Sanebimɔi Ni Jɛ Kanelɔi Adɛŋ

◼ Mɛɛ sɔrɔtofeemɔ ka naanɔ shihilɛ ni gbele bɛ mli kɛ naanɔ wala teŋ?

Mɛi ni afɔ amɛ mu ni amɛnine shɛɔ mumɔŋ wala nɔ yɛ ŋwɛi kɛ adesai ni Nyɔŋmɔ buɔ amɛ jalɔi kɛhaa wala yɛ shikpɔŋ nɔ Paradeiso lɛ mli lɛ fɛɛ baana wala ni bɛ naagbee mli ŋɔɔmɔ. No hewɔ lɛ kɛ osusu nɔ ni baajɛ mli aba lɛ he lɛ, naanɔ shihilɛ ni gbele bɛ mli yɛ ŋwɛi kɛ naanɔ wala yɛ shikpɔŋ nɔ lɛ, nɔ kome too lɛ nɔŋŋ ni​—shihilɛ kɛmiiya naanɔ. Shi nɔ ko yɛ moŋ ni abaanyɛ awie yɛ naanɔ shihilɛ ni gbele bɛ mli he.

Hela wiemɔ ni atsɔɔ shishi akɛ “naanɔ shihilɛ ni gbele bɛ mli” (athanasia) lɛ jɛ nɔ ko ni bɛ, a, kɛ agbɛnɛ thanatos,ni eshishi ji “gbele” mli. No hewɔ lɛ shishinumɔ ni yɔɔ shihilɛ ni gbele bɛ mli lɛ mli ji ‘gbele bɛ,’ aloo agbooo. Belɛ shishinumɔ yɛ he akɛ Yehowa ji wala fɛɛ jɛɛhe, ni yɛ enɛ hewɔ lɛ eyɛ shihilɛ ni gbele bɛ mli. (Lala 36:​10; 90:​1, 2) Nɔ ni maa enɛ nɔ mi ji anɔkwale ni eji akɛ e-Bi ni awo ehiɛ nyam amrɔ nɛɛ lɛ ji “[Nyɔŋmɔ] enunyam kpɛmɔ lɛ kɛ esu lɛ henɔ,” ni atsɔɔ mli akɛ eji “maŋtsɛmɛi amaŋtsɛ kɛ nuŋtsɔmɛi anuŋtsɔ . . . mɔ hu ni lɛ ekome eyɔɔ naanɔ shihilɛ ni gbele bɛ mli.” (Hebribii 1:3; 1 Timoteo 6:​15, 16) Bɔɔnɔ ko bɛ ni baanyɛ ahe Yesu wala, akɛ mɔ ni yɔɔ naanɔ shihilɛ ni gbele bɛ mli lɛ, ni haa esoroɔ lɛ yɛ adesai loo mumɔi ni baanyɛ agboi lɛ ahe lɛ. Agbɛnɛ hu wɔkaneɔ akɛ: “Ni atee Kristo shi kɛjɛ gbohii ateŋ nɛɛ, egboŋ dɔŋŋ; gbele yeŋ enɔ nuŋtsɔ dɔŋŋ.”​—Romabii 6:⁠9.

Eyɛ mli akɛ, yɛ eshishinumɔ naa lɛ, naanɔ shihilɛ ni gbele bɛ mli ji naanɔ wala moŋ, shi eka shi faŋŋ akɛ, naanɔ shihilɛ ni gbele bɛ mli lɛ tsɔɔ nɔ ko fe ákɛ mɔ ni hiɛ enɛ lɛ baahi shi kɛya naanɔ kɛkɛ. Etamɔ nɔ ni etsɔɔ wala su pɔtɛɛ ko, ni akɛtoɔ fitemɔ ni afiteee dɔŋŋ he. Biblia lɛ wieɔ Kristofoi ni akɛ mumɔ efɔ amɛ mu ni amɛnine shɛɔ ŋwɛi nyɔmɔwoo lɛ nɔ lɛ ahe akɛ: “Ja nɛkɛ fitemɔ nɔ̃ [yɛ adesa gbɔmɔtso mli lɛ] nɛɛ wo nɔ ni fiteee lɛ, ni nɛkɛ gbele nɔ̃ nɛɛ wo nɔ ni gbooo lɛ. Shi beni nɛkɛ fitemɔ nɔ̃ nɛɛ ewo nɔ ni fiteee lɛ, ni nɛkɛ gbele nɔ̃ nɛɛ ewo nɔ ni gbooo lɛ, no lɛ wiemɔ ni aŋma lɛ aaaba mli akɛ: ‘Ami gbele yɛ kunim mli.’”​—1 Korintobii 15:​53-55. .

Shi kɛlɛ, Biblia lɛ etsɔɔɔ wala su ni ji naanɔ shihilɛ ni gbele bɛ mli lɛ mli babaoo. Wɔle akɛ esa akɛ adesai ni gboiɔ nɛɛ​—adesai ni yeɔ emuu po ni yɔɔ naanɔ wala yɛ shikpɔŋ nɔ he hiɛnɔkamɔ lɛ​—aye nii ni amɛnu nu koni amɛhi wala mli, kɛ jeee nakai lɛ amɛbaagboi ni amɛgbɔmɔtsei lɛ baafite. (1 Mose 2:​9, 15, 16) Ŋwanejee ko bɛ he akɛ nibii ni tamɔ nakai he ehiaaa wala su ni ji naanɔ shihilɛ ni gbele bɛ mli lɛ. No hewɔ lɛ abaanyɛ akɛɛ akɛ gbele bɛ hewalɛ yɛ mɛi fɛɛ ni yɔɔ naanɔ shihilɛ ni gbele bɛ mli lɛ anɔ, aloo ‘gbele yeee amɛ nɔ nuŋtsɔ dɔŋŋ.’ Enɛ hu kɛ fitemɔ ni amɛfiteee dɔŋŋ lɛ kpaa gbee, ejaakɛ amɛ mumɔŋ gbɔmɔtso loo bɔɔ su lɛ fiteee, ekpɔtɔɔɔ. (Okɛto 2 Korintobii 5:1; Kpojiemɔ 20:6 he.) Abaanyɛ ana sɔrɔtofeemɔ ni yɔɔ naanɔ shihilɛ ni gbele bɛ mli lɛ kɛ naanɔ wala teŋ yɛ nɛkɛ gbɛi nɛɛ anɔ.

Yehowa Nyɔŋmɔ ji Kojolɔ ni yeɔ emuu ni kɛ naanɔ shihilɛ ni gbele bɛ mli woɔ mɛi ni afɔ amɛ mu lɛ nyɔmɔ. Kɛji akɛ etsɔ enilee ni bɛ naagbee lɛ kɛ esɛɛyoomɔ nɔ emu sane akɛ áka mɛi ni tamɔ nɛkɛ lɛ akwɛ kwraa ni ŋwanejee ko bɛ he akɛ amɛsa kɛha naanɔ shihilɛ ni gbele bɛ mli lɛ, wɔbaanyɛ wɔhe wɔye akɛ amɛbaaye anɔkwale kɛya naanɔ. Mɛi fɛɛ ni Yehowa kojoɔ amɛ akɛ amɛsa shihilɛ ni bɛ naagbee lɛ baanyɛ aja lɛ kɛya naanɔ, kɛji akɛ amɛji mumɔŋ bɔɔ nii ni yɔɔ naanɔ shihilɛ ni gbele bɛ mli aloo amɛji adesai ni yeɔ emuu. No hewɔ lɛ, kɛ aaamu sane naa yɛ naagbee lɛ, adesa shihilɛ kɛmiiya naanɔ kɛ naanɔ shihilɛ ni gbele bɛ mli yɛ ŋwɛi fɛɛ kɛ naanɔ wala baa.​—Yohane 17:⁠3.

[Akrabatsa ni yɔɔ baafa 30]

“Shi jeee mijwɛŋmɔi lɛ ji nyɛjwɛŋmɔi lɛ, ni jeee amɛgbɛi lɛ ji migbɛi lɛ, Yehowa kɛɛ. Shi bɔ ni ŋwɛi kwɔ fe shikpɔŋ lɛ, nakai migbɛi lɛ kwɔ fe shikpɔŋ lɛ, nakai migbɛi lɛ kwɔ fe nyɛgbɛi, ni mijwɛŋmɔi lɛ. . . . Nakai miwiemɔi ni jɛɛɔ midaaŋ lɛ hu aaafee: Ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeha nɔ ni mitsu lɛ yɛ hewɔ lɛ aya nɔ.”

July Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)