Shɛ Ohaomɔi lɛ Ofɔ Yehowa Nɔ

ANI nuu ko ni efite gbala ni egbe gbɔmɔ lɛ aaafee yeyeeye? Yɛ anɔkwale mli lɛ ebaafee, kɛ eyɛ henilee ko lɛ. Maŋtsɛ David yɛ henilee. Shi, beni akɔnɔ te shi yɛ emli waa lɛ, nɛkɛ blema Hebri maŋtsɛ nɛɛ kɛ yoo ko ni gbɛi ji Batsheba fite gbala. Shihilɛ lɛ mli bawo wu beni yoo lɛ na musu lɛ, ni yɛ naagbee lɛ enɛ tsirɛ lɛ ni eto ewu lɛ gbele he ŋaa ni ekɛ yoo lɛ ahi shi.

Beni ehiɛ ba nɔ ni efee lɛ nɔ lɛ, ani ooonyɛ osusu yeyeeyefeemɔ kɛ ehenilee mli piŋmɔ ni ena nɔ yɛ mli lɛ he? Shi ehe ehiaaa ni wɔsusu bɔ ni eba ha lɛ he ejaakɛ David diɛŋtsɛ tsɔɔ enɛ mli ehaa wɔ. Nɛkɛ haomɔi ni tsara nɔ nɛɛ ji nɔ ni tsirɛ lɛ ni eŋma lala nyɔŋmai enumɔ kɛ ekome lɛ.

Te David tsu yeyeeyefeemɔ nɛɛ he nii eha tɛŋŋ? Lala lɛ kɛɔ wɔ akɛ ejaje nɔ ni efee lɛ faŋŋ etsɔɔ Yehowa, e-Nyɔŋmɔ lɛ ni etsɔɔ tsuitsakemɔ ni mli kwɔ ni jɛ tsuiŋ. Agbɛnɛ ekpa Nyɔŋmɔ fai ni eye ebua lɛ ni ena mumɔ kroko. Ekɛɛ: “Nyɔŋmɔ bɔɔ tsui ni he tse oha mi, ni ofee mumɔ ni fiɔ shi ehee yɛ mimli.” (Lala 51:12) Yɛ nɛkɛ gbɛ nɔ lɛ, ‘eŋɔ ehaomɔi fɛɛ efɔ Yehowa nɔ.’​—1 Petro 5:⁠7.

Ani Nyɔŋmɔ baaye abua mɔ ko ni efee eshai tamɔ nɛkɛ? David yɛ hiɛnɔkamɔ akɛ eeefee nakai. Ekɛɛ: “Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpoŋ!” (Lala 51:19) Yinɔsane tsɔɔ akɛ David na nɔ ewala gbii abɔ fɛɛ yɛ nɔ ni jɛ nii ni efee lɛ mli ba lɛ hewɔ. Shi yɛ etsui mli ni ejɛ etsake hewɔ lɛ, e-Bɔlɔ lɛ shiii lɛ. Aye abua lɛ ni enyɛ edamɔ ehaomɔi lɛ anaa.

Ekolɛ wɔgbeko mɔ ko. Shi wɔteŋ mɔ ko bɛ ni ebɛ haomɔi yɛ gbɛ ko nɔ.Wɔ fɛɛ wɔfeɔ esha, ni henilee ni haoɔ mɔ ji jatsu ni tsii diɛŋtsɛ. Kɛfata he lɛ, etamɔ nɔ ni mɔ fɛɛ mɔ yɛ naagbai yɛ gbɔmɔtsoŋ hewalɛnamɔ, nibii ajara ni yaa hiɛ, ekolɛ bii atsɔsemɔ, nitsumɔ, naagbai ni anaa yɛ mɛi krokomɛi adɛŋ, awuyeli, nyɔmɔ kɛ nibii ni tamɔ nakai amli. Ani obɔɔ mɔdɛŋ ni okome otere nɛkɛ naagbai nɛɛ fɛɛ? Yɛ anɔkwale mli lɛ ebiii ni ofee nakai. Obaana miishɛɛ waa kɛ onyiɛ ŋmalɛ mli ŋaawoo nɛɛ sɛɛ, akɛ: “Shɛ ojatsu lɛ ofɔ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidãa.”​—Lala 55:⁠23.

Bɔ Ni Ooofee Obi Yehowa Yelikɛbuamɔ

Mɛɛ gbɛ nɔ wɔɔtsɔ wɔshɛ wɔjatsu lɛ wɔfɔ Yehowa nɔ? Yɛ anɔkwale mli lɛ esa ni wɔsɔle wɔha lɛ ni wɔgba lɛ wɔnaagbai lɛ. Abɛi awolo lɛ kɛ ŋaawoo kpakpa yɛ enɛ he haa wɔ. Ekɛɔ wɔ akɛ: “Okɛ ohiɛ afɔ Yehowa nɔ kɛ otsui fɛɛ, ni okɛ ohe akɛkpasa bo diɛŋtsɛ ojwɛŋmɔ.” (Abɛi 3:⁠5) No hewɔ lɛ, kɛ wɔmiitao Yehowa yelikɛbuamɔ lɛ, ehe hiaa ni wɔkɛ wɔhe afɔ lɛ enilee nɔ, shi jeee wɔ diɛŋtsɛ wɔnɔ nɔ. Yɛ bei komɛi amli lɛ ebaabi ni wɔkase enɛ.

Akɛ nɔkwɛmɔ nɔ lɛ, yiwaa ni naa wa ba Kristofoi anɔ yɛ maŋ ko nɔ. Taakɛ amaniɛbɔɔ lɛ tsɔɔ lɛ, klɛŋklɛŋ lɛ amɛsɔle amɛha Nyɔŋmɔ kɛha yelikɛbuamɔ moŋ, shi amɛnuuu shishi. Amɛnuuu nɔ hewɔ ni shihilɛ ni tamɔ nɛkɛ ba amɛnɔ lɛ shishi ni amɛbɔ mɔdɛŋ ni amɛkɛɛ Yehowa nɔ ni amɛtaoɔ ni efee eha amɛ.

Shi amɛbana ekaa waa ni amɛkase bɔ ni amɛaabu enɛ akɛ eji hegbɛ ni amɛna akɛ amɛaana nɔ̃ yɛ jalɛ hewɔ. No hewɔ lɛ, amɛtamɔ bɔfoi ni hi shi yɛ blema lɛ pɛpɛɛpɛ, mɛi ni beni Yudafoi ahiɛnyiɛlɔi lɛ eyi amɛ sɛɛ lɛ, “amɛje akuashɔŋ lɛ hiɛ amɛtee kɛ miishɛɛ, akɛ egbɛi lɛ ahewɔ lɛ abu amɛ mɛi ni sa akɛ abɔɔ amɛ ahora” lɛ. (Bɔfoi lɛ Asaji 5:41) Agbɛnɛ yɛ Nyɔŋmɔ yelikɛbuamɔ naa lɛ ŋmɛnɛŋmɛnɛ bei amli Kristofoi nɛɛ kɛ tsuishitoo baa amɛhe shi yɛ yiwaai fɛɛ ni Satan kɛbaa amɛnɔ lɛ mli. Amɛkɛ amɛhe fɔɔ Yehowa nɔ ni etsu nibii ahe nii yɛ lɛ egbɛ nɔ, ni amɛkɛ tsuishitoo mɛɔ ebe ni sa ni ekɛaajie amɛ lɛ. Amɛshɛɔ amɛyeyeeyefeemɔi lɛ fɛɛ amɛfɔɔ enɔ yɛ hekɛnɔfɔɔ mli.​—Abɛi 14:⁠26.

Kɛfata he lɛ, wɔnaagbai lɛ ni wɔɔshɛ wɔfɔ Yehowa nɔ lɛ biɔ hemɔkɛyeli akɛ Yehowa baanyɛ ni ebaaye ebua wɔ. Yoo ko kase enɛ jogbaŋŋ. Efee yeyeeye, ejaakɛ eyɛ mli akɛ eetao ni esɔmɔ Yehowa moŋ, shi tawa shɛremɔ eka ehe. Esɔle ebi yelikɛbuamɔ, shi ekã he eshɛre tawa lɛ. Be ko sɛɛ lɛ enyɛ ekɛ miishɛɛ jaje akɛ: “Mikpa tawa shɛremɔ agbɛnɛ!” Mɛni hewɔ enyɛɛɛ ekpa be ni eho lɛ? Ekpɛlɛ nɔ akɛ: “Misɔle miha Nyɔŋmɔ ni eye ebua mi, shi miheee miyeee diɛŋtsɛ akɛ ebaanyɛ eye ebua mi.” Beni esɔle yɛ hemɔkɛyeli mli pɛ dani enine shɛ yelikɛbuamɔ ni etaoɔ Iɛ nɔ.​—Hebribii 11:⁠6.

Agbɛnɛ kɛ wɔmiishwe ni Yehowa aye abuɔ wɔ ni wɔdamɔ wɔyeyeeyefeemɔi lɛ anaa lɛ, nibii yɛ ni esa ni wɔfee. Yesu tsɔɔ enɛ beni ekɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛɔ mitsui mli; ni nyɛaana hejɔɔmɔ nyɛaaha nyɛsusumai lɛ.”​—Mateo 11:​28, 29.

Awieɔ akɛ, ‘Nyɔŋmɔ waa mɛi ni waa amɛhe lɛ.’ Yesu wiemɔi ni yɔɔ yiteŋgbɛ nɛɛ tsɔɔ yɛ anɔkwale mli akɛ, ‘Nyɔŋmɔ yeɔ buaa mɛi ni sumɔɔ akɛ amɛaaye amɛbua mɛi krokomɛi.’ Yesu kɛ hejɔɔmɔ​—heyeli kɛmiijɛ yeyeeyefeemɔ mli​—ha mɛi ni sumɔ akɛ ‘amɛwo epã’ lɛ, ni ji akɛ, amɛbaaba amɛhe shi amɛha Kristo gbɛtsɔɔmɔ ni amɛsɔmɔ Nyɔŋmɔ kɛ mɛi krokomɛi taakɛ bɔ pɛ ni Yesu fee lɛ.​—Mateo 9:​35-38; Yakobo 1:​27; 1 Yohane 3:⁠17.

Te Yehowa Yeɔ Buaa Ehaa Tɛŋŋ?

No hewɔ lɛ agbɛnɛ, kɛji akɛ wɔfee yeyeeye fe nine ni wɔkɛ wɔhemɔkɛyeli fɛɛ sɔle wɔha Nyɔŋmɔ, ni wɔtsɔɔ akɛ nɛkɛ hemɔkɛyeli nɛɛ ji anɔkwale kɛtsɔ esuɔmɔnaa nii ni wɔbɔɔ mɔdɛŋ akɛ wɔfee lɛ nɔ, ni wɔmiisɔmɔ lɛ ni wɔmiiye kɛmiibua mɛi krokomɛi lɛ, mɛɛ yelikɛbuamɔ nɛkɛ wɔbaakpa gbɛ?

Eeenyɛ eba akɛ Nyɔŋmɔ baajie naagba ni kɛ yeyeeyefeemɔ lɛ baa lɛ fɛɛ kɛya kwraa. Enɛ ji nɔ ni eba yɛ be kɛ bei amli. Aloo eeenyɛ eba akɛ eeeha wɔ nilee ni he hiaa ni wɔ diɛŋtsɛ wɔmɔ naagba lɛ naa aloo ni wɔna gbɛ ni sa ni wɔɔtsɔ nɔ wɔtsu amɛhe nii. Kɛkɛ lɛ wɔɔkpa anɔkwale ni yɔɔ Biblia mli abɛ nɛɛ mli lɛ shi: “Mɔ ni kɛ ehiɛ fɔɔ lɛ diɛŋtsɛ etsui nɔ lɛ, kwashia ni; shi mɔ ni nyiɛ nilee mli lɛ, aaahere eyiwala.”​—Abɛi 28:⁠26.

Te wɔɔfee tɛŋŋ wɔna Nyɔŋmɔ nilee nɛɛ? Yehowa webii akpeei ni wɔɔya kɛ Biblia lɛ kɛ Biblia kasemɔ woji ni wɔɔkane lɛ ji gbɛi enyɔ ni baa mɔ jwɛŋmɔ mli. Taakɛ nyɛ ko ni ji Kristofonyo ni fee yeyeeye waa akɛni ewu tɔɔ da lɛ jaje lɛ, “Buu-Mɔɔ lɛ ni mikaneɔ ni mikaseɔ ni mikɛtsuɔ nii lɛ eye ebua mi fe fɛɛ.”​—Hebribii 10:​24, 25; Lala 119:​97-104.

Aloo Yehowa baaye abua wɔ kɛtsɔ wɔnyɛmimɛi Kristofoi lɛ anɔ. Onukpa ko nine shɛ wolo ko ni kanyaa mɔ nɔ kɛjɛ mɛi enyɔ ko ni yɔɔ esafo lɛ mli lɛ adɛŋ ni efã ko kaneɔ nɛkɛ: ‘Wɔmiidao shi yɛ bei babaoo ni okɛbo wɔ toi ni oye obua wɔ yɛ wɔ diɛŋtsɛ wɔnaagbai amli, hewalɛ ni owo wɔ beni wɔhao, bɔ ni obasaraa wɔ kɛ́ wɔhe miiye, ni oboɔ wɔtsɛmɔi atoi ni obaa ni kɛ ohe miihia wɔwekui lɛ obayeɔ jenamɔ muu fɛɛ yɛ helatsamɔ hei lɛ hewɔ. Wɔmiida Yehowa shi akɛ wɔna nyɛminuu ni susuɔ wɔhe waa tamɔ bɔ ni ofeɔ lɛ.”

No hewɔ lɛ kɛ ofee yeyeeye lɛ, mɛni hewɔ okɛ mɛi ni eda yɛ mumɔŋ yɛ osafo lɛ mli lɛ eko egbaaa he sane? Ekolɛ Yehowa aaaye abuao kɛaatsɔ amɛnɔ ni obaana anɔkwale ni blema abɛ nɛɛ ji lɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi ha haomɔ be.”​—Abɛi 17:⁠17.

Yɛ anɔkwale mli lɛ, Yehowa ejieŋ naagba ni kɛ wɔyeyeeyefeemɔ lɛ ba lɛ kɛyaŋ yɛ be fɛɛ mli. Shi kɛtsɔ hewalɛ ni ewoɔ wɔ kɛtsɔɔ Biblia lɛ, mumɔ krɔŋkrɔŋ lɛ aloo wɔnyɛmimɛi Kristofoi lɛ anɔ lɛ, eyeɔ ebuaa wɔ ni wɔkwɛ naagbai lɛ yɛ gbɛ ni ja nɔ ni wɔkɛ nilee atsu he nii. Yɛ nɛkɛ gbɛ nɔ lɛ wɔɔnyɛ wɔkpa nɔ ni bɔfo Paulo kɛɛ nɛɛ shi: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.” (Filipibii 4:13) No hewɔ lɛ, eyɛ mli akɛ naagbai lɛ yɛ lolo moŋ, shi Yehowa yeɔ eshiwoo lɛ nɔ akɛ: “Mishiŋo ni misaa mikwaŋo gbi ko gbi ko.”​—Hebribii 13:⁠5.

Alma na anɔkwale ni enɛ ji lɛ. Eji Kristofonyo yoo ko ni kɛ oshara kpe yɛ tsɔne mli ni enɛ ha ekumɔ kɛjɛ ehɛ nɔ kɛbaa shishi. Epiiɔ waa, shi le ni ele akɛ etsɛŋ ni Nyɔŋmɔ baajie hela kɛ nɔnaa kɛya lɛ ji miishɛjemɔ nɔ kɛ yelikɛbuamɔ kɛha lɛ. Ekɛɛ yɛ nɛkɛ be nɛɛ mli akɛ: “Misɔleɔ mihaa Yehowa ni eye ebua mi ni madamɔ naa gbi fɛɛ gbi. Kɛkɛ lɛ kɛ gbi lɛ ho lɛ, mibɛŋkɛɔ he fiofio!”

Alma haaa Kristofoi asafoŋ kpeei aho ehe, ni ekɛ hegbɛ fɛɛ ni gbeleɔ haa lɛ akɛ ekɛ mɛi krokomɛi awie hiɛnɔkamɔ ni eyɔɔ yɛ wɔsɛɛ be he lɛ tsuɔ nii. Enuɔ Yehowa sɛɛfimɔ he yɛ nɛkɛ gbɛ nɔ yɛ be mli ni eŋɔɔ ejatsui lɛ efɔɔ enɔ lɛ.

Wɔbaanyɛ wɔma nɔ mi akɛ, nɔ yelikɛbuamɔ ni Yehowa kɛhaa lɛ ji nɔ ni he hiaa wɔ, ni ebiii ni akɛ eko agbe yi. Bɔfo Paulo kɛ ekaa jaje akɛ: “Shi wɔle akɛ, mɛi ni sumɔɔ Nyɔŋmɔ lɛ, nibii fiaa yeɔ buaa amɛ ni ahi aha amɛ.” (Romabii 8:28) Wɔbaanyɛ wɔna Yehowa Nyɔŋmɔ yelikɛbuamɔ yɛ nɔnaa ni wa waa po shishi. Paulo kɛɔ akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Yesu Kristo mli!”​—Filipibii 4:​6, 7.

No hewɔ lɛ, bɔ fɛɛ bɔ ni wɔyeyeeyefeemɔi aloo jatsui aaaji lɛ, nyɛhaa wɔkɛ hekɛnɔfɔɔ anyiɛa bɔfo Petro ŋaawoo Iɛ sɛɛ, akɛ: “Hewɔ lɛ nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli. Nyɛŋɔa nyɛhaomɔ fɛɛ nyɛfɔa enɔ, ejaakɛ lɛ ejwɛŋɔ nyɛnɔ.”​—1 Petro 5:​6, 7.

[Akrabatsa ni yɔɔ baafa 21]

Yehowa ewo shi akɛ ebaaye ebua wɔ ni wɔtere wɔjatsui lɛ. Ani oyɛ naagbai ni nyiɛ sɛɛ nɛɛ ekomɛi:

□ Hela?

□ Haomɔ?

□ Henilee ni gbaa mɔ naa?

□ He ni anuɔ akɛ he bɛ sɛɛnamɔ?

□ Henɔyeli ni bɛ?

□ Yiwaa loo nɔnyɛɛ?

Jwɛŋmɔ fɔŋ ni anaa yɛ maŋ nɔ ni ajɛ, gbɛhe yɛ shihilɛ mli aloo mɔ ni aji yɛ fɔmɔsu naa?

Ani daa gbi naagbai gbɔjɔɔ bo?

Henaagbamɔ yɛ wɔsɛɛ be he?

Gbɔmɛi ni amɛkɛ shihilɛ wa lɛ ahe nitsumɔ?

Kɛ nakai ni lɛ, mɛni hewɔ obɔɔ mɔdɛŋ akɛ oootsu amɛhe nii okome? Nɛkɛ yeyeeyefeemɔi nɛɛ anaadaamɔ feɔ mlɛo kɛ wɔkpɛlɛ yelikɛbuamɔ ni Yehowa kɛhaa lɛ nɔ.