Buu-Mɔɔ​—Eyeɔ Buaa Awuyeli Naatsii

NAOMI, gbekɛyoo ni eye afii kpawo ni yɔɔ Manchester, England, kɛ miishɛɛ ŋma wolo emaje Buu Mɔɔ Asafo lɛ ni yɔɔ London lɛ: “Beni mitee Post Ɔfis lɛ, mina nyɛ woji tɛtrɛbii lɛ ekome ni afee lɛ agbo akpɛtɛshi, nɔ ni nuu ko miibɔ mɔdɛŋ ni ekɛ kakla ashɔ yoo ko baagi ni ehiɛ lɛ yɛ edɛŋ lɛ. Greater Manchester polisifoi lɛ efee enɛ eko pɛpɛɛpɛ koni amɛkɛbɔ mɛi akɔkɔ yɛ gbɔmɛi fɔji fɛɛ ahe!” Mɛni ji sane ni yɔɔ awuyeli naatsii wolo nɛɛ sɛɛ?

Yɛ be mli ni eyeɔ odase yɛ Manchester gbɛjegbɛ nɔ lɛ, Yehowa Odasefoi lɛ ateŋ mɔ kome kɛ November 1, 1984 Buu-Mɔɔ lɛ eko ni yɔɔ blɔfo mli lɛ ni ehiɛgbɛ sane ji “Wɔ Hejaramɔ Be Nɛɛ ​—Mɛni Hewɔ Yiwalɛ Babaoo Yɔɔ Mli Nɛkɛ?” lɛ ha nuu ko. Nuu nɛɛ kɛ wolo tɛtrɛɛ nɛɛ wo ekotoku mli, shi abafo lɛ yɛ gbɛteŋ beni eyaa shia lɛ. Beni eta shi ni ehiɛ tsɛrɛɔ lɛ kɛjɛɔ ŋmiŋmi ni mɔ lɛ lɛ mli lɛ, ekai wolo tɛtrɛɛ lɛ ni eje shishi akɛ eeekane. Beni Polisinyo ni ji Polisifoi anitsumɔ he ni tsĩɔ awuyeli naa lɛ ba eŋɔɔ lɛ, ekɛ wolo tɛtrɛɛ lɛ tsɔɔ lɛ, ni ewie akɛ esusuko he dã akɛ abaanyɛ afo lɛ yɛ gbɛteŋ.

Polisifonyo lɛ na wolo lɛ he miishɛɛ waa ni ekɛɛ akɛ nɔ ni yɔɔ sɛɛ lɛ he miihia waa bɔ ni no baanyɛ aha abɔ maŋbii lɛ kɔkɔ yɛ mɛi ni foɔ mɛi yɛ gbɛteŋ lɛ ahe. Aŋmɛ gbɛ koni akala enɛ agboi koni akɛkpɛtɛ shi yɛ maŋ. Enɛ ye ebua ni aja wolo tɛtrɛɛ nɛɛ aaafee 3,000 yɛ Greater Manchester niiaŋ.