Jeŋ Hee Ko Ebɛŋkɛ Kpaakpa!
AKƐ susumɔi babaoo eha yɛ bɔ ni aaafee atsa je lɛ helai lɛ ahe. Yɛ fɛɛ mli lɛ, abiɔ ni ana mɔ he susumɔ kɛ ekomefeemɔ, kɛ agbɛnɛ majimaji ni yɔɔ jeŋ fɛɛ lɛ amɔdɛŋbɔɔ kpele kome hu. Mɛi pii nuɔ he akɛ yɛ be mli ni nibii yaa nɔ efiteɔ lɛ, bɔ ni ehe hiaa ni afee ekome kɛbaa nibii ayi lɛ baanyɛ jeŋmaji lɛ anɔ koni amɛku sɛɛ amɛkwɛ nibii ni he hiaa amɛ fe fɛɛ lɛ ekoŋŋ bɔni afee ni amɛfee ekome kɛtsu nii ni amɛkɛfee jeŋ hee ko ni abaa yi. Mɛi feɔ he mfoniri yɛ amɛjwɛŋmɔi amli akɛ abaatse shika ni afo afɔ shi aha asraafoi anitsumɔi lɛ anɔ kwraa bɔni afee ni akɛ nii ni ayɔɔ lɛ atsu adebɔɔ mli nibii ni ebaje oshara mli lɛ ahe nii, koni taakɛ atsɔɔ mli yɛ State of the World 1990 wolo lɛ mli lɛ, “yɛ najiaŋ ni nɔyelii lɛ kɛ amɛ diɛŋtsɛ amɛ asraafoi pii kɛ tawuu nii wuji aaabu amɛhe lɛ, amɛkɛ amɛhe afɔ Jeŋmaji Ekomefeemɔ lɛ toiŋjɔlɛ mlihiɛmɔ he gbɛjianɔtoo ni alɛɛ mli waa lɛ nɔ, koni efee nɔ ni yɔɔ hewalɛ kɛ hegbɛ ni ekɛaabu emli maji lɛ ateŋ eko fɛɛ eko he eshi mɔ ko ni aaatutua lɛ.”
Shi nɛkɛ gbɛjianɔtoi ni akɛbaatsu nibii ahe nii nɛɛ nyɛɛɛ ekɛ nibii ni mɛi shweɔ ni amɛna ni wɔtsɔɔ yɛ shishijee baafai lɛ amli lɛ aba. Adesai aŋaalee foji nyɛŋ atsa adesai eshai kɛ hiɛjoomɔi lɛ yɛ gbɛ ko gbɛ ko nɔ. Ejieee mɛi krokomɛi ahe jwɛŋmɔ fɔŋ namɔ kɛ bei ni baa yɛ hewolo nɔ sui sɔrɔtoi ateŋ lɛ kɛyaaa. Ekɛ suɔmɔ ni osatofeemɔ bɛ mli baaa adesai fɛɛ ateŋ. Ni nakai nɔŋŋ enyɛŋ ema nɔ mi akɛ eeefo helai kɛ gbele hu sɛɛ. Atsuuu awuiyeli he nii jogbaŋŋ, aloo ni aaatsi jamɔi amli bei kɛ nyɛɛ lɛ anɔ kunimyeli po ta. Ni nyɛŋ asusu bɔ ni aaafee ajie adebɔɔ mli osharai ni baa lɛ kɛya lɛ hu he. Aŋmɛ maŋhedɔɔ, kɛ hewalɛ ni eyɔɔ ni baanyɛ ekɛ naagbai aba lɛ gbɛ ni eyɛ lolo. No hewɔ lɛ, esa akɛ wɔkɛ awerɛho amu naa akɛ adesai anine enyɛ shi ni amɛnyɛɛɛ amɛna tsabaa ni baanyɛ atsu nii.
Shi kɛlɛ, ehe tsabaa ko yɛ! Yɛ anɔkwale mli lɛ, akɛ nɛkɛ nibii ni adesai shweɔ waa nɛɛ fɛɛ ahe shiwoo eha, ni shiwoo lɛ jɛ Nyɔŋmɔ “ni maleee” lɛ ŋɔɔ. (Tito 1:2) Ele nɔ diɛŋtsɛ ni esa akɛ afee, ni eyɛ nilee, hewalɛ kɛ nyɛmɔ ni ekɛaaha nɔ ni ekpɛ eyiŋ yɛ he lɛ aba mli.—Kpojiemɔ 7:12; 19:1.
Nyɔŋmɔ ewo shi akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ okwɛ eshihilɛ he lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.”—Lala 37:10, 11.
Te aaafee tɛŋŋ ni enɛ aba mli hu? Yesaia 11:9 haa hetoo akɛ: “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” Hɛɛ, akɛ “Yehowa he nilee” baatsɔse adesai fɛɛ, ni aŋmɛŋ aŋkroaŋkroi ni baakpoo akɛ amɛkɛaatsu nii yɛ jɛmɔ lɛ gbɛ ni amɛhi shi ni amɛfite mɛi krokomɛi atoiŋjɔlɛ. Afiteŋ wɔ shikpɔŋ fɛfɛo nɛɛ dɔŋŋ.
Lala 46:9, 10 woɔ shi akɛ: “Nyɛbaa nyɛbakwɛa Yehowa nitsumɔi lɛ, . . . Ehaa tai asɛɛ foɔ kɛyaa shikpɔŋ lɛ naagbee hei lɛ.” (Kwɛmɔ Mika 4:3, 4 hu.) Anɔkwa sane kome ni he hiaa yɛ nɛkɛ jeŋ fɛɛ toiŋjɔlɛ namɔ nɛɛ mli ji maŋhedɔɔ mli mligbalamɔi lɛ ni aaaha eba naagbee. Amaa ekomefeemɔ nɔ mi ejaakɛ nɔyeli kome pɛ baahi shi yɛ jeŋ muu fɛɛ—Nyɔŋmɔ nɔyeli lɛ. Ni enɔyeli lɛ ji Maŋtsɛyeli ni “fiteŋ dɔŋŋ kɛaatee naanɔ.” (Daniel 2:44) Kɛfata he hu lɛ, enɔ Maŋtsɛ ji Yesu Kristo ni atee lɛ shi kɛjɛ gbohii ateŋ, ni gbooo dɔŋŋ lɛ, mɔ ni enɔyeli lɛ baadamɔ jalɛsaneyeli kɛ jalɛ nɔ lɛ.—Yesaia 9:6, 7; 32:1.
Shi ani emuu ni adesai yeee ni amɛna kɛjɛ fɔmɔ mli lɛ baakpata hiɛ koni piŋmɔ, hela, ŋkɔmɔyeli kɛ gbele afite lɛ kwraa? Dabi, ejaakɛ enɛɛmɛi fɛɛ hu baafee tsutsu nibii. Kpojiemɔ 21:4 maa nɔ mi haa wɔ akɛ: “Ni Nyɔŋmɔ aaatsumɔ amɛhiɛaŋ yaafo nui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Akɛ eshai ni wɔna yɛ fɔmɔ mli lɛ baake wɔ kɛtsɔ Yesu kpɔmɔ afɔleshaa lɛ nɔ, ni abaaku sɛɛ akɛ adesai aba shihilɛ ni eye emuu mli ekoŋŋ. (Romabii 6:23; Efesobii 1:7) Ni namɔ baanyɛ akudɔ adebɔɔ mli hewalɛi lɛ jogbaŋŋ koni etsi amɛnaa ni amɛkaye adesai awui fe amɛ-Bɔlɔ lɛ diɛŋtsɛ?—Lala 148:5-8; Yesaia 30:30.
Nibii ni adesai ahiɛ kaa nɔ ni lamɔ kɛkɛ amɛlaa yɛ he lɛ, Nyɔŋmɔ kɛ fɛɛ baaba. Shi mɛɛ be? Biblia gbalɛ tsɔɔ akɛ tsakemɔi nɛɛ baaba yɛ be mli ni jeŋmaji lɛ “amli efu” ni adesai yaa nɔ “fiteɔ shikpɔŋ lɛ.” (Kpojiemɔ 11:18) “Jaramɔ bei” baakadi jeŋ momo nɛ naagbee gbii lɛ—ni nɔ ni baajɛ mli aba ji shihilɛi ni yaa nɔ fiteɔ ni wɔnaa ni ebɔle wɔ amrɔ nɛɛ po lɛ. (2 Timoteo 3:1-5, 13) Ni Yesu gba fɔ shi akɛ yinɔ ni naa nɛkɛ nibii nɛɛ ji yinɔ nɔŋŋ ni baana Nyɔŋmɔ shiwoi lɛ amlibaa lɛ.—Mateo 24:3-14, 32-34.
Taomɔ be ni okɛpɛi nɛkɛ shiwoi nɛɛ ni aŋmala yɛ Biblia lɛ mli lɛ amli okwɛ. Ejaakɛ adesai ni yɔɔ nilee lɛ kɛ Nyɔŋmɔ fɛɛ kpɛlɛɔ nɛkɛ oti nɛɛ nɔ: Be ni esa akɛ ana jeŋ hee nɛ!