Ajɔɔ Emɔdɛŋbɔɔ Lɛ

YEHOWA NYƆŊMƆ jɔɔ mɛi ni bɔɔ amɛhe mɔdɛŋ yɛ esɔɔmɔ lɛ mli tsɛbelɛ amɛyɛ naagbai, tamɔ hela lɛ. Yoo Kristofonyo ko ni yɔɔ Barbados lɛ ŋma akɛ:

“Gbi ko Hɔgbaa leebi beni awerɛhoo emɔ mi ni minijiaŋ eje wui po lɛ, mibɔ mɔdɛŋ mikɛ mihe wo shia-kɛ-shia sɔɔmɔ nitsumɔ lɛ mli. Mɛi aŋɔɔ ni mitee nakai leebi lɛ ateŋ mɛi babaoo [etsɔɔɔ sane lɛ he miishɛɛ]. Enɛ ha minijiaŋ je wui fe tsutsu lɛ. Shi mifee miyiŋ akɛ maya shia kome ekoŋŋ dani makpa. Miye omanye yɛ nakai naagbee shia lɛ mli fe bɔni mikwɛ gbɛ lɛ, ejaakɛ miyɔse yɛ sɛɛ mli akɛ yoo ŋɔɔ ni mitee lɛ hu nijiaŋ eje wui tamɔ bɔni efee mi klɛŋklɛŋ lɛ. No mli lɛ ejɛ helatsamɔhe eba etsɛko, ni ekɛɛ eetsu eshia nitsumɔi lɛ ‘kɛ yaafo kɛ sɔlemɔ akɛ Nyɔŋmɔ atsu mɔ ko ni ebashɛje emii.’”

Odasefonyo lɛ nyɛ ekɛ miishɛjemɔ shɛɛ ni kɔɔ Nyɔŋmɔ nibii agbɛjianɔtoo hee ni hela, yaafo kɛ gbele tete bɛ mli lɛ shiiwoo he lɛ ha yoo lɛ. (Kpoj. 21:⁠4) Enɛ ha aje daa Biblia nikasemɔ shishi. Yɛ otsii etɛ pɛ sɛɛ lɛ, yoo lɛ bɔ̃i Kristofoi akpee yaa. Etsɛɛɛ nɔŋŋ ni ebɔ̃i “sanekpakpa” lɛ kɛ mɛikrokomɛi ahamɔ.

Odasefonyo lɛ́ ŋma akɛ: “Minã miishɛɛ akɛ matswa nyɛ adafi akɛ agbɛnɛ yoo nɛɛ ebatsɔ mimumɔŋ nyɛmiyoo. Abaptisilɛ yɛ ‘Hiɛnɔkamɔ Ni Yɔɔ Wala’ Kpokpaawulu Kpee lɛ shishi. Miida Yehowa shi waa akɛ eyɛ mli akɛ migbɔmɔtso eŋmɛɛɛ mi gbɛ nakai Hɔgbaa leebi lɛ moŋ, shi emumɔ lɛ kɛ bɔfoi lɛ waje mi ni mibɔ mɔdɛŋ nakai leebi lɛ, ejaakɛ jeee mɔni ná sane lɛ he miishɛɛ lɛ pɛ ná he sɛɛ shi nɛkɛ niiashikpamɔ nɛɛ eha miná bɔfo Paulo wiemɔ nɛɛ he nɔmimaa akɛ, “kɛ mifee gbedee lɛ, no moŋ minaa hewalɛ.’”​—2 Kor. 12:⁠10.