Shikpɔŋ Lɛ Wɔsɛɛ Ni Yɔɔ Nyam Yɛ Nyɔŋmɔ Maŋtsɛyeli Lɛ Shishi

BIBLIA lɛ kɛɔ akɛ “hemɔkɛyeli ji nii ni mɛi ahiɛ ka nɔ lɛ anɔ hewalɛnamɔ.” (Hebribii 11:⁠1) Taakɛ wɔna yɛ sane ni tsɔ hiɛ lɛ mli lɛ, Nyɔŋmɔ ha atsɔ hiɛ aŋma gbalɛ naa ninaa ko ni kɔɔ jeŋ hewalɛi ni ba kɛjɛ Daniel gbii lɛ amli kɛbashi wɔgbii nɛɛ amli lɛ ashitee kɛ amɛshigbeemɔ lɛ he sane yɛ Daniel wolo lɛ mli afɔ shi fe afii 500 dani afɔ Kristo. Bɔ ni gbalɛi lɛ ja ha lɛ haa wɔ nɔmimaa, ehaa wɔ yiŋtoo ni mli wa kɛha hemɔkɛyeli akɛ Daniel gbalɛi ni eshwɛ lɛ hu baaba mli, ni etsɛŋ kwraa ni Nyɔŋmɔ Maŋtsɛyeli ni yɔɔ Kristo Yesu shishi lɛ baaye adesai anɔyelii lɛ najiaŋ.

Mɛɛ tsakemɔ no baaji kɛha adesai nɛkɛ. Nyɔŋmɔ diɛŋtsɛ wie yɛ nakai wɔsɛɛ be lɛ he akɛ: “Naa, miifee nii fɛɛ ehee.” (Kpojiemɔ 21:⁠5) Nɛkɛ mumɔ naa gbalɛi ni feɔ nɛkɛ miishɛɛ shihilɛ nɛɛ he mfoniri ehaa wɔ nɛɛ ekomɛi ahe susumɔ baanyɛ aye abua wɔ ni wɔna bɔ ni nibii baaji “ehee” eha, kɛ bɔ ni eeefee sɔrɔto kwraa fe nɔ ni wɔnaa yɛ adesai anɔyeli shishi ŋmɛnɛ lɛ he. Yɛ anɔkwale mli lɛ, nɔ ni Biblia lɛ wieɔ yɛ wɔ shikpɔŋ nɛɛ wɔsɛɛ be kɛ wala ni yɔɔ nɔ lɛ he yɛ naakpɛɛ. Susumɔ enɛ he:

Awuiyeli kɛ yiwalɛ nifeemɔ sɛɛ baafo. “Ejaakɛ efɔŋfeelɔi lɛ, aaafolɔ amɛ ashwie, . . . ni mɔ fɔŋ lɛ bɛ dɔŋŋ.” Mɛi ni baahi wala mli lɛ “mɔ fɛɛ mɔ aaata eweintso kɛ egbamitso shishi, ni mɔ ko woŋ amɛhe gbeyei; ejaakɛ Yehowa Zebaot naabu ewie.” Lala 37:​9, 10; Mika 4:⁠4.

Hewolo nɔ su kɛ majimaji ateŋ mligbalamɔ, kɛ tai ni enɛɛmɛi kɛbaa lɛ sɛɛ baafo. “Jeŋmaŋ ko woŋ klaŋte nɔ eshiŋ jeŋmaŋ ko, ni amɛkaseŋ tawuu dɔŋŋ.”​—Yesaia 2:⁠4.

Tsui ni faa, wɔɔhe ni abɛ, kɛ nitsumɔ ni anaaa atsu baafee tsutsu nibii. Yesaia gba akɛ: “Shi amɛaamamɔ tsui ni amɛaahi mli, ni amɛaafee weintromii, ni amɛaaye mli yibii. . . . ni mɛi ni mihala lɛ aaaye amɛninenaa nitsumɔ lɛ mli nii aahu po.”​—Yesaia 65:​21, 22.

Hɔmɔ ni yɔɔ gbeyei, tamɔ nɔ ni ba Afrika shikpɔji lɛ ekomɛi anɔ nyɛsɛɛ nɛɛ lɛ sɛɛ baafo, ni akɛ niyenii babaoo kɛha mɛi fɛɛ baato najiaŋ. “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.” “Shikpɔŋ lɛ eba enii, Naanyɔŋmɔ ni ji wɔ-Nyɔŋmɔ lɛ aaajɔɔ wɔ.”​—Lala 72:​16; 67:​7, 8

Kɛfata he lɛ, abaana gbɔmɔtsoŋ hewalɛ kɛ wala ni akɛbaaye nɛkɛ jɔɔmɔi nɛɛ amli ŋɔɔmɔ. Yɛ Yesu mra be mli shikpɔŋ lɛ nɔ sɔɔmɔ nitsumɔ lɛ mli lɛ awie yɛ anɔkwale mli akɛ “shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii.” Shi kɛlɛ, shiwoo ko ni da fe no baaba mli akɛ: “Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ, ejaakɛ tsutsu nii lɛ eho etee.”​—Luka 7:​22; Kpojiemɔ 21:⁠4.

Mɛɛ tsakemɔ kpele nɛ. Kwɛ heyeli ni enɛ kɛbaaha adesai ni ehao lɛ. Wɔmiiwo bo ekaa ni oba ohe shi amrɔ nɛɛ oha Nyɔŋmɔ Maŋtsɛyeli lɛ, koni bo hu okpa sɛɛnamɔi ni baajɛ nɛkɛ jeŋ fɛɛ nɔyeli tsakemɔ be nɛɛ mli aba lɛ eko.

[Mfoniri ni yɔɔ baafa 7]

Mɛi ni yɔɔ wala mli amrɔ nɛɛ Iɛ baakpa naakpɛɛ jɔɔmɔi nɛɛ agbɛ​—tawuu, awuiyeli, ohia, kɛ gbele tete po naagbee. Ani obaasumɔ ni ona wɔsɛɛ be ni tamɔ nɛkɛ mli ŋɔɔmɔ?