Saji Ní Gbɔmɛi Biɔ Yɛ Daa Ni Wa He

“NILELƆI enuuu wein kwraa.” Nɛkɛ ji bɔ ni Nigeria osɔfo ko jaje. Eji ewie enɛ yɛ be fioo ko ni eho lɛ mli kulɛ abaabu enɛ akɛ ebɛ tsuishitoo ni ekwɛɛɛ nii kɛyaaa shɔŋŋ. Shi ŋmɛnɛ, shi ni ateɔ awoɔ daa ni wa lɛ miiya hiɛ yɛ je lɛŋ hei komɛi.

Sane mlipɛimɔ ko ni Reader’s Digest/Gallup (U.S. Amerika) fee nyɛsɛɛ nɛɛ lɛ jie lɛ kpo akɛ “Amerikabii eje shishi amɛmiiba daa ni amɛnuɔ lɛ eshi.” Time wolo tɛtrɛɛ lɛ hu bɔ amaniɛ akɛ “Amerika miiba [daa ni wa ni anuɔ] lɛ shi, ni eefee nakai yɛ oyaiyeli mli fe be fɛɛ, kɛjɛ be mli ni Naatsii lɛ ba yɛ 1920 mli.” Franse hu bɔ daa ni anuɔ ni baa shi he amaniɛ.

Ani yiŋtoo kɛha nɛkɛ su nɛɛ jɛ henɔyeli hewɔ? Mɛi komɛi ebolɔ waa yɛ bɔ ni tsɔnekudɔlɔi ni etɔ daa lɛ fiteɔ gbɛjegbɛi anɔ amɛhaa lɛ hewɔ. Reader’s Digest lɛ wie akɛ, “Yɛ 1983 mli lɛ, daa ni wa ha. . . . [U.S. Amerika] fite shika ni shɛɔ dɔla akpekpei akpei 89.5 yɛ mɛi ni nyɛɛɛ atsu nii kɛ nitsumɔi ni baa shi, gbɔmɔtsoŋ helai, nibii ni fiteɔ kɛ juu, kɛ agbɛnɛ weku lɛ mli bii ni enɛ kɔɔ amɛhe lɛ awui ni enɛ yeɔ amɛ babaoo lɛ yɛ 1983 mli.” Ŋwanejee ko bɛ he akɛ no hewɔ ni U.N. loo Jeŋmaji Ekomefeemɔ lɛ Jeŋ Hewalɛnamɔ He Gbɛjianɔtoo lɛ jie yi nyɛsɛɛ nɛɛ akɛ nɔyelii sɔrɔtoi lɛ ‘atsi daa ni Wa ni nine aaashɛ nɔ lɛ naa yɛ amɛmaŋbii lɛ amɛgbɔmɔtsoŋ hewalɛnamɔ kɛ amɛhilɛ-kɛhamɔ hewɔ lɛ.”​—New Nigeria, March 16, 1983.

Mɛi komɛi po miije ŋwane ni akpa enumɔ kwraa. Nigeria osɔfo ni ewie ehe yɛ yiteŋgbɛ nɛɛ kɛɛ: “Abɛi 28:1 kɛɔ pɔtɛɛ akɛ mɛi ni nuɔ daa lɛ bɛ jwɛŋmɔ.” Ni shiɛlɔ kroko kɛɛ: “Ŋmalɛi Krɔŋkrɔŋi lɛ wieɔ shiɔ daa ni wa yɛ Yesaia wolo lɛ mli,” ni ji akɛ eetsɔɔ Ŋmalɛi ni yɔɔ Yesaia 5:​11, 12 kɛ 22.

Yɛ nɛkɛ wiemɔi nɛɛ ahewɔ lɛ, gbɔmɛi susuɔ akɛ: Mɛni ji nɔ ni Ŋmalɛ lɛ diɛŋtsɛ tsɔɔ? Ani Biblia lɛ diɛŋtsɛ guɔ daa ni wa ni aaanu? Ani Yesu diɛŋtsɛ enuuu wein, aloo enɛ kɔɔ Wein yibii ni etɔɔɔ mɔ lɛ ahe? Yɛ osharai ni yɔɔ mli lɛ hewɔ lɛ, ani ebaahi moŋ akɛ Kristofoi aaatsi amɛhe kɛaajɛ daa ni wa lɛ numɔ he? Abaanyɛ ana nɛkɛ sanebimɔi nɛɛ ahetoo kɛ akwɛ Biblia lɛ diɛŋtsɛ mli.