Ani Ohiɛ Sɔɔ Nɔ ni Nyɔŋmɔ Efee Kɛha Bo Lɛ?

YOO ko bɔ mɔdɛŋ ni egbɛ Biblia mli sanekpakpa lɛ etsɔɔ ekutsoŋnyo ko, Chinese yoo ko ni kwɛɔ ebii enyɔ yɛ shia. Shi hetoo ni ekɛhaa emɔdɛŋbɔɔ lɛ ji akɛ: “Mitsɔŋ Kristofonyo tamɔ bo gbi ko gbi ko!”

Ní enɛ aaaje Kristofonyo yoo nɛɛ nijiaŋ wui moŋ lɛ, etee nɔ ejie mlihilɛ kpo etsɔɔ ekutsoŋnyo nɛɛ, etee yoo nɛɛ ŋɔɔ shii abɔ koni eye ebua lɛ. Fiofio lɛ, nɛkɛ mlihilɛ nɛɛ kanya ekutsoŋnyo nɛɛ ni yɛ naagbee lɛ ekpɛlɛ Biblia lɛ kasemɔ nɔ koni ekase babaoo yɛ Nyɔŋmɔ ni ejalɔi jie suɔmɔ ni pɛsɛmkunya bɛ mli nɛkɛ kpo lɛ he nii. Yɛ be ni sa mli lɛ, Chinese yoo nɛɛ diɛŋtsɛ batsɔ Yehowa, Biblia lɛ Nyɔŋmɔ lɛ jalɔ, yɛ ewu ni te shi wo lɛ waa lɛ fɛɛ sɛɛ.

Nɛkɛ niiashikpamɔ nɛɛ yeɔ odase akɛ mɔ fɛɛ mɔ ni jwɛŋmɔŋ ka shi lɛ hiɛ sɔɔ mlihilɛ kɛ mɔhesusumɔ ni aaajie lɛ kpo yɛ egbɛfaŋ. Ni eji adebɔɔ su kɛ nɔ ni ja hu akɛ wɔjie hiɛsɔɔ kpo wɔtsɔɔ mɔ ni jieɔ mlihilɛ ni tamɔ nɛkɛ kpo lɛ. Fɛɛ sɛɛ lɛ, ŋɔɔ lɛ akɛ onaanyo ko efɔ nine etsɛ bo kɛtee okpɔlɔ kpeteŋkpele ko ni efite be kɛ mɔdɛŋbɔɔ kɛ shika babaoo yɛ he lɛ shishi. Beni oye niyenii ni tamɔ nɛkɛ ogbe naa lɛ, ani obaana ekaa ni oshi okpɔlɔ lɛ shishi ni owieee nɔ kɔ po ni okɛtsɔɔ ohiɛ ni esɔ gbɔfeemɔ kpele ni ajie lɛ kpo atsɔɔ bo lɛ? Ojogbaŋŋ, belɛ wɔ Bɔlɔ lɛ hu? Ani ohiɛ sɔɔ nɔ ni efee kɛha wɔ fɛɛ lɛ?