Ninamɔ kɛ Weku Lɛ

Kɛ osusu hewalɛ ni ninamɔ naa yɛ mɛi anɔ lɛ he Iɛ, kaaku ohiɛ oshwie oweku lɛ nɔ. Susumɔ saji nɛɛ ahe:

Amaniɛbɔɔ nɛɛ jɛ Kanada jwɛŋmɔŋ hela he nilelɔi ni amɛkase mɛi ni amɛna nii kɛteke nɔ lɛ abii lɛ ahe nii lɛ aŋɔɔ: “Shihilɛ jɛɔ amɛtsine. Amɛbɛ oti ko ni ma amɛhiɛ fe ni amɛnaaa amɛ diɛŋtsɛ amɛhiɛ ni amɛnyɛɛɛ amɛdamɔ nijiaŋwujee naa. Henumɔ fioo ko pɛ amɛyɔɔ. Nɔ ni amɛdiɔ sɛɛ ji ni amɛyɛ nii, amɛfa gbɛ ni amɛtao nibii heei ni baaha amɛna miishɛɛ.”

New York Times lɛ wie tsutsu niiatsɛ akpekpeiatsɛ ko he akɛ: “Yɛ be mli ni ebaye omanye babaoo yɛ enitsumɔ mli ni ena nii lɛ, ebayoo akɛ weku lɛ etsake. ‘Miŋa kɛ mibii lɛ susuɔ gbɔmɛi ahe yɛ shika ni amɛyɔɔ lɛ naa, ni kɛ mihe shia ko ni shɛɔ Amerika dɔlai 300,000 miha mibiyoo ko lɛ, mibiyoo kroko lɛ biɔ ni lɛ hu aha lɛ shika ni sheɔ Amerika shika dɔlai 300,000.’” Yɛ be mli ni ena tsui hela lɛ, “kɛfata nɔ ni ninamɔ efee eŋa kɛ ebii lɛ he lɛ,” etsake eshihilɛ

Arnold Hottinger wie yɛ Boka Teŋgbɛ shikpɔŋ ko ni yɔɔ pɛtro babaoo lɛ he nɛkɛ: ‘Ninamɔ ákɛ hela lɛ ji nɔ ko ni maŋsɛɛ datrɛfoi ni baa biɛ koni amɛbatao shika babaoo lɛ le. Amɛbɔ amaniɛ akɛ he ko he ko bɛ ni hela he ni anuɔ ni kɛlɛ ejeee hela ​—helai ni baaha mɔ ko apiŋ diɛŋtsɛ shi jeee akɛ ejɛ gbɔmɔtso lɛ mli nɔ ko hewɔ lɛ he, tamɔ biɛ. Amɛkɛɛ akɛ obalaŋtai yɛ ni kɛ ona amɛ lɛ amɛfeɔ amɛnii tamɔ hiimeji loo mɛi ni egbɔlɔ kɛ hiimeji hu ni amɛfeɔ amɛ nii tamɔ gbekɛbii.’