Maŋtsɛyeli Jajelɔi Bɔ Amaniɛ

Wu Ko Tuishiŋmɛɛ Fee Eweku Lɛ Ekome

MƐNI obaafee kɛji akɛ omɔ anɔkwale lɛ mli shi ohefatalɔ lɛ te shi ewo bo waa ni efee nɔ fɛɛ nɔ ni eeenyɛ ni efite emuuyeli mli ni ohiɛ lɛ? Ani Paulo wiemɔi ni yɔɔ 2 Timoteo 3:12 lɛ baawo bo hewalɛ, he ni ekɛɛ yɛ akɛ: “Shi mɛi fɛɛ hu ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛ yi” Iɛ? Ani obaaŋmɛ otsui shi yɛ mli aloo obaaŋmɛɛ he? Kristofonyo nuu ko ni yɔɔ ltalia kɛ kaa ni tamɔ nɛkɛ kpe. Eŋmɛɛɛ he, ni Yehowa jɔɔ lɛ yɛ enɛ feemɔ mli.

Nuu ni awieɔ ehe lɛ ji tsutsu komunistnyo ni hiɛ dɔɔ waa yɛ enɛ he, ni eji Katoleknyo kpanaa hu. Eheɔ gbɔmɛi fɛɛ ni yeɔ egbɔ eyeɔ ni enuɔ he akɛ kui enyɔ lɛ fɛɛ shiɛɔ nɔ kometoo lɛ nɔŋŋ. Enanemɛi nitsulɔi lɛ ateŋ mɔ ko kɛ lɛ wie Nyɔŋmɔ Maŋtsɛyeli lɛ he, ni eyɔse akɛ enɛ pɛ ji gbɛ ni aaatsɔ nɔ aha egbɔyeli aba. Emɔ anɔkwale Iɛ mli kɛ nakai hiɛdɔɔ ni ejie lɛ kpo etsɔɔ komunisim kɛ Katolek jamɔ lɛ ni abaptisi lɛ yɛ 1972. Shi eŋa hu? Ete shi ewo ewu lɛ waa. Eŋa nɛɛ ŋma akɛ:

“Afi 1970 mli ni miwu kɛ Yehowa Odasefoi kpe klɛŋklɛŋ yɛ nitsumɔ he. Fiofio, beni ekaseɔ Biblia lɛ, mibayɔse akɛ eji jamɔ hee ni nibii komɛi yɛ mli ni mikɛ amɛ kpaaa gbee. Mikɛ weku lɛ mlibii krokomɛi je shishi akɛ wɔɔwa lɛ yi.”

Yoo nɛɛ tee nɔ akɛ: “Miwu Iɛ fɔlɔi hu hao lɛ, amɛtsɔ gbɛ fɛɛ gbɛ ni amɛaanyɛ nɔ koni amɛha ekpa. Beni miwu lɛ yaa hiɛ yɛ Biblia mli nilee mli lɛ, ekwɛ koni ejie amagai kɛjɛ wɔshia lɛ. Mikɛɛ lɛ akɛ kɛ efee nakai lɛ, oshara baaba shia lɛ mli. Ekpata jamɔ mli mfonirii Iɛ ahiɛ, ni agbɛnɛ mitutua lɛ kɛ jɛmɔ kɛ yii ni migbala ewoji tɛtrɛbii lɛ babaoo mli. Kɛ miibolɔ lɛ, miwu lɛ fɔlɔi shaa foi kɛbaa ni amɛjɛɔ lɛ hu, shi etooo najiaŋ.

“Nibii ni wɔkpaaa gbee yɛ he Iɛ tee nɔ kɛyashi be mli ni mishi lɛ beni ekɛɛ akɛ eŋmɛɛɛ gbɛ koni wɔbiyoo lɛ aya catechism yɛ sɔlemɔ we lɛ. Miwu lɛ kɛɛ mi akɛ kɛ mikuuu misɛɛ mibaaa shia lɛ, ekɛ mi baaya saneyeli he ni efolɔ minaa akɛ mikwa lɛ loo mishi lɛ. Otsi sɛɛ lɛ, mikpɛ miyiŋ akɛ maku sɛɛ maya.

“Bɔni afee ni mabɔ mɔdɛŋ ekoŋŋ ni maha ekpa lɛ, mitee mumɔi atsɛlɔ ko ŋɔɔ ni mibi lɛ ni ekɛ kablɛ afimɔ lɛ aha mi. Mumɔi atsɛlɔ Iɛ je shishi ebi mi sane, ni mitsɔɔ shihilɛ lɛ mli. Beni eyoo enɛ lɛ, ekɛɛ mi akɛ kablɛfii ko kablɛfii ko bɛ hewalɛ yɛ Yehowa Odasefoi anɔ.

“Wɔsusu akɛ belɛ wɔbaana wɔ osɔfo lɛ. Osɔfo lɛ wo ŋaa akɛ wɔya ni wɔyana lɔya loo mlalɛlɔ. Nɔ ni fee mi naakpɛɛ ji akɛ mlalelɔ lɛ wo mi hewalɛ akɛ mikɛ miwu lɛ aya Yehowa Odasefoi akpeei lɛ. Mishaanuu ni no mli lɛ efata mihe lɛ ekpɛlɛɛɛ nɔ, ni ekɛɛ akɛ eweku Iɛ etuu amɛhe amɛha San Rocco, amɛ akrowa lɛ ‘Hebulɔ’ lɛ. Shi mlalelɔ lɛ tsɔɔ mli akɛ nɛkɛ ‘hetselɔ’ nɛɛ ni ji amaga lɛ ji amale. Kɛkɛ ni ejie ehe kpo akɛ eji Catholic Action (ni ji kuu ko ni yɔɔ keketee) lɛ sɛinɔtalɔ ni ekɛɛ wɔ akɛ ekɛ ehe wooo jamɔ mli gbijurɔyelii lɛ amli, ejaakɛ ekane Biblia lɛ, ni ele akɛ amɛ fɛɛ lɛ amale nii ni. Yɛ naagbee lɛ, mlalelɔ lɛ kɛɛ: ‘Okɛ owu Iɛ aku sɛɛ aya shia ni okɛ lɛ atao toiŋjɔlɛ. Bo lɛ toi, ni bo hu oje Biblia lɛ kasemɔ shishi.’

“Yɛ hewalɛwoo nɛɛ hewɔ lɛ, misusu miwu Iɛ jeŋba, tsakemɔi ni efee, kɛ etsuishiŋmɛɛ lɛ he, ni mije shishi akɛ mikɛ lɛ aaaya Yehowa Odasefoi akpeei. Suɔmɔ ni ajie lɛ kpo atsɔɔ mi yɛ jɛmɛ lɛ sa mitsui he, mitee nɔ mikase nii, mikɛ mihe wo Teokrase Sɔɔmɔ Skul lɛ mli, ni mije shiɛmɔ shishi. Yɛ naagbee lɛ, mikɛ nu mli baptisimɔ jɔɔ mihe nɔ yɛ 1977 ni mina miishɛɛ akɛ mibale anɔkwale lɛ, ni miida Yehowa, mɔ ni ye ebua miwu lɛ ni eŋmɛ etsui shi ni efee wɔweku muu lɛ fɛɛ ekome yɛ E-jamɔ mli lɛ shi.”