Mɛni Eba Adesa Su Lɛ Nɔ?

“MƐNI hewɔ ni wɔnaa ni awaa gbekɛbii ayi waa yɛ nɛkɛ yinɔ nɛɛ mli lɛ? Mɛni hewɔ ni awaa kooloi hu ayi lɛ? Mɛni hewɔ ni awuiyeli yɔɔ babaoo lɛ? . . . Mɛni hewɔ ni gbɔmɛi kɛ amɛhe woɔ mɛi ahegbeyeiwoo mli lɛ? Mɛni hewɔ ni gbɔmɛi kɛ tsofai tsuɔ nii yɛ gbɛ fɔŋ nɔ lɛ? . . . Mɛni hewɔ ni, yɛ be mli ni amɛná nɔ fɛɛ nɔ lɛ, mɛi komɛi tsɔɔ amɛhe kɛyaa nɛkɛ shishijee nibii ni fiteɔ adesai ahiŋmɛigbelemɔ nibii fɛɛ lɛ ahe lɛ?”

BRITANIA maŋsɔɔlɔ nukpa lɛ ji mɔ ni kɛ gbee ni wa bi nɛkɛ saji nɛɛ. Ekolɛ bo hu obi saji ni tamɔ nɛkɛ shii abɔ. Ani ona hetooi komɛi ni haa mɔ tsui nyɔɔ emli?

Yɛ be mli ni etsɔɔ esanebimɔi nɛɛ amli jogbaŋŋ lɛ, maŋsɔɔlɔ nukpa lɛ kɛɛ: “Afii abɔ nɛ beni miji obalayoo ni mikɛ mihe wo maŋkwramɔ mli kɛ mihiɛnɔkamɔ kɛ lamɔi kɛ otii ni mamɔ mihiɛ lɛ fɛɛ lɛ, mikɛ mɛi ni hi shi yɛ mibei amli lɛ ateŋ mɛi pii basusu akɛ kɛji akɛ wɔbote yinɔ ko ni wɔbaana wɔɔhei kpakpai, skul nikasemɔ kpakpa, kɛ shihilɛ ni hi jogbaŋŋ bɔ ni sa mli lɛ, no lɛ nɔ fɛɛ nɔ baaya nɔ pɛpɛɛpɛ ni no baaha wɔna wɔsɛɛ be ni hi ni yɔɔ mlɛo hu. Amrɔ nɛɛ wɔle akɛ enɛ jeee nakai. Wɔkɛ naagbai diɛŋtsɛ ni jɛɔ adesai asu lɛ mli baa lɛ miikpe hiɛ kɛ hiɛ.”​—Nɔ ni atsɔmɔ lɛ ji wɔnɔ.

Abaanyɛ atsɔɔ adesa su shishi akɛ “shishijee susumɔi sɔrɔtoi kɛ sui ni anaa yɛ gbɔmɛi adesai ahe.” Belɛ eyɛ faŋŋ akɛ, susumɔi kɛ sui ni kɛ mɛi krokomɛi anɔ kpaaa gbee lɛ baanyɛ ekɛ naagbai aba yɛ aŋkroaŋkroi ateŋ, yɛ maŋ kome nɔ bii sɔrɔtoi ateŋ, aloo yɛ majimaji ateŋ po. Shi nɛgbɛ abaanyɛ ashwa adesai asu lɛ diɛŋtsɛ kɛyashi yɛ ŋmɛnɛŋmɛnɛ beaŋ osharai ni baa yɛ awuiyeli, hegbeyeiwoo, tsofai fɔji ni akɛjuɔ shi akɛfaa gbɛ, kɛ nibii krokomɛi ni tamɔ enɛɛmɛi lɛ ahewɔ?

Ani adesai asu lɛ pɛ sa shwamɔ yɛ shihilɛi ni heɔ “afite adesai ahiŋmɛigbelemɔ nibii fɛɛ” lɛ mli? Aloo ani nibii krokomɛi yɛ ni sa akɛ wɔsusu he bɔni afee ni wɔnyɛ wɔtsɔɔ nɔ hewɔ ni gbɔmɛi kɛ amɛhe woɔ hiɛjoomɔ mli nifeemɔi ni baa mɔ shi lɛ moŋ mli vii, yɛ be mli ni amɛbaanyɛ amɛshɛ otii ni nɔ kwɔlɔ, ni bulɛ yɔɔ he hu lɛ moŋ ahe lɛ? Nyɛhaa wɔkwɛa.