“Dioofeemɔ Ni Yɔɔ Naakpɛɛ” Yɛ Tawuu He

United Church of Kanada wolo tɛtrɛɛ The Observer lɛ kɛɛ akɛ: “Áwie dioo ni sɔlemɔi lɛ efee yɛ jeŋ haomɔi ni mliwawai, titri lɛ yɛ tawuu nii afeemɔ he akaŋshii kɛ nuklea tawuu he gbeyeiwoo lɛ ahe yɛ nyɛsɛɛ afii nɛɛ mli.” Niŋmalɔ lɛ kpɛlɛ nɔ akɛ: “Mi sɔlemɔ ni miyaa ni ji The Church of Kanada lɛ fata nɛkɛ dioofeemɔ nɛɛ he.” Yiŋtooi ni ekɛha ni ekɛtsɔɔ mli lɛ ji nɔ ni nyiɛ sɛɛ nɛɛ:

“Wɔsɔlemɔi lɛ etsɔmɔ nyɔji amɛha tawuu he gbɛjianɔtoo lɛ. . . . Amɛkpɛlɛɔ tawuu he gbɛjianɔ ni atoɔ lɛ nɔ, ejaakɛ amɛ, kɛ amɛsɛɛnyiɛlɔi lɛ ateŋ mɛi pii naa he sɛɛ kɛtsɔɔ shika ni amɛkɛwoɔ mli yɛ tawuu he nibii afeemɔ nɔ lɛ hewɔ, ni amɛshashaoɔ shi akɛ amɛaatsi amɛhe kɛjɛ he yɛ shika kɛ hewalɛ kɛ hegbɛ ni amɛnaa kɛjɛɔ mli lɛ hewɔ. Sɔlemɔi lɛ sɔmɔɔ mana moŋ fe Nyɔŋmɔ. Sɔrɔtofeemɔ pii tsɔ ko bɛ jwɛŋmɔ ni mɛi ni yaa sɔlemɔ lɛ hiɛ kɛ nɔ ni mɛi ni amɛyaaa lɛ hiɛ lɛ teŋ yɛ tawuu he sane lɛ he. Sɔlemɔyalɔi lɛ ateŋ mɛi pii tamɔ adesai krokomɛi nɔŋŋ, ni ji akɛ, amɛkpɛlɛɔ tawuu ni akɛ nii ni afeɔ kɛkɛ, ni esaaa akɛ abiɔ he sane. . . .

“Miishe gbeyei akɛ sɔlemɔ lɛ baaya nɔ afee dioo yɛ nuklea tawuu he gbeyeishemɔ lɛ he, kɛyashi be mli ni sɔlemɔ lɛ mlibii kɛ amɛhe ni amɛkɛwo esha ni afeɔ ashiɔ adesa lɛ mli, ákɛ aŋkroaŋkroi kɛ kutuu lɛ aaakpe, ni amɛkpoo tawuu fɛɛ, ni amɛtsi amɛhe kɛjɛ shikahelɛtemɔ gbɛjianɔtoo ni kɛ tawuu kɛ jalɛsane ni ayeee baa lɛ he, ni amɛaafee klalo akɛ amɛbaakpɛlɛ nɔ ni ejɛ mli eba lɛ nɔ ákɛ aŋkroaŋkroi kɛ kutuu.” Nɔ ni nɛkɛ sɔlemɔyalɔi nɛɛ nyɛɛɛ afee lɛ, Yehowa Odasefoi kɛfee amɛshihilɛ gbɛ momo, ‘amɛkɛ amɛ klantei esɔ̃ kɔii, ni amɛkɛ amɛ akpɔlɔi hu esɔ̃ adedai, ni amɛkaseee tawuu dɔŋŋ.’​—Yesaia 2:⁠4.