“Amɛgbee Jije Kɛtee Shikpɔŋ Muu Lɛ Fɛɛ Nɔ”
YƐ LALA 19 lɛ, David gba Nyɔŋmɔ nibɔɔ ni anaa nɛɛ he anunyam etsɔɔ, ni eyaa nɔ etsɔɔ hiɛsɔɔ babaoo ni eyɔɔ kɛha Yehowa mla, ekaimɔi, ekpɔi, ekitai kɛ ekojomɔi. Bɔfo Paulo hu jie hiɛsɔɔ etsɔɔ nɛkɛ nibii nɛɛ. Etsɛ wiemɔ kɛjɛ nɛkɛ Lala nɛɛ mli ni ekpa mli ekɛto anɔkwale Kristofoi anitsumɔ ni he hiaa lɛ he. Ewie yɛ mɛnɛɛmɛi ahe akɛ: “Amɛgbee ejije kɛtee shikpɔŋ muu lɛ fɛɛ nɔ, amɛwiemɔi lɛ eshɛ jeŋ naagbee hei lɛ.”—Romabii 10:18.
Nɛkɛ “wiemɔi” nɛɛ ji wala kɛ gbele sane kɛha adesai fɛɛ ŋmɛnɛ, ejaakɛ aahe atsu Yehowa kojomɔi lɛ ahe nii yɛ yiwalɛ nibii agbɛjianɔtoo ni yɔɔ shikpɔŋ nɛɛ nɔ lɛ nɔ. (Zefania 2:2, 3; 3:8) Yɛ anɔkwale mli lɛ ehe miihia ni adesai ale Yehowa Maŋtsɛyeli lɛ he sanekpakpa lɛ. He fɛɛ he ni oookwɛ ŋmɛnɛ lɛ, nɔ ni onaa ji mligbalamɔ, mlakwamɔ, awuiyeli, jeŋba shara, weku mligbalamɔi Oh, hɛɛ, awieɔ toiŋjɔlɛ he, shi jeŋ hewalɛi lɛ yaa nɔ amɛfeɔ tawuu nii ni yɔɔ gbeyei fe fɛɛ, yɛ be mli ni mɛi ni baleɔ ‘nuklea tawuu nii afeemɔ’ lɛ ayifalɛ yaa hiɛ yɛ maji pii ni kɛ amɛhe woɔ mli lɛ hewɔ. Shihilɛi ni yɔɔ shikpɔŋ nɔ lɛ sa “naagbee gbi” ni Paulo tsɔɔ mli yɛ 2 Timoteo 3:1-5 lɛ pɛpɛɛpɛ.
Namɛi abaahere amɛyiwala kɛjɛ kpɔtɔɔ nɛɛ mli, ni yɛ mɛɛ gbɛ nɔ? Paulo haa hetoo yɛ faŋŋ mli ni etsɛɔ wiemɔ kɛjɛɔ gbalɛ ni yɔɔ Yoel 3:5 lɛ: “Mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.” (Romabii 10:13) Shi te aaafee tɛŋŋ ni shikpɔŋ lɛ nɔ bii ‘aaatsɛ Yehowa gbɛi’ hu? Ejaakɛ, amɛteŋ mɛi babaoo po leee akɛ Yehowa ji Nyɔŋmɔ gbɛi! Te aaafee tɛŋŋ aye abua nɛkɛ gbɔmɛi nɛɛ? Paulo ha hetoo akɛ esa akɛ atsu shiɛlɔi kɛya amɛŋɔɔ.—Romabii 10:14-16.
Yɛ miishɛɛ mli lɛ, Yehowa etsu e-Dasefoi lɛ koni amɛyabɔ gbɔmɛi lɛ amaniɛ akɛ Nyɔŋmɔ Maŋtsɛyeli lɛ eshɛ shi eta ni akɛ ebaatsɔ yiwalaheremɔ kɛ naanɔ wala eha mɛi ni baleɔ Nyɔŋmɔ kɛ e-Bi, Yesu Kristo. (Yesaia 43:10, 12; Luka 21: 25, 26, 31; Yohane 17:3) Aajaje nɛkɛ sanekpakpa nɛɛ “yɛ shikpɔŋ muu lɛ fɛɛ nɔ.”
Akpekpei abɔ miibo shiɛmɔ nɛɛ toi, taakɛ mɛi 9,201,071 ni ba kpee ni akɛkai Yesu gbele lɛ yɛ jeŋ fɛɛ, yɛ April 1, 1988 lɛ yeɔ he odase lɛ. Yɛ nakai afi lɛ mli lɛ, ana Maŋtsɛyeli shiɛlɔi 3,592,654 yɛ jeŋ fɛɛ akɛ yifalɛ ni fe fɛɛ ni abaptisi sɔɔlɔi heei 239,268—ni eji oha mlijaa 3.6 fe nyɛsɛɛ afi lɛ nɔ. Maŋsɛɛ sanekpakpashiɛlɔi anɔkwafoi to nɛkɛ yifalɛ nɛɛ shishi, taakɛ atsɔɔ mli yɛ sɛɛ mli yɛ wolo tɛtrɛɛ nɛɛ mli lɛ. Shi yɛ nyɛsɛɛ afii nɛɛ amli lɛ, Odasefoi akpei ohai abɔ ni yɔɔ asafoi lɛ amli, ni ‘amɛhe nibii ni amɛnu lɛ amɛye’ lɛ hu ena gbɛgbamɔ mumɔ lɛ, ‘ni amɛmiishiɛ sanekpakpa lɛ’ daa gbi. Kɛ aja mli lɛ Odasefoi 455,561 buɔ akɔntaa akɛ gbɛgbalɔi, eji oha mlijaa 4.4 kɛha afi lɛ. Nɔ ni ejɛ mli eba ji akɛ ŋmɛlɛtswaa fɛɛ ni akɛtsu nii yɛ shiɛmɔ nitsumɔ lɛ mli lɛ yafee 786,521,697, efe ŋmɛlɛtswai abɔ ni akɛtsu nii afii 6 pɛ ni eho nɛɛ lɛ nɔ toi enyɔ.
Tao ni afee yɛ baafai ejwɛ ni yɔɔ wolo tɛtrɛɛ nɛɛ mli lɛ tsɔɔ he ni atsu shiɛmɔ nitsumɔ lɛ kɛyashɛ lɛ mli fitsofitso Wɔmiifɔ bo nine ni okase 1988 amaniɛbɔɔ ni kɔɔ Kristofoi anitsumɔ lɛ he yɛ jeŋ muu fɛɛ lɛ.
[Akrabatsa ni yɔɔ baafa 4-7]
1988 SERVICE YEAR REPORT OF JEHOVAH’S WITNESSES WORLDWIDE
(Kwɛmɔ “bound volume”)