Sanebimɔi Ni Jɛ Kanelɔi Adɛŋ

■ Ani esa akɛ mɔ ko awie “yitsei” ahe yɛ be mli ni ewieɔ Biblia mli wolo ni ji Lalai lɛ ahe lɛ?

Ajara Biblia lɛ mli afee lɛ woji komekomei 66, ni Lalai lɛ ji emli ekome. Yitso lɛ ji wolo ko mlijaai titri lɛ eko fɛɛ eko kɛji akɛ eji yinɔsane wolo, sane ko ni aka yiŋ aŋma aloo eji Biblia mli wolo ko. No hewɔ lɛ wɔfɔɔ 1 Mose yitso 2 kɛ ekrokomɛi ahe wiemɔ. Kɛ wɔsusu he yɛ nɛkɛ gbɛ nɔ lɛ, belɛ wɔbaanyɛ wɔmu naa akɛ abaanyɛ awie Lalai komekomei 150 lɛ ahe hu akɛ yitsei.

Shi, Ŋleshi gbɛi “Lalai” lɛ ji nɔ ni ana kɛjɛ Hela Septuagint, ni tsɛ wolo lɛ Psalmoi lɛ mli. Hela gbɛi nɛɛ tsɔɔ lalai ni akɛ saŋkui fata he ala. Eka shi faŋŋ akɛ lalafoo niŋmaai ni feɔ wɔ Lalai awolo lɛ ji lalai ni ala kɛjɛ shishijee, ekolɛ ni kpaa saŋku fata he. Yɛ anɔkwale mli lɛ, Webster’s New Collegiate Dictionary lɛ tsɔɔ “lala” mli akɛ “lala krɔŋkrɔŋ ni akɛ tsu nii yɛ jamɔ mli; titri lɛ: Biblia mli lalai ni abUa naa yɛ Lalai Awolo lɛ mli lɛ eko.”

No hewɔ lɛ, yɛ be mli ni, ákɛ nɔkwɛmɔ nɔ lɛ, efeŋ nɔ ni ejaaa aloo tɔmɔ akɛ wɔɔwie “Lalai yitso 100” he lɛ, eja gbɛ kwraa moŋ ni eji nɔ ni nyɛɔ etsɔɔ nɔ mli akɛ wɔɔwie “Lala 100” he aloo “Lala ni ji 100” lɛ he. Yɛ anɔkwale mli lɛ nɛkɛ ji gbɛ ni kaselɔ Luka tsɔ nɔ ekɛtsu nii be mli ni eŋmaa Bɔfoi lɛ Ahe Saji lɛ, ejaakɛ etsi wiemɔ ko ta ákɛ “aŋma yɛ lala enyɔ lɛ mli.”​—Bɔfoi lɛ Asaji 13:⁠33.