Ani Oyɛ Bibioo Tsɔ Fe Bɔ Ni Ohe Aaahia?
ANI onuɔ he yɛ bei komɛi amli akɛ mɔ ko mɔ ko susuuu ohe? Ani onu he pɛŋ akɛ okome too pɛ oyɔɔ yɛ be mli ni gbɔmɛi ebɔleo kɛkpe? Mɛni hewɔ esa akɛ susumɔi ni tamɔ nɛkɛ ahao bo? Ejaakɛ yɛ saji pii amli lɛ, ŋmɛnɛ, mɔ aŋkro lɛ jeee mɔ ni he hiaa dɔŋŋ.
Keketee ni afeɔ yɛ maŋnɔyeli gbɛjianɔtoo he saji amli yɛ maji pii anɔ lɛ eha gbɔmɛi etsɔmɔ tamɔ saji loo nibii ni adamɔɔ nɔ asusuɔ nii ahe ni amɛlaaje yɛ computer tsɔnei ahe woji ni yɔɔ hwanyaŋŋ lɛ amli. Ámɛbatsɔmɔ tamɔ yibɔ loo akɔntaabuu kadimɔ nii ni he ehiaaa amɛha nɔyeli lɛ nitsumɔ he ko ni bɛ gbɛi loo anaaa. Ani onuɔ he nakai yɛ bei komɛi amli?
Aloo ekolɛ otsuɔ nii yɛ nitsumɔ he ko ni hiɛ nitsulɔi akpei ohahai abɔ. Yɛ enɛ hewɔ lɛ obaanu he akɛ otamɔ dade kpɔ bibioo ko yɛ shwiili he aloo kpãa bibioo ko yɛ mama ko ni alo mli. Mɛi ni hiɔ maji wuji amli lɛ po nuɔ mɔ kome shihilɛ he. Mɛni hewɔ ebaa lɛ nakai? Ejaakɛ kuuŋbii loo akutseiaŋbii etsɔmɔ gbɔi kwraa amɛha amɛhe, akɔntaabuu okadi kroko yɛ shinaa kroko lɛ hiɛ.
Hɛɛ, ewaaa kwraa akɛ ooosusu akɛ oyɛ bibioo tsɔ fe bɔ ni ohe aaahia, oyɛ nyɛkɛsiɔɔ tsɔ fe bɔ ni aaayoo bo yɛ gidigidifeemɔ ni yaa nɔ yɛ ŋmɛnɛŋmɛnɛ beaŋ shihilɛ mli lɛ mli. Enɛ ji anɔkwale, titri lɛ yɛ ŋmɛnɛŋmɛnɛ beaŋ gbɔmɛi asafoi ni akaŋshii mumɔ ni yaa nɔ yɛ amɛteŋ lɛ eha mɛi pii etsɔmɔ mɛi ni nuuu nii ahe amɛhaaa mɔ lɛ ateŋ. Anaanaa bulɛ ni mɔ yɔɔ kɛha ehe lɛ nɔ ni asusuɔ akɛ “Jee jɛmɛ” aloo “Yaa gbe ohe!’ lɛ ji hetoo ni tsɔɔ nilee.
Shi ani nakai nɔŋŋ eji yɛ Nyɔŋmɔ gbɛfaŋ? Ani lɛ ni ji Je Muu Fɛɛ Nuŋtsɔ lɛ nɔ kwɔ kwraa fe adesai akɛ wɔyɛ bibioo tsɔ fe bɔ ni wɔhe sane aaakɔ ehe? Biblia lɛ tsɔɔ akɛ be ko lɛ ŋwɛibɔfoi “akpei nyɔŋma toi akpei nyɔŋma [akpekpei 100]” badamɔ Yehowa hiɛ. (Daniel 7:10) Lɛ nɔŋŋ ji ŋulamii ni anyɛɛɛ akane ni yɔɔ je mu fɛɛ lɛ Bɔlɔ. Ani ekolɛ enyɛɛɛ ekai mumɔŋ kɛ helooŋ bɔɔ nii nɛɛ fɛɛ dɔŋŋ? Biblia lɛ haa hetoo: “Etsɔɔ ŋulamii ayibɔ hu; ekɛ amɛteŋ mɔ fɛɛ mɔ gbɛi tsɛɔ lɛ.” (Lala 147:4) Eka shi faŋŋ akɛ ŋwɛi bɔɔ nii lɛ jeee nii ni nyiɛ ŋwɛi kɛkɛ ni nɔ ko kudɔɔɔ amɛ. Yɛ ŋwɛibɔfoi ni ji jalɔi lɛ ahe lɛ, eka shi faŋŋ akɛ Yehowa kɛ amɛgbɛi tsɛɔ amɛ hu, eyɛ mli akɛ amɛteŋ mɛi enyɔ pɛ, Mikael kɛ Gabriel ajie amɛgbɛi kpo atsɔɔ gbɔmɔ.—Daniel 12:1; Luka 1:26.
Belɛ adesai hu? Ani Nyɔŋmɔ susuɔ amɛhe? Lalatsɛ David ŋma akɛ: “Yehowa, ha male minaagbee kɛ migbii lɛ ayibɔ, bɔ ni ji, ni male mitsɛ ni mitsɛŋ lɛ! Naa, ofee migbii lɛ tamɔ klakate, ni miwala be tamɔ nɔ ni jeee nɔ ko nɔ ko yɛ ohiɛ. Lɛlɛŋ, gbɔmɔ fɛɛ gbɔmɔ lɛ, kɛ edamɔ nɔ akɛ mɛ̃, lamɔ kɛkɛ ji lɛ.” (Lala 39:5, 6) Kɛji akɛ gbɔmɔ ji lamɔ ko kɛkɛ ni hoɔ yaa lɛ, belɛ te wɔɔfee tɛŋŋ wɔna nɔmimaa akɛ ejeee mɔ ni yɔɔ bibioo tsɔ aloo etsɛɛɛ kwraa kɛha bɔ ni Nyɔŋmɔ aaasusu ehe? Yɛ Nyɔŋmɔ hiɛ lɛ, ani adesai ahe hiaa diɛŋtsɛ? Ani BO ohe hiaa diɛŋtsɛ?