Eyɛ hiɛnɔkamɔ diɛŋtsɛ

Afi nɛɛ shishijee mli ni oblayoo ko ni yaa kɔlegi yɛ New Jersey ŋma wiemɔ ko eha skul lɛ. Ewiemɔ lɛ ji akɛ: “Kɛ ofa gbɛ kɛtee wɔsɛɛ be mli lɛ, obaasumɔ ni oya shɔŋŋ kɛyashi nɛgbɛ? Tsii Afi lɛ ta. Tsɔɔmɔ bɔni je lɛ baatamɔ. Tsɔɔmɔ bɔni gbɔmɛi lɛ baatamɔ. Tsɔɔmɔ bɔni amɛshihilɛ yɔɔ; nɔ ni amɛtsuɔ; nɔ ni amɛyeɔ; kɛ ekrokomɛi.” Afii 15 oblayoo nɛɛ Yehowa Odasefoi lɛ ateŋ mɔ kome Aŋma akɛ:

“Kɛkɛ ni minu gbee ko ni naa wa yɛ maŋtsɛsɛi lɛ nɔ miikɛɛ akɛ: ‘Naa! Nyɔŋmɔ buu lɛ yɛ gbɔmɛi ateŋ, ni ekɛ amɛ aaahi shi, ni amɛaatsɔmɔ emaŋbii. Ni Nyɔŋmɔ diɛŋtsɛ: kɛ amɛ aaahi shi. Ni eeetsumɔ amɛ hiŋmɛiiaŋ yaafonui fɛɛ, ni gbele ehiŋ shi dɔŋŋ, ni ŋkɔmɔyeli ko kɛ bolɔmɔ ko loo nɔnaa ko hu ehiŋ shi dɔŋŋ. Tsutsu nii lɛ eho etee.’ Ni Mɔ ni ta maŋtsɛsɛi lɛ nɔ lɛ kɛɛ: ‘Naa! Miifee nii fɛɛ ehee.’ Ni ekɛɛ hu akɛ: ‘Ŋmaa, ejaakɛ nɛkɛ wiemɔi nɛɛ anɔkwa wiemɔi ni ma shi Shiŋŋ ni.’”

“Mikɛ afii pii ekase Biblia lɛ, ni nɛkɛ kuku nɛɛ ŋɔɔ minaa waa. Mikane nɛkɛ ŋmalɛ nɛɛ mli wiemɔi lɛ shii abɔ, ni misusuɔ akɛ ani shihilɛi ni tamɔ nɛkɛ aaanyɛ aba shikpɔŋ nɛɛ nɔ yɛ wɔsɛɛ be mli lo lɛ he. No hewɔ lɛ mibafee be he tsɔne ko, ni mifagbɛ kɛtee wɔsɛɛ be lɛ mli yɛ gbɛ ni adesa efeko nakai da lɛ nɔ.

“Gbɛfaa lɛ tee nɔ fɛfɛo. Mifa gbɛ afii 10 miniti kome. Beni miwa midamɔ shi lɛ, mina ni jeŋ ni ebɔle mihe lɛ etsake naakpa. Mina nibii ni yɔɔ gbeyei: shikpɔŋhosomɔi, tawuu, hɔmɔ, mlakwamɔ taakɛ bɔni atsɔɔ mli yɛ Mateo 24:​6-8 yɛ Biblia lɛ mli lɛ. Shi nɛkɛ nibii nɛɛ foŋ yɛ mihiŋmɛiiaŋ kɛkɛ. Nɔ ni nyiɛ sɛɛ ji, mina ni akpata nɔ fɛɛ nɔ ni ebɔle mihe kɛ-kpe lɛ hiɛ. Nɔ ko miikpata gbɔmɛi ahiɛ, jeee amɛ diɛŋtsɛ amɛ nibii ni amɛfee kɛha tawuu lɛ, shi moŋ adebɔɔ mli hewalɛi komɛi ni mɔ ko ni da fe gbɔmɔ kɛmiitsu nii.

“Mibɔ mɔdɛŋ ni maya blɛoo yɛ be mli koni mana nɛkɛ nibii ni yɔɔ naakpɛɛ ni yaa nɔ nɛɛ fɛɛ. No sɛɛ lɛ mina gbɔmɛi ni miitsu nii waa, amɛmiitsumɔ shikpɔŋ lɛ nɔ ni amɛmiisaa nɔ, amɛmiimamɔ tsui ni amɛmiisaa nɔ fɛɛ nɔ ehee. Eka shi faŋŋ akɛ abaa amɛyi kɛjɛ nakai fitemɔ lɛ mli hewɔ lɛ amɛmiibɛɛ muji ni fitemɔ lɛ kɛba lɛ. Amɛfɛɛ amɛmiitsu nii yɛ ekomefeemɔ kɛ gbeekpamɔ mli. Beni enɛ ho lɛ, mina hii kɛ yei krokomɛi babaoo hu yɛ shikpɔŋ nɔ. Mileee heni amɛbaa kɛjɛɔ. Mikwɛ aahu kɛyashi be mli ni mina nuu ko ni tamɔ minii. Yɛ anɔkwale mli Iɛ minii ni lɛlɛŋ. Egbo yɛ afi 1972 mli. Mikwɛ tsɔne lɛ mli nɔ fɛɛ nɔ beni afee ni mana akɛ jeee sɛɛsɛɛ miyaa lɛ. Dabi. Miiya hiɛ gbɛ. Shi miina gbɔmɛi ni egboi. Kɛkɛ ni mikai ŋmalɛ ko ni yɔɔ Biblia lɛ mli yɛ Bɔfoi lɛ Asaji. 24:15 lɛ: ‘Gbohiiashitee baaba, ni jalɔi kɛ mɛi ni ejaaa fɛɛ baate shi.’ Miina gbohiiashitee lɛ diɛŋtsɛ.

“Agbɛnɛ miwo foi yɛ migbɛfaa lɛ mli ni eha la kɛ sui sɔrɔtoi ni minaa lɛ futu. No hewɔ lɛ mito miyiŋ akɛ mawa madamɔ shi. Heni miwa yɛ lɛ bafee heni mije migbɛfaa lɛ shishi kɛjɛ lɛ, shi enɛ ebaje wɔsɛɛ be mli. . . .

“Mihiɛ gbɛ fioo lɛ mina ni gbekɛnuu fioo ko kɛ kooloo agbo miishwɛ. . . . Ekɛ JATA miishwɛ diɛŋtsɛ! Miisumɔ ni kulɛ masha foi ni mayabɔlɛ oshara ni yɔɔ nɔ ni efeɔ lɛ mli lɛ kɔkɔ, shi nɔ ko ha miwa midamɔ shi. Jata lɛ he ejɔ, eefee enii tamɔ alɔnte yɛ gbekɛ lɛ hiɛ. Minyiɛ kɛtsɔ shikpɔŋ, ni mina nɛkɛ toiŋjɔlɛ ni ka gbɔmɔ kɛ kooloi ateŋ nɛɛ ekoŋŋ, kɛ agbɛnɛ yɛ kooloi diɛŋtsɛ ateŋ. Nɔ ni yɔɔ naakpɛɛ ji gbeekpamɔ ni ka adesai ateŋ lɛ. Gbɔmɛi sɔrɔtoi fɛɛ miiwie wiemɔ kome ni amɛmiihi shi akɛ nyɛmimɛi hii kɛ yei. . . . Mina akɛ kpa ko bɛ nɛkɛ gbɔmɛi nɛɛ ahe. Tɔmɔ loo helai ko bɛ amɛhe. Amɛye emuu yɛ gbɔmɔtsoŋ. Kɛkɛ ni nɔ ko hɛle mi shi. Amɛji nakai gbɔmɛi lɛ nɔŋŋ ni mina afii 400 ni eho yɛ be mli ni mije migbɛfaa lɛ shishi lɛ. Shi amɛtamɔ nakai nɔŋŋ yɛ afii amli. Mɔ ko he yeee, mɔ ko egbɔko aloo ni mɔ ko miigbo.

“Mina miishɛɛ waa diɛŋtsɛ yɛ wɔsɛɛ be ni mifa gbɛ kɛtee mli nɛɛ mli. Agbɛnɛ miba shia, miba midiɛŋtsɛ mibe mli. Minyɛŋ matsɔ mɔ ko yiŋ yɛ nɔ ni mina lɛ he. Shi kɛ hoo kwraa lɛ, nɔ fɛɛ nɔ ni mikane yɛ Biblia lɛ mli lɛ eka mijwɛŋmɔ mli agbɛnɛ. Masumɔ ni maku misɛɛ ekoŋŋ ni mikɛ nakai gbɔmɛi lɛ ayahi shi daa. Shi mikai Biblia mli ŋmalɛ ko ni ma nɔ mi kɛha mi akɛ etsɛŋ ni mana enɛ. Eyɛ Lala 37:​10, 11: ‘Ni eshwɛ fioo pɛ kɛkɛ ni mɔfɔŋ lɛ bɛ dɔŋŋ; obaatao lɛ yɛ eshihilɛhe lɛ, shi onaŋ lɛ. Shi mɛi ni he jɔ lɛ shikpɔŋ lɛ aaatsɔ amɛnɔ̃, ni amɛmii aaashɛ amɛhe yɛ toiŋjɔlɛ babaoo mli.’”