Awo Maŋsɛɛ Sanekpakpashiɛlɔi Hee Lɛ Hewalɛ: “Nyɛhiɛa Nyɛnɔkwayeli Lɛ Mli”
HƆGBAA, September 12, 1982, ji gbi ko ni jeŋ fee frɔnɔɔ yɛ New York Maŋtiase lɛ mli. Shi shwɛ fioo ni kuu ko ni amɛyibɔ shɛɔ akpei enyɔ akayɔse enɛ. Mɛnɛɛmɛi ji mɛi ni gbi lɛ leebi lɛ, amɛwo amɛyi amɛwo Yehowa Odasefoi Akpee Asa ni yɔɔ Queens lɛ ni amɛyakwɛ Buu-Mɔɔ Biblia Skul ni yɔɔ Gilead lɛ kuu ni ji nyɔŋmai kpawo kɛ etɛ lɛ anikasemɔ naagbee he nifeemɔ lɛ.
Beni atswa ŋmɛji nyɔŋma pɛpɛɛpɛ kɛkɛ ni sɛinɔtalɔ kɛha gbi lɛ, Leo Greenlees, ni eji Nɔyeli Kuu lɛ Nitsɔɔmɔ Ajinafoi lɛ mlinyo lɛ bi ni agbala jwɛŋmɔ kɛba nifeemɔ lɛ nɔ. Sanegbaa tsokotsoko lɛ fɛɛ ba shi ni mɔ fɛɛ mɔ yatao he ko eta, ni akɛ lala ni akɛjieɔ Yehowa yi kɛ sɔlemɔ je nifeemɔi lɛ ashishi. Yɛ ewiemɔ lɛ shishijee mli lɛ, Nyɛminuu Greenlees kai nikaselɔi lɛ akɛ amɛji “gbɔmɛi ahe wolɛi.” (Mateo 4:19) Ekɛɛ akɛ, kɛbashi bianɛ lɛ, amɛtsuɔ amɛwuoyaa nitsumɔ lɛ titri yɛ “nui lɛ anaa.” Amrɔ nɛɛ lɛ amɛmiiya shɔŋŋ ni amɛyatsu “ŋwɛi wuoyaa” nitsumɔ lɛ yɛ jɛmɛ. Gilead nikasemɔ lɛ etsɔɔ amɛ ŋaa gbɛi ni he hiaa kɛha wuoyaa krɛdɛɛ nɛɛ.
Agbɛnɛ Nyɛminuu Greenlees kɛ Grant Suiter, ni eji Woji Akalamɔ Ajinafoi lɛ mlinyo lɛ tsɔɔ. Wiɛlɔ nɛɛ tsɛ gbalɛ ni yɔɔ Hoshea yitso 2 kukuji 23 kɛyashi 25 lɛ ni kɔɔ sɛɛkuu kɛ saamɔ lɛ he lɛ kɛba jwɛŋmɔ mli. Ekɛɛ akɛ ajɔɔ nikaselɔi nɛɛ waa akɛ amɛmiibote maŋsɛɛ sanekpakpashiɛmɔ nitsumɔ lɛ mli yɛ nidumɔ be kɛ be ni ‘akɛaaha hetoo’ diɛŋtsɛ yɛ Yehowa kɛ ewebii lɛ ateŋ lɛ mli.
Esɛɛmɔ, Calvin Chyke ni fata Nitsumɔhe Ajinafoi lɛ he lɛ wo nikaselɔi lɛ ahewalɛ ni amɛya nɔ yɛ “Nyɔŋmɔjamɔ” mli. (1 Timoteo 4:7, 8, 12) Ekɛɛ, “nyɛhetuukɛhamɔ ni Nyɔŋmɔ gbeyeishemɔ yɔɔ mli lɛ he hewalɛ lɛ baatsirɛ mɛi krokomɛi ni amɛsumɔ akɛ amɛaafata nyɛhe yɛ sɔɔmɔ krɔŋkrɔŋ lɛ mli.”
Nitsulɔi ahe saji Ajinafoi lɛ najiaŋdamɔlɔ Dan Sydlik ji mɔ ni nyiɛ sɛɛ. Etsɔɔ mli akɛ wekukpaa ni miishɛɛ yɔɔ mli ni aaaka gbɔmɛi ateŋ lɛ baaa kɛkɛ. Esa akɛ nyɛfee ni eba. Ekɛɛ akɛ, “nɔ ko bibioo po ni awooo he nyɔmɔ tamɔ ŋmɔlɔ baanyɛ aye abua.”—Romabii 12:13.
Lloyd Barry ji mɔ ni damɔ Niŋmaa Ajinafoi lɛ najiaŋ, ni ewo maŋsɛɛ sanekpakpashiɛlɔi heei nɛɛ ahewalɛ ni amɛkwɛ jogbaŋŋ ni amɛkɛ mumɔŋ nibii kpakpai afata amɛhe beni amɛtoɔ amɛnibii ni amɛfa kɛya amɛnitsumɔhei lɛ. Ewo amɛ ŋaa hu yɛ gbalɔ Hagai wiemɔi lɛ anaa akɛ, “Wajemɔ ohe ni nyɛtsua nii.”—Hagai 2:4.
Afɔ nine atsɛ Gilead Skul tsɔɔlɔi enyɔ lɛ agbɛnɛ ni amɛkɛ naagbee ŋaawoo wiemɔi abaha. Tsutsu maŋsɛɛ sanekpakpashiɛlɔ, Jack Redford bɔ nikaselɔi lɛ kɔkɔ akɛ: “Wɔ fɛɛ wɔyɛ wɔmiishɛɛ bei kɛ fimɔ bei. Mɔ fɛɛ mɔ baanyɛ atsu nɔ ko yɛ miishɛɛ bei lɛ ahe. Bɔ ni otsuɔ fimɔ bei lɛ ahe nii ohaa lɛ ji nɔ ni baatsɔɔ kɛji akɛ obaanyɛ oka he yɛ maŋsɛɛ sanekpakpashiɛmɔ nitsumɔ lɛ mli.” Ni Skulbii lɛ anɔkwɛlɔ, Ulysses Glass bi amɛ ni amɛkpee naagbai ni amɛkɛaakpe yɛ amɛnitsumɔi lɛ amli lɛ anaa akɛ mɛi ni edara, akɛ onukpai.
Enaagbee lɛ, Skul lɛ nɔkwɛlɔ, Frederick Franz wie etsɔɔ nikaselɔi lɛ. Wielɔ nɛɛ, ni eye afii nyɔŋmai nɛɛhu bianɛ lɛ kai amɛ akɛ amɛmiisɔmɔ Tookwɛlɔ kpele ko ni eji jeŋ nɔyelɔ hu. Ebi amɛ ni amɛfee ekome ni amɛye anɔkwa yɛ jeŋ fɛɛ kuu lɛ mli ni emu naa akɛ: “Eba akɛ Ŋwɛi Shɔŋŋ Nyɔŋmɔ lɛ aaatsɔ e-Tookwɛlɔ Yesu Kristo nɔ ajɔɔnyɛ ni ekɛnyɛ atsu nii waa yɛ nyɛnitsumɔi lɛ amli.”
Akɛ nikaselɔi lɛ ayijiemɔ woji ha amɛ, ni sɛinɔtalɔ lɛ tsi nifeemɔ lɛ eto kɛha shwane niyeli. Agbɛnɛ, beni atswa 2:15 p.m. lɛ, Don Adams, ni efata Betel Shia Ajinafoi lɛ he lɛ kwɛ Buu-Mɔɔ nikasemɔ lɛ nɔ, ni nikaselɔi lɛ ji mɛi ni ha hetoo. Yɛ sɛɛ mli lɛ, amɛkɛ nifeemɔ ni yɔɔ fɛo ni kɔɔ lalai kɛ niiashikpamɔi ahe ha, ni amɛkɛ Biblia mli drama ni tsirɛɔ mɔ ni woɔ mɔ hewalɛ gbe fɛɛ naa.
Beni atswa gbɛkɛnaashi ŋmɛji ejwɛ kɛ fa lɛ akɛ nifeemɔ lɛ ba naagbee. Kɛkɛ ni nikaselɔi lɛ bɔi amɛhesaamɔ ni amɛya amɛyafee “gbɔmɛi ahe wolɛi” yɛ hei ni jɛkɛ ni amɛaatsu amɛmaŋsɛɛ sanekpakpashiɛmɔ nitsumɔi lɛ yɛ lɛ, yɛ be mli ni ŋaawoo wiemɔi kpakpai nɛɛ gbɛɔ yɛ amɛtoii amli lolo lɛ.