“Ŋwɛi Jalɛsaneyeli” Kpokpaa Wuji Anɔ Kpee Lɛ

Kwɛ bɔ ni piŋmɔ babaoo eyi je Iɛ mli obɔ yɛ jalɛsaneyeli ni bɛ hewɔ! Bɔ ni maŋkwralɔi kɛ hewalɛ tsuɔ nii yɛ gbɛ fɔŋ nɔ babaoo lɛ eha piŋmɔ ni esaaa eba mɛi pii anɔ. Jarayeli mli hiɛjoolɔi miinyɛ gbɔmɛi anɔ, ni nɔ ni jɛɔ mli baa ji haomɔ. Agbɛnɛ jamɔ mli hiɛnyiɛlɔi ni yɔɔ ŋmɛnɛ lɛ nyɛɔ gbɔmɛi ni tamɔ mɛi ni hi shi yɛ Yesu gbii Iɛ amli Iɛ anɔ, mɛi ni Yesu wie amɛhe akɛ: “Shi amɛfimɔɔ jatsui kɛ tsiimɔ ni teremɔ jaraa amɛkɛshwieɔ mɛi akɔji anɔ; shi amɛ diɛŋtsɛ lɛ amɛsumɔɔɔ akɛ amɛkɛ amɛwao kome tsiɔ” lɛ. (Mateo 23:⁠4) Hewalɛ ni akɛtsuɔ nii yɛ gbɛ fɔŋ nɔ efa ni jalɛsaneyeli hu ni bɛ weku mli ni jɛ enɛ hewɔ lɛ hu efa.

Yinɔsane tsɔɔ akɛ sɛɛnamɔ bɛ he akɛ aaakwɛ gbɔmɛi ni yeee emuu, ni bɔ fɛɛ bɔ ni amɛhiɛ jwɛŋmɔ kpakpa akɛ amɛaasaa nibii yɛ shihilɛ ni tamɔ nɛkɛ mli Iɛ kɔɔɔ he eko. Shi Jeŋ Muu Maŋtsɛ kɛ Kojolɔ ji Yehowa. Lɛ ji jalɛsaneyeli Nyɔŋmɔ lɛ. Mose Ia yɛ gbɛ ni ja nɔ akɛ: “Tɛsaa ji lɛ, ni enitsumɔi hi pɛ; ejaakɛ egbɛi fɛɛ jalɛ ni. Anɔkwa Mawu ji lɛ, nɔsha bɛ Iɛ; jalɔ ji Iɛ ni esa pɛ.”​—5 Mose 32:⁠4.

Yehowa eŋmɛ etsui shi yɛ be babaoo mli yɛ jalɛsaneyeli ni bɛ je nɛɛ mli Iɛ mli, shi eyaŋ nɔ efeŋ nakai yɛ be fɛɛ mli. Be yɛ ni ato ni ekɛbaatsu he nii, kɛkɛ Iɛ gbalɛ ni anaa yɛ Yesaia 14:​4-7 Iɛ baaba mli, ni enɛ kɛ shiwoo haa akɛ yiwalɛi sɔrɔtoi fɛɛ sɛɛ baafo ‘ni shikpɔŋ muu Iɛ fɛɛ baajɔɔ ehe.’

Akɛni Yehowa Odasefoi yɔɔ hemɔkɛyeli ni ma shi shiŋŋ yɛ nɛkɛ gbalɛ shiwoi nɛɛ amli hewɔ lɛ, amɛyɛ he miishɛɛ akɛ amɛaajaje enɛ kɛya shɔŋŋ akɛ etsɛŋ ni Yehowa kɛ nɔnyɛɛ, nibii ni ejaaa gbɛ kɛ jalɛsane ni ayeee baaba kɛtsɔ Maŋtsɛyeli nɔyeli ni ekɛaaba kwraa Iɛ nɔ. Kɛkɛ Iɛ mɔ ko fiteŋ nii ni mɔ ko yeŋ awui dɔŋŋ, ejaakɛ ‘shikpɔŋ muu lɛ fɛɛ baayi obɔ kɛ Yehowa he nilee tamɔ bɔ ni nu ha ŋshɔ hiɛ Iɛ.’​—Yesaia 11:⁠9.

Bɔni afee ni awaje wɔhemɔkɛyeli yɛ Yehowa jalɛ kojomɔi Iɛ amli lɛ, 1988 Kpokpaa Wuji anɔ kpeei lɛ baana esaneyitso ni ji “Ŋwɛi Jalɛsaneyeli.” Jeee akɛ nɛkɛ saneyitso nɛɛ ni wɔɔma nɔ mi lɛ baawo wɔ ekaa ni wɔha ale wɔ diɛŋtsɛ wɔhiɛnɔkamɔ kɛha ŋwɛi jalɛsaneyeli kɛkɛ, shi moŋ ebaawo wɔ hewalɛ ni wɔfee nii ni kɛ ŋwɛi jalɛsaneyeli kpaa gbee yɛ wɔnifeemɔi fɛɛ mli.

Akɛ Yehowa tsuji lɛ, wɔ fɛɛ wɔle akɛ yɛ tɔmɔ ni wɔklɛŋklɛŋ fɔlɔi Iɛ tɔ hewɔ lɛ, wɔjwɛŋmɔi fɛɛ dɔɔ kɛyaa pɛsɛmkunya nɔ, kɛyaa jalɛsane ni ayeee nɔ. Hewɔ lɛ wɔhiɛ baasɔ saji kpakpai ni wɔnine baashɛ nɔ kɛtsɔ Biblia mli wiemɔi, nɔkwɛmɔ nii, sanebimɔi kɛ drama ni baama bɔ ni ehe hiaa akɛ wɔɔmɔ ŋwɛi jalɛsaneyeli mli kpɛŋŋ ni wɔwo nɔ lɛ. Enɛ kɛ famɔ ni yɔɔ Mika 6:8 Iɛ kpaa gbee, ‘wɔfee nɔ ni ja gbɛ wɔsumɔ ejurɔfeemɔ ni wɔkɛ Nyɔŋmɔ anyiɛ yɛ heshibaa mli’ lɛ. Enɛ kɛ gbeekpamɔ baa, tsui ni nyɔɔ mɔ mli kɛ miishɛɛ, eyeɔ buaa hu ni sanekpakpa Iɛ ni ashiɛɔ yɛ shikpɔŋ muu Iɛ fɛɛ nɔ Iɛ yaa hiɛ.

Nɔ ni ekaaa yɛ nɛkɛ kpeei nɛɛ ahe ji maji sɔrɔtoi ni abaatsɔ tɛlifon nɔ aha amɛnu wiemɔi krɛdɛɛ ni Yehowa Odasefoi Anɔyeli Kuu Iɛ mli bii diɛŋtsɛ baaha ni amɛnu lɛ. Abaaha maŋsɛɛ sanekpakpashiɛlɔi ni yɔɔ je lɛŋ he fɛɛ he hu ana hegbɛ aya amɛmaji amli yɛ kpee nɛɛ hewɔ; ni enɛ hu baaha amɛya ni amɛyasara amɛfɔlɔi ekoŋŋ.

Kɛ Yehowa aaasumɔ lɛ, “Ŋwɛi Jalɛsaneyeli” Kpokpaa Wulu nɔ kpee Iɛ baaje shishi Soo shwane 1:30 ni ebaaba naagbee yɛ Hɔgbaa shwane 4:​00. Nyɛhaa wɔtoa wɔgbɛjianɔ koni wɔya kpee nɛɛ shishi ni wɔhi jɛmɛ beni kpee Iɛ aaaje shishi ni wɔhi shi aaahu kɛyashi be mli ni aaala naagbee Iala Iɛ kɛ sɔlemɔ Iɛ daa gbi. Ba akɛ mɔ ni mumɔŋ hɔmɔ miiye Iɛ ni osaa ohe koni oŋmala saji otii ni obaanu Iɛ ofɔ shi. Na nɔmimaa akɛ Yehowa esaa ‘niyenii kpakpa’ eto wɔ ni baawaje wɔ ni ekanya wɔ kɛha nitsumɔ ni ka wɔhiɛ lɛ.​—Yesaia 25:6; Salomo Lalai 2:⁠4.

Hɛɛ, mɔ fɛɛ mɔ aba ni etswa efai shi akɛ ebaana mumɔŋ jɔɔmɔi ni fe fɛɛ kɛjɛ “Ŋwɛi Jalɛsaneyeli” Kpokpaa Wuji anɔ kpee Iɛ shishi.