“Hiɛsɔɔ Yaafonui”
“BIANƐ nɔŋŋ mikɛ hiɛsɔɔ yaafonui gbe sane ni ji ‘Bɔ ni Aaafee Aye Abua Mɛi ni Ena Jwɛŋmɔŋ Nɔnyɛɛ lɛ ni Amɛna Miishɛɛ Ekoŋŋ’ lɛ kanemɔ naa.” (The Watchtower March 15, 1990, baafai 26-30) Nɛkɛ ji bɔ ni aje woji pii ni Asafo lɛ nine eshɛ nɔ ni akɛmiitsɔɔ hiɛsɔɔ yɛ sane ni aŋma yɛ jwɛŋmɔŋ nɔnyɛɛ he yɛ March 1 kɛ March 15, 1990 nɔ lɛ amli lɛ ekome shishi. Shi kɛlɛ, nɛkɛ wiemɔi nɛɛ jɛ nyɛmiyoo ko ni yɔɔ Japan ni binuu na jwɛŋmɔŋ hela lɛ ŋɔɔ. Etsɔɔ mli akɛ:
“Akɛ mashɛje susuma ko ni ena jwɛŋmɔŋ nɔnyɛɛ lɛ mii ni mawo lɛ hewalɛ hu daa gbi lɛ, bei komɛi lɛ minuɔ he akɛ etɔ mi fe nine ni minyɛɛɛ maya nɔ. Kɛ duŋ wo lɛ, gbeyei mɔɔ mibinuu lɛ ni efeɔ yeyeeye. No hewɔ lɛ mihaa lɛ wɔ tsofa ni ekɔɔ ni mitaa esaatso lɛ he ni mikɛ miniji shwishwiaa edɛŋ ni mikɛ minine fɔɔ ehinaa kɛyashiɔ be mli ni eeewɔ. Etamɔ nɔ ni oowɔle abifao ni ewɔ yɛ saa mli, ni yɛ ŋmɛlɛtswaa kome sɛɛ lɛ, ewɔɔ vii. Nakai beaŋ ji be mli ni mihe jɔɔ mi, shi yɛ nakai beaŋ nɔŋŋ lɛ, mikɛɔ mihe akɛ wɔ leebi hu kɛ gbi kroko baaba ni matsu mli nii.
“Mibi lɛ kɛɔ akɛ, ‘Mihiii haaa nɔ ko nɔ ko. Hiɛnɔkamɔ ko kwraa bɛ ha mi.’ Daa gbi lɛ, ekɛ awerɛho biɔ mi akɛ, ‘Ani abaanyɛ atsa mihela nɛɛ? Mɛɛ be maye mihe kɛjɛ tsofai ahe? Bei enyiɛ nɛkɛ shihilɛ nɛɛ baaya nɔ kɛyashi?’ Kɛ eshɛ nɛkɛ bei amli lɛ mikɛ sanebimɔi tsuɔ nii ni mikɛtsakeɔ ejwɛŋmɔ taakɛ wolo tɛtrɛɛ lɛ wo ŋaa lɛ, ni no yeɔ ebuaa lɛ ni ehiɔ haa lɛ fioo kɛyashiɔ he ko. Shi wɔyaa nɔ kɛ nɔ kometoo lɛ nɔŋŋ daa gbi.
“Eshɛɔ bei komɛi po ni mibinuu lɛ tsɛɔ onukpai lɛ [wɔ asafo lɛ mli onukpai lɛ] yɛ nyɔɔŋteŋ kɛ efee yeyeeye kwraa fe nine lɛ ni ebiɔ amɛ ni amɛsɔle amɛha lɛ. Enɛ bafeɔ tamɔ miishɛjemɔ nɔ kpele ko kɛha lɛ, ni ehaa ejwɛŋmɔ he jɔɔ lɛ. . . . Yɛ bei babaoo mli lɛ, mibinuu lɛ hela lɛ mli bawaa kɛ miwu (ni jeee heyelilɔ) lɛ fa gbɛ kɛha nitsumɔ lɛ. Kɛ mitswa telifon ni mibi yelikɛbuamɔ lɛ, nyɛmimɛi babaoo kɛ foi baa wɔshia lɛ.
“Miida nyɛ shi kɛjɛ mitsui mli tɔɔ, nyɛmimɛi, yɛ saji ni tamɔ nɛkɛ ni nyɛŋmalaa yɛ be kɛ bei amli ni tsɔɔ akɛ nyɛsusuɔ mɛi ni egbɔjɔ lɛ ahiamɔ nii ahe lɛ hewɔ.” [Waonaa gbɛi] H. H.