Mɛni Paradeiso Tsɔɔ Kɛha Bo?

TE OBAANYA shihilɛ yɛ paradeiso mli he oha tɛŋŋ​—bianɛ nɔŋŋ? Obaakɛɛ akɛ. ‘Kaafee ohe mɔ ni aŋmɔɔ lɛ! Paradeiso ko bɛ shikpɔŋ nɛɛ nɔ!’ Aloo eko yɛ? Ojogbaŋŋ, no diɛŋtsɛ damɔ nɔ ni “paradeiso” tsɔɔ lɛ nɔ.

Mɛni nakai wiemɔ lɛ tsɔɔ kɛha bo? Adebɔɔ mli shihilɛhei fɛfɛji? Fai wuji kɛ gɔji ateŋ jɔɔɔi ni yɔɔ kpoo ni akɛ ebɔɔ ni gbeɔ mɔ woko mli muji? Kooloi​—jatai, kootsɛmɛi, gwantɛŋ bii kɛ ofrote​—ni fɛɛ kɛ amɛhe miihi shi yɛ toiŋjɔlɛ mli? Eji anɔkwale, ebaafee nɔ ni yɔɔ miishɛɛ waa kɛ aaawie he fioo po lɛ, akɛ aaahi paradeiso shihilɛi ni tamɔ nɛkɛ mli. Shi anɔkwale ni yaa mɔbɔ ji akɛ, yɛ be mli ni shihilɛhei komɛi ni yɔɔ fɛo yɔɔ shikpɔŋ nɔ lolo lɛ, wɔkɛ shihilɛ yɛ paradeiso mli teŋ jɛkɛ waa. Aloo jeee nakai?

Susuma enɛ he: Wiemɔ “paradeiso” lɛ shishinumɔ diɛŋtsɛ kɔɔ nibii babaoo he fe tsei kɛ kwɛ̃ɛ nii kɛkɛ​—shihilɛhei ni yɔɔ fɛo. Ebiɔ babaoo fe shihilɛ ni yɔɔ fɛo dani shihilɛ afee nɔ ni ŋɔɔ. Babaoo fata he. Akɛ nɔkwɛmɔ nɔ lɛ: Ŋɔɔ lɛ akɛ oohala shikpɔŋ nɛɛ nɔ he ko ni oyahi​—shikpɔŋ ni ka shi lɛ nɔ he ni yɔɔ fɛo fe fɛɛ aloo ŋshɔkpɔ ni hulu tsoɔ yɛ nɔ ni yɔɔ fɛo waa. Ani obaana miishɛɛ diɛŋtsɛ kɛji akɛ akutseiaŋbii ji mɛi ni nyɛɛɔ mɛi, kpɛkpɛɛlɔi, pɛsɛmkunyatsɛmɛi, hetsɛ̃lɔi, mɛi ni bɛ bulɛ kɛha bo loo onibii ni oyɔɔ lɛ? Ebaawa waa! Gbɔmɛi ni tamɔ nɛkɛ baanyɛ aha oshihilɛ afee nɔ ni yɔɔ mɔbɔ ni bɔ ni shihilɛ ni ebɔle ohe lɛ yɔɔ fɛo ha lɛ kɔɔɔ he eko!

Belɛ, shishinumɔ yɛ mli akɛ “paradeiso” damɔɔɔ nibii ni ebɔle wɔhe ni anaa lɛ kɛkɛ nɔ shi moŋ gbɔmɛi hu nɔ. Ejaakɛ kɛji oosusu paradeiso he lɛ, ani osusuuu gbɔmɛi ni yɔɔ miishɛɛ, ni sumɔɔ toiŋjɔlɛ ni kɛ amɛhe hiɔ shi yɛ suɔmɔ mli lɛ he? No hewɔ lɛ, dani aaatsɛ shikpɔŋ lɛ nɔ he ko ni yɔɔ fɛo akɛ paradeiso yɛ bɔ ni wiemɔ lɛ shishi diɛŋtsɛ ji naa Iɛ, esa akɛ gbɔmɛi ni baahi jɛmɛ lɛ ana gbɔmɔtsoŋ sui ni tamɔ Nyɔŋmɔ nɔ lɛ.

Biblia lɛ tsɔɔ tsakemɔi ni tamɔ nɛkɛ ni baaha yɛ gbɔmɛi asui amli, ni etsɔɔ gbɔmɛi lɛ amumɔŋ shihilɛ mli​—gbɔmɛi ni amɛtsake amɛgbɔmɔtsoŋ sui kɛ amɛshihilɛ mli yɛ nɔ ni hi hewɔ. Shi ekolɛ oobi ohe akɛ: ‘Ani mfonirifeemɔ mli paradeiso ni tamɔ nɛkɛ diɛŋtsɛ yɛ shihilɛ mli ŋmɛnɛ? Kɛ eko yɛ lɛ, nɛgbɛ eyɔɔ?’