mɛi akpekpei abɔ baayoo akɛ ekpe sɛɛ kwraa fe bɔ ni amɛsusuɔ?