Ani Ohiafoi Aaanyɛ Afee Anɔkwafoi?

Amelia eye gbii 29 pɛ beni enaa kɛ lɛ ba datrɛfonyo lɛ ŋɔɔ lɛ. Amelia nyɛ nyɛɛɛ afa gbɛ lɛ ejaakɛ ekɛ gbekɛbii krokomɛi ejwɛ lɛ ahe miiye yɛ shia.

Tsɛ lɛ yɛ he kroko ni eetao nitsumɔ. Datrɛfonyo lɛ tsu fufɔo lɛ he nii. Ana kwashiokor he okadi yɛ emli, enɛ jeee hela ko ni ekaaa yɛ Afrika Anaigbɛ. Shi enaagba lɛ diɛŋtsɛ ji cellulitis ni tamɔ nɔ ni fɔlɔ eba tsitsi mli. Hela yɛ Amelia tsitsi bibioo lɛ mli.

Yɛ be mli ni datrɛfonyo lɛ kɛ wolo ni aŋmala tsofai yɛ nɔ lɛ haa enaa lɛ, yoo nɛɛ bi akɛ: “Tsofai nɛɛ ajara baafee enyiɛ?” Datrɛfonyo lɛ ha hetoo akɛ, “cedii akpe kɛ ohai ejwɛ kɛmiiya cedii akpe kɛ ohai kpawo kɛ nyɔŋmai enumɔ.”

Naa nɛɛ gbigbili emli. Ebɛ cedii ohai kpawo po ni ekɛaawo helatsamɔ he lɛ nyɔmɔ lɛ. Yoo nɛɛ bo akɛ: “Je lɛŋ nɛgbɛ kwraa po wɔbaana shika ni tamɔ nɛkɛ lɛ kɛjɛ!”

Datrɛfonyo lɛ ma nɔ mi akɛ: “Esa akɛ ona eko kɛjɛ he ko. Kpa owekumɛi kɛ onanemɛi lɛ fai. Kɛ atsaaa nɛkɛ hela nɛɛ lɛ, ebaabote ela mli ni gbekɛ lɛ baagbo.”

Shi Amelia weku lɛ na shika lɛ yɛ gbɛ ko nɔ, ni abifao lɛ hi shi kɛbote enyɔŋ ni ji enyɔ lɛ mli. Shi gbɔmɛi akpekpei abɔ ni yɔɔ shikpɔji ni kpaako amɛnaa nɔyaa lɛ amli lɛ nyɛŋ ni amɛfa shika kɛjɛ amɛnanemɛi kɛ wekumɛi aŋɔɔ. Ni hiɛnɔkamɔ ko bɛ akɛ aaaya hiɛ yɛ shika-helɛtemɔ mli.

The State of the World’s Children Report 1989 ni UNICEF (United Nations Children’s Fund) ŋma lɛ jaje akɛ: “Yɛ be mli ni akɛ afii nyɔŋma-nyɔŋmai abɔ etee hiɛ yɛ shika-helɛtemɔ mli lɛ, hei babaoo yɛ je lɛŋ ni amɛmiikplaŋ kɛmiiya sɛɛ kɛmiibote ohia mli.” Shika ni anaa yɛ Afrika kɛ Latin Amerika kɛ aja mli lɛ gbee shi kɛjɛ oha mlijaa 10 kɛbashɛ oha mlijaa 25 yɛ 1980 afii lɛ amli. Ni yɛ afii fioo ni eho nɛɛ amli lɛ, shika ni je lɛŋ maji ni yeɔ ohia fe fɛɛ lɛ ateŋ maji 37 fiteɔ yɛ gbɔmɔtsoŋ hewalɛnamɔ he lɛ ba shi kɛ oha mlijaa 50.

Mɛni ji nɔ ni enɛ tsɔɔ kɛhaa akpekpei abɔ ni yeɔ ohia lɛ? Kɛha mɛi pii lɛ, nɔ ni etsɔɔ nɔŋŋ ji akɛ amɛnyɛŋ amɛhe niyenii loo tsofa ni he hiaa amɛ lɛ. No hewɔ lɛ, amɛbii, gbalashihilɛ mli hefatalɔi loo fɔlɔi kɛ gbele fɔbuu ni esaaa baakpe, ja amɛyatao shika yɛ gbɛ kome pɛ ni ka shi ha amɛ lɛ nɔ​—kɛtsɔ juu nɔ! Hɛɛ, nɔ ni ohia baanyɛ atsɔɔ ji jeŋba mli naagbai ni naa wa ni akɛaashi mple: juu loo gbele? amale loo hɔmɔ? nyɔɔŋnihamɔ loo shwɛm ni aaafee?

Abɛbua ko yɛ Afrika Anaigbɛ akɛ: “He ni oŋmɔɔ tsina yɛ lɛ, jɛmɛ nɔŋŋ ekpeɔ jwɛi yɛ.” Yɛ gbɛ kroko nɔ lɛ, gbɔmɛi kɛ hegbɛ fɛɛ hegbɛ ni amɛaatsɔ nɔ akɛna nii lɛ baatsu nii kɛmɔ shi. Yɛ be babaoo mli lɛ, mɛi ni yɔɔ hegbɛ loo nɔyeli hewalɛ yɛ maji ni yɔɔ je leŋ fɛɛ lɛ kɛ gbɛhe mli ni amɛyɔɔ lɛ tsuɔ nii amɛkɛheɔ nyɔɔŋnii, amɛkɛjuɔ loo amɛkɛyeɔ shika. Amɛsusumɔ ji, ‘Ye Obua ohe beni obaanyɛ ofee nakai nɛɛ. Ekolɛ onaŋ hegbɛ ko ni okɛaafee nakai dɔŋŋ.’ Yɛ be mli ni maji ni yaa amɛhiɛ lɛ ashika he gbɛjianɔtoo fiteɔ lɛ, mɛi ni bɛ nɔ ko kwraa lɛ baakpɛlɛ jwɛŋmɔ ni ahiɛ akɛ anɔkwayeli nyɛŋ afee su ni hi fe fɛɛ kɛha ohiafo lɛ nɔ.

Biblia lɛ kɛɔ akɛ: “Kaaju.” (2 Mose 20:15) Shi kɛji akɛ ohiafoi lɛ nyɛŋ afee anɔkwafoi lɛlɛŋ lɛ, ani abiɔ sane yɛ ja ni Biblia mli jeŋbai ja lɛ he? Ani anyɛŋ atsu Nyɔŋmɔ mlai ahe nii, ani enuuu gbɔmɛi lɛ ahiamɔ nii diɛŋtsɛ lɛ he? Anɔkwa Kristofoi akpei abɔ ni yɔɔ maji ni kpaako amɛnaa nɔyaa lɛ amli lɛ aniiashikpamɔ kɛ hetooi ni yɔɔ naakpɛɛ haa nɛkɛ sanebimɔi nɛɛ.

[Wiemɔ ni akɔ ni akɛmiitsu nii ni yɔɔ baafa 4]

“He ni oŋmɔɔ tsina yɛ Iɛ, jɛmɛ nɔŋŋ ekpɛɔ jwɛi yɛ”

[Mfoniri ni yɔɔ baafa 4]

Ohiafoi Iɛ fata mɛi ni tsuɔ nii dɛŋdɛŋ yɛ shikpɔji ni kpaako amɛnaa nɔyaa lɛ anɔ Iɛ ahe